சேர்ந்து வாழலாம். ஆனால் உடலுறவு கூடாது. காதலர்களுக்கு வழங்கிய கட்டப்பஞ்சாயத்து தீர்ப்பால் பரபரப்பு.

by **ஜனனி** Tue Feb 05, 2013 8:47 am

அரியானாவில்,
காதலித்து திருமணம் செய்த, ஒரே ஜாதியை சேர்ந்த இளம் ஜோடியை, "அண்ணன்,
தங்கையாக வாழ வேண்டும்; மீறினால், கடும் தண்டனைக்கு ஆளாக நேரிடும்' என,
கிராம பஞ்சாயத்து தீர்ப்பு வழங்கியுள்ளது. ஹிசார் மாவட்டத்தின் பித்மாரா
கிராமத்தில், ஜோதி பிரகாஷ், 25, என்ற இளைஞனும், பிரியங்கா ராணி, 20, என்ற
பெண்ணும் காதலித்தனர்.
இருவரும்
தலித் சமுதாயத்தை சேர்ந்தவர்கள்; தூரத்து சொந்தம். இருவரின் உறவு முறை,
அண்ணன், தங்கையாக இருந்த போதிலும், அவர்கள் இருவரும் காதலித்து, கடந்த மே
மாதம், ஓடி போய் திருமணம் செய்து கொண்டனர். கடந்த வாரம் அவர்கள், ஊர்
திரும்பினர். இருவரும் பஞ்சாயத்து முன் ஆஜர்படுத்தப்பட்டனர்.

ஓடி
போய் திருமணம் செய்து கொண்டதாலும், உறவு முறை, சகோதரன், சகோதரியாக
இருப்பதாலும், "இருவரும் சேர்ந்து வாழ கூடாது' என, பஞ்சாயத்தினர்
உத்தரவிட்டனர். தங்களை பிரிக்க கூடாது என, அந்த ஜோடி முறையிட்டது. இதனால்,
இறங்கி வந்த பஞ்சாயத்து, "இருவரும் சேர்ந்து வாழலாம்; ஆனால், அண்ணன்,
தங்கை போல வாழ வேண்டும்; உடல் ரீதியிலான எந்த தொடர்பும் இனி மேல் வைத்து
கொள்ள கூடாது. மீறினால், கடும் தண்டனை வழங்கப்படும்' என உத்தரவிட்டது.

இதனால்,
அதிர்ச்சி அடைந்த இளம் ஜோடி, ஹிசார் பகுதி போலீசில் புகார் செய்தது.
பித்மாரா கிராமத்திற்கு விரைந்த போலீசார், பஞ்சாயத்து தலைவர், பல்ஷெர்
சிங்கிடம் விசாரணை நடத்தினர். தங்களின், "கட்டபஞ்சாயத்து' போலீசுக்கு
தெரிந்து விட்டதால், அதிர்ச்சி அடைந்த பஞ்சாயத்து உறுப்பினர்கள், "அவ்வாறு
எந்த தீர்ப்பும் வழங்கவில்லை' என, மறுத்தனர்.

எனினும், பாதிக்கப்பட்ட ஜோடி முன்னிலையில் நடத்தப்பட்ட விசாரணையில், கிராம
பஞ்சாயத்தின் அட்டூழிய தீர்ப்பு தெரிய வந்தது. போலீஸ் தேடி வந்ததை
அறிந்த, கிராம பஞ்சாயத்து உறுப்பினர்கள் தலைமறைவாகி விட்டனர்.