உங்கள் கால்களை ஆரோக்யமாக பராமரிக்க

கால்களுக்குப் பலத்தைத் தருவதற்கும் எலும்புகளை வலுவாக்கவும் தினமும் உடற்பயிற்சியும் நடைப் பயிற்சியும் அவசியம்.

எலும்புக்குள் இருக்கும் திசுக்கள் நன்றாக வளர்வதற்கு வைட்டமின் டி தேவை. உடலுக்குச் சூரிய ஒளி படாமல் இருத்தல், ஊட்டச்சத்துக் குறைபாடு, உடலுக்குப் போதிய அசைவுகள் இல்லாமல் போவது போன்றவற்றால் எலும்பு, மூட்டு தேய்மானம் ஏற்படும்.

அதிக எடை உள்ளவர்கள், வறண்ட சருமத்தினர், அதிக அழுக்கான இடங்களில் நடப்பவர்கள், தோட்ட வேலை செய்பவர்கள், காலணி அணியாமல் நடப்பவர்கள் போன்றவர்களுக்குக் காலில் வெடிப்பு வரும் வாய்ப்புகள் அதிகம்.

பித்தவெடிப்பு

வெடிப்புகள் வராமல் பஞ்சுபோல் பாதம் மிருதுவாக இருக்க, பீர்க்கை நாறிலிருந்து ப்யூமிக் கற்கள் வரை பயன்படுத்தப்படுகின்றன. தினமும் கால்களைத் தண்ணீரில் ஊறவைத்து ஸ்க்ரப்பிங், மாய்ச்சுரைசிங் செய்வதன் மூலம் கடினமான தோலை எளிதில் மிருதுவாக்க முடியும். பித்த வெடிப்புகளையும் குணமாக்கிக்கொள்ளலாம்.

கால்களை நெடுநேரம் சுடுதண்ணீரில் ஊறவைத்துப் பின்னர் தேய்க்கலாம். கால்களை நன்றாகத் துடைத்துவிட்டு மாய்ச்சுரைசிங் க்ரீமை கால், விரல் இடுக்கு என்று எல்லா இடங்களிலும் மசாஜ் செய்வதுபோல் தடவ வேண்டும்.

உள்ளங்காலில் வெடிப்பு வந்திருந்தால் சோரியாசிஸ்தானா என்று உறுதி செய்து அதற்குரிய சிகிச்சை செய்துகொள்ள வேண்டும்.

ஒரு சின்ன போத்தல் கிளிசரினில் நான்கு துளி எலுமிச்சைச் சாறைவிட்டு நன்றாகக் கலக்கி மூடி வைத்துவிட வேண்டும். இதைத் தினமும் இரவில் தூங்கப்போகும் முன்பு பாத வெடிப்புப் பகுதியில் தேய்த்து வர வெடிப்பு மறைந்து பாதம் மிருதுவாகும்.

கால்களில் அதிக வெடிப்பு இருந்தால், இரவு தூங்குவதற்கு முன்னர் வாசலின் (அ) பெட்ரோலியம் ஜெல்லியைத் தடவி, சாக்ஸ் அணிந்துகொண்டு உறங்கச் சென்றால் வெடிப்பு நீங்கிப் பாதம் மிருதுவாகும்.

முட்டி கருமை

கால் முட்டி போட்டுத் தொழுவது, கைகளை மேஜை மீது வைத்துக்கொண்டு நெடுநேரம் கணனி முன்பு இருப்பது போன்ற காரணங்களால் அந்த இடங்களின் இயல்பான நிறம் மாறி கருத்துவிடும். கால் முட்டி தரையில் படாமல் துணியினை விரித்து உட்காரலாம்.

ஆலிவ் எண்ணெயை தினமும் தடவினால் கருமை மாறும். பயத்த மாவைப் பாலுடன் கலந்து பூசி 5 நிமிடங்கள் கழித்துக் கழுவ வேண்டும்.

குதிகால் வலி

இளம் பெண்கள் பென்சில் ஹீல்ஸ் போடுவதால் கால் எலும்பு, தசைப் பகுதிகள் பெரும் பாதிப்புக்கு உள்ளாகும். குதிகால் வலியால் சாதாரணமாகக்கூட நடக்க முடியாமல் போகும்.

ஒரே மாதிரியான உயரம் இருக்கக் கூடிய ஹீல்ஸ் அணியலாம். அதுவும், குறைந்த நேரம் மட்டுமே குதி உயர்ந்த காலணிகளை அணிய வேண்டும். எப்போதும் காலணி அணிந்து நடப்பது நல்லது.

காலில் உண்டாகும் வியர்வையைக் காலணி உள் வாங்கிக் கொள்ளும். ஜாகிங், வாக்கிங் செய்ய நல்ல தரமான ஷூக்களையே பயன்படுத்த வேண்டும். இதனால், உடல் புத்துணர்வுடன் இருக்கும். காற்றோட்டம் உள்ள ஷூக்கள் அணிவது கால் தொற்றுநோய்களைத் தடுக்கும்.

ஜிம்முக்குப் போகும் பழக்கமுள்ளவர்கள் அங்கே குளிக்கும்போது குளியல் அறை செருப்பு அணியாமல் குளிக்கக் கூடாது. இதனால், தொற்று நோய் பரவும் ஆபத்து உண்டு.

உணவு / பயிற்சி

பால், கீரை, எள், சீஸ், பனீர் சிறிய வகை மீன்களில் கால்சியம் அதிகம் உள்ளது. பாலக்கீரையில் வைட்டமின் சி சத்து அதிகமாக இருக்கிறது. உணவுப்பழக்கம், நடைப் பயிற்சி, மூட்டு மற்றும் தசைகளை அசைப்பதற்கான உடற்பயிற்சி போன்றவற்றால் மட்டுமே எலும்பை உறுதியாகவும், பாதுகாப்பாகவும் வைத்துக்கொள்ள முடியும்.