கமலின் விஸ்வரூபம் இன்று ரிலீஸ் சந்தேகம்! இரவோடு இரவாக அரசு கடும் முயற்சி!!

கமல்ஹாசனின் விஸ்வரூபம் படம் மீதான தமிழக அரசின் தடையை, சென்னை
உயர் நீதிமன்றம் நேற்று (செவ்வாய்க்கிழமை) இரவு நீக்கியது. மேலும், தமிழகம்
முழுவதும் இந்தப் படத்தை உடனடியாகத் திரையரங்குகளில் வெளியிடவும் நீதிபதி
தனது தீர்ப்பில் அனுமதி அளித்தார். ஆனால், அதை தடுக்க இரவோடு இரவாக தமிழக
அரசு பலத்த முயற்சிகளை செய்வதாக தெரிகிறது.

சென்னை உயர் நீதிமன்றத்தில் நீதிபதி கே.வெங்கட்ராமன் இந்த வழக்கில்
கமல்ஹாசனின் ராஜ்கமல் பிலிம்ஸ் நிறுவனத்துக்கு சாதகமாகவும், தமிழக அரசுக்கு
பாதகமாகவும் தீர்ப்பு வழங்கினார்.

அதையடுத்து, தமிழக அரசு தலைமை வக்கீல் நவநீதகிருஷ்ணன், சென்னை ஹைகோர்ட்
தலைமை நீதிபதியை (பொறுப்பு) நள்ளிரவுக்கு முன்பு அவரது வீட்டில் சென்று
சந்தித்ததாக கூறப்படுகிறது. அந்த சந்திப்பில், இன்று (புதன்கிழமை) படம்
தியேட்டர்களுக்கு வராமல் இருக்க அப்பீல் செய்யப் போவதாக அனுமதி கேட்டார்
எனவும், நீதிபதி அனுமதி வழங்கியதாகவும் தகவல் கிடைத்துள்ளது.

இன்று காலை 10 மணியளவில், உயர்நீதிமன்ற தலைமை நீதிபதியிடம் அப்பீல்
செய்யப்பட ஆவணங்கள் தயாரிக்கும் ஏற்பாடுகள் நடைபெறுவதாகவும்,
கூறப்படுகின்றது.

தமிழக அரசு, சட்டம் ஒழுங்கு பிரச்னையை காரணம் காட்டலாம் என்று
தெரியவருகிறது. நேற்றிரவு இந்த வழக்கில் தீர்ப்பு வழங்கப்பட்ட நேரத்தில்,
சென்னை உயர் நீதிமன்றம் மற்றும் பாரிமுனைப் பகுதிகளைச் சுற்றிலும் மிக
பலத்த போலீஸ் பாதுகாப்பு போடப்பட்டது. அத்துடன், அப்பகுதிகளில் கடைகள்
மூடப்பட்டன.

தமிழக அரசு தலைமை வக்கீல் நவநீதகிருஷ்ணன்,“ஹைகோர்ட் தீர்ப்பு இறுதியான
தீர்ப்பு அல்ல. அதேபோல் 144 தடை உத்தரவும் தற்காலிகமாக நிறுத்தி
வைக்கப்பட்டு உள்ளது’’ என்பதே அரசின் நிலைப்பாடு என்றார்.

இதில் மற்றொரு விவகாரமும் உள்ளது. நேற்றிரவு வழங்கப்பட்ட தீர்ப்பு,
அதாவது இந்த தடை நீக்கம், ராஜ்கமல் பிலிம்ஸ் நிறுவனத்திற்கு மட்டுமே
பொருந்தும். தியேட்டர்களுக்கு பொருந்தாது என்ற கோணத்திலும், அரசுத் தரப்பு
இதை, இன்று காலை கோர்ட் திறக்கும்வரை ஹான்டில் பண்ண முடியும்.

அதாவது, கோர்ட் திறக்குமுன், படத்தை ரிலீஸ் செய்யாது மாவட்ட ஆட்சியரை வைத்து தடுக்க முடியும்.

பார்க்கலாம், என்ன செய்யப் போகிறார்கள் என்பதை!