பொட்டு சுரேஷ் வெட்டி கொலை: இரவு 8 மணிக்கு முருகன் குறுக்கு தெருவில் என்ன நடந்தது?

மத்திய அமைச்சர் மு.க.அழகிரியின் வலதுகை என வர்ணிக்கப்பட்ட பொட்டு
சுரேஷ், நேற்றிரவு 8 மணிக்கு வீதியில் வைத்து வெட்டிக் கொல்லப்பட்டார்.
காரில் இருந்து வெளியே ஓட முயன்ற பொட்டு சுரேஷை, இழுத்துப் போட்டு வெட்டி,
ரத்த வெள்ளத்தில் சாய்த்தது, 6 பேர் அடங்கிய ஒரு குழு.
[You must be registered and logged in to see this image.]

கொலை செய்தவர்கள் அனைவரும், மின்னலென தப்பிச் சென்றனர். அதன்பின் வந்தது, போலீஸ்.

மதுரை சத்யசாய் நகர் துரைச்சாமி ரோட்டைச் சேர்ந்தவர் பொட்டு சுரேஷ். 50
வயதான இவரது நிஜப் பெயர், சுரேஷ்பாபு. தி.மு.க. தலைமை செயற்குழு
உறுப்பினர். மு.க.அழகிரி இல்லமும், சத்யசாய் நகரிலேயே உள்ளது.

நேற்றிரவு 7.40 மணியளவில் தனது TN59A6789 எண்ணுடைய காரில் சத்யசாய் நகர்
நோக்கி வந்து கொண்டிருந்தார். டிரைவர் மணி என்கிற மாணிக்கம் காரை
ஓட்டினார். கடந்த சில தினங்களாகவே, வீட்டுக்கு வரும் பாதையை பொட்டு சுரேஷ்
அடிக்கடி மாற்றினார் என்று கூறப்படுகிறது. தனக்கு ஏதோ ஆபத்து உள்ளது என
அவர் தெரிந்து கொண்டிருக்கலாம்.

சத்யசாய் நகர் மெயின் ரோட்டில் இருந்து முருகன் குறுக்குத்தெரு
சந்திப்பில் பொட்டு சுரேஷின் கார் வந்துகொண்டு இருந்தது. வீதியில் பெரிதாக
நடமாட்டம் இல்லை. எதிரே டூவீலரில் 2 பேர் வந்துகொண்டு இருந்தனர். அதை
செலுத்தியவர், போதையில் வருவதுபோல வெட்டிவெட்டி ஓடி, சுரேஷின் கார் மீது
மோத முயற்சித்தனர்.

டிரைவர் டூவீலரில் மோதாமல் இருப்பதற்காக காரை நிறுத்தினார். பொட்டு சுரேஷ் கார் கதவை திறந்துகொண்டு இறங்க வெளியே கால் வைத்தார்.

அந்த நேரத்தில், இவரது காரை தொடர்ந்து வந்து கொண்டிருந்த ‘டாட்டா ஏஸ்’
லோடு வேன், காருக்கு பின்னே சடன் பிரேக் அடித்து நிறுத்தப்பட்டது. அதில்
இருந்து 6 பேர் கொண்ட கும்பல் குதித்தது. இவர்கள் அனைவரும் தலையில்
முண்டாசு கட்டிக் கொண்டு இருந்தனர்.

கீரே குதித்தபோது, அவர்களது கைகளில் கத்தி, அருவா போன்ற ஆயுதங்கள் இருந்தன. இவர்கள் பொட்டு சுரேஷின் காரை நோக்கி ஓடி வந்தனர்.

எதிரே டூவீலரில் இருந்த இருவரை பார்த்து திட்டி சத்தம் போட்டபடி கீழே
இறங்கிய பொட்டு சுரேஷை இவர்கள் பின்புறமாக வந்து பிடித்துக் கொண்டனர்.
அதன்பின்னர்தான் தாம் சிக்கிக் கொண்டதை கவனித்த பொட்டு, அவர்களை
தள்ளிவிட்டு வீதியில் ஓட முயன்றார்

உடனே, லோடு வேனில் வந்த மர்மக் கும்பலில் இருந்தவர்கள் பொட்டு சுரேஷை
கத்தியால் குத்தி, அரிவாளால் வெட்டினர். ஒருவர் பொட்டுவை பிடித்து கீழே
தள்ள, அவர் தரையில் வீழ்ந்தார். அப்போதும் உயிருடன் இருந்த அவரை மீண்டும்
மீண்டும் குத்தி போட்டுத் தள்ளினர்.

சுமார் 20 இடங்களில் வெட்டுக்காயம் உள்ளதாக தெரியவருகிறது. பெரும்பாலான காயங்கள் உடலின் பின் பகுதியிலேயே உள்ளன.

சம்பவ இடத்திலேயே பொட்டு சுரேஷ் பரிதாபமாக இறந்தார்.

உடனே டூவீலரில் வந்தவர்களும், லோடு வேனில் வந்தவர்களும் அங்கிருந்து தப்பினர்.

அதன்பின் அப்பகுதி மக்கள் போலீசாருக்கு தகவல் தெரிவித்தனர். சம்பவ
இடத்திற்கு ஜெய்ஹிந்த்புரம் போலீசார் விரைந்து வந்தனர். துணை கமிஷனர்
திருநாவுக்கரசு, நேரில் வந்து விசாரணை நடத்தினர்.

பொட்டு சுரேஷின் உடல் பிரேத பரிசோதனைக்காக மதுரை ராஜாஜி அரசு மருத்துவமனைக்கு எடுத்து செல்லப்பட்டுள்ளது.

கைரேகை நிபுணர் மீனாட்சி சம்பவ இடத்தில் ஆய்வு செய்தார். மோப்ப நாய்
அழகர் கொலை நடந்த இடத்துக்கு கொண்டுவரப்பட்டது. அழகர், சம்பவ
இடத்திலிருந்து டி.வி.எஸ். நகர் ரயில்வே கேட் வரை ஓடி நின்று விட்டது.

சம்பவத்தை நேரில் பார்த்தவர்கள், பொட்டுவை போட்டுத் தள்ளியவர்கள்,
பார்ப்பதற்கு கட்டுமான பணியாளர்கள் போன்ற தோற்றத்தில் இருந்ததாக
கூறுகின்றனர். மதுரை சீனியர் போலீஸ் அதிகாரி ஒருவரிடம் கேட்டபோது, இது
கைதேர்ந்த குழு ஒன்றின் வேலை என்றார். முன்கூட்டியே திட்டமிடப்பட்டு,
கச்சிதமாக செய்து முடிக்கப்பட்ட கொலை என்றும் சொல்கிறார் அவர்.

2006 – 2011 காலப் பகுதியில் மதுரையில் அழகிரி சக்கரவர்த்தி என்றால்,
பொட்டு சுரேஷ் குறுநில மன்னர். ஆட்சி மாறியபின், 2011-ம் ஆண்டு ஜூலையில்,
நில அபகரிப்பு, மற்றும் கொலை வழக்குகளில் கைது செய்யப்பட்டார். அவரது வீடு,
பார்ட்னராக உள்ள நிறுவனங்கள் ரெயிடு செய்யப்பட்டன. (மேலேயுள்ள போட்டோ)
குண்டர் தடுப்பு பிரிவில் தடுத்து வைக்கப்பட்டிருந்தார்.

அதன்பின், கைதான மற்றைய அனைத்து தி.மு.க.-வினர் போலவே, இவரும் பெயிலில் வெளியே வந்துவிட்டார். இப்போது, கொல்லப்பட்டும் விட்டார்.

மு.க. அழகிரியின் வலதுகரமான பொட்டு சுரேஷ், அழகிரி வீட்டுக்கு அருகிலேயே
கொல்லப்பட்டார். இந்த கொலை நடந்தபோது, அழகிரி, வீட்டில் இல்லை என்று
கூறப்படுகிறது.

பொட்டு கொல்லப்பட்டதையடுத்து, மதுரையில் பதட்ட நிலை காணப்படுகிறது.
ஏராளமான எண்ணிக்கையில் போலீஸ் குவிக்கப்பட்டுள்ளனர். போலீஸ் புலனாய்வு
தொடங்கிவிட்டது.
-விறுவிறுப்பு-