‘விஸ்வரூபம்’ பிரச்சனையில் கமலுக்கு உதவாத நடிகர் சங்கம் : ஃபேஸ்புக்கில் ஆத்திரப்பட்ட விஷாலுக்கு தடை?

by **ஜனனி** Tue Feb 05, 2013 6:27 pm

தமிழ்சினிமாவின் முன்னணி ஹீரோக்களில் ஒருவரான
விஷால் ‘விஸ்வரூபம்’ விவகாரத்தில் நடிகர் சங்கம் சரியான முறையில் அவருக்கு
உதவி செய்யவில்லை என்று ஃபேஸ்புக்கில் நடிகர் சங்கத்தை கடுமையாக
விமர்சித்து எழுதியதால் அவருக்கு நடிகர் சங்கம் நோட்டீஸ் அனுப்பியுள்ளது.

இதனால் நடிகர் விஷால் நடிகர் சங்கத்தின் நோட்டீஸுக்கு சரியான விளக்கம்
அளிக்காவிட்டால் அவர் அதிலிருந்து நீக்கப்படுவார் என்று அதன்
பொதுச்செயலாளர் ராதாரவி தெரிவித்துள்ளார்.

கமல்ஹாசனின் விஸ்வரூபம் படத்துக்கு பிரச்னை ஏற்பட்ட போது அவர் மட்டுமே
தனித்து நின்று போராடினார். பிரச்னையின் ஆரம்ப கட்டத்தில் எந்த நடிகருமோ,
நடிகர் சங்கமோ அவருக்கு உதவ முன்வரவில்லை.

ரஜினிகாந்த், கமலுக்கு ஆதரவாக அறிக்கை வெளியிட்ட பின்பு தான் நடிகர்கள் தங்கள் ஆதரவை அவருக்கு தெரிவிக்க முன்வந்தார்கள்.

இதுகுறித்து கமல்ஹாசன் முன்பு அளித்த ஒரு பேட்டியில் குறிப்பிடும்போது.
"நான் அவர்களுக்கு அன்பை கொடுத்திருக்கிறேன். அதை அவர்கள் எனக்கு
திருப்பித் தரவேண்டும்" என்று நான் எதிர்பார்க்க முடியாது என்று
கூறியிருந்தார்.

ஆகையால் இதுகூறித்து நடிகர் விஷால் தனது ஃபேஸ்புக் அக்கவுண்ட்டில் நடிகர் சங்கத்தை கடுமையாக விமர்சித்து எழுதியிருக்கிறாராம்.

நடிகர் சங்கம் கமல்ஹாசனுக்கு எந்த வகையிலும் உதவ முன்வரவில்லை. பெரிய
நடிகருக்கே இந்த கதி என்றால் சிறிய நடிகர்களை சங்கம் எப்படி காப்பாற்றும்?
என்றும் அவர் கேட்டிருந்தாராம்.

விஷாலின் இந்த கருத்து நடிகர் சங்க நிர்வாகிகளுக்கு ஆத்திரத்தை
ஏற்படுத்தியதால் விஷாலிடம் விளக்கம் கேட்டு நோட்டீஸ் அனுப்பியுள்ளனராம்.

மேலும் இதுகுறித்து கருத்து தெரிவித்திருக்கும் நடிகரும் சங்கத்தில் பொதுச்செயலாளருமான ராதாரவி,”விஸ்வரூபம்
பட பிரச்சினையில் நடிகர் சங்கம் என்ன செய்ய வேண்டுமோ அதைச் செய்தது.
விஷால் தனது ஃபேஸ்புக்கில் நடிகர் சங்கத்தை விமர்சித்து கருத்து
தெரிவித்தது குறித்து எங்கள் கவனத்துக்கு கொண்டு வரப்பட்டது. மேலும் நடிகர்
சங்க செயற்குழுவிலும் இது குறித்து பேசப்பட்டது.

விஷால்
இதுவரை நடிகர் சங்கம் கூட்டிய எந்த பொதுக்குழு கூட்டங்களில் பங்கேற்றது
இல்லை. ஆனாலும் அவரது பிரச்சினைகளை இந்த சங்கம் தீர்த்து வைத்துள்ளது.
லிங்குசாமிக்கும் விஷாலுக்கும் பிரச்சினை உருவான போது நடிகர் சங்கம்
தலையிட்டு விஷாலுக்கு பக்க பலமாக நின்று அவருக்கு உதவி செய்தது.

நானும் சங்கத்தின் தலைவர் சரத்குமார், பொருளாளர் வாகை சந்திரசேகர்
போன்றோரும் 250 படங்களுக்கு மேல் நடித்தவர்கள். பொதுக்குழுவுக்கே வராத
விஷாலுக்கு எங்களை பார்த்து கேள்வி கேட்க எந்தத் தகுதியும் இல்லை.

இப்போது
விஷாலுக்கு விளக்கம் கேட்டு நோட்டீஸ் அனுப்புகிறோம். அதற்கு அவர் 15
நாட்களுக்குள் அவர் பதில் சொல்ல வேண்டும்,. அவர் அளித்த விளக்கம் ஏற்க
கூடியதாக இருந்தால் ஏற்போம். அப்படி இல்லா விட்டால் நடிகர் சங்கத்தின்
அடிப்படை உறுப்பினர் பொறுப்பில் இருந்து அவரை நீக்குவது பற்றி முடிவு
செய்யப்படும் என்று கூறியிருக்கிறார்.

இதில் சுவாரஸ்யம் என்னவென்றால் விஷால் கூறிய அதே கருத்தைத்தான் நடிகர்
சங்கத்தலைவர் சரத்குமாரின் மகள் வரலட்சுமியும் தனது ட்விட்டரில்
கூறியிருந்தார். அவருக்கு எதாவது நோட்டீஸ் வந்திருக்கான்னு தெரியலையே!