ரூ .1,000 கோடி இழப்பு: அழகிரி மந்திரி பதவியில் இருந்து நீக்க ஜெ.,கோரிக்கை

by **Tamil** Fri Jan 25, 2013 7:39 am

சென்னை: "உரத் துறையில், 1,000 கோடி ரூபாய் வரை இழப்பை ஏற்படுத்தியுள்ள,
மத்திய உரத்துறை அமைச்சர் அழகிரியை, அமைச்சரவையில் இருந்து நீக்க வேண்டும்'
என, முதல்வர் ஜெயலலிதா, தெரிவித்துள்ளார்.
முதல்வர் ஜெயலலிதா அறிக்கை:
இந்தியாவில்,
ஊழலுக்கு ஊக்கமளிக்கும் வகையில், தனியார் உர உற்பத்தி நிறுவனங்கள் லாபம்
அடையும் வண்ணம், உரக் கொள்கை வகுக்கப்பட்டு, இரண்டு ஆண்டுகளாக விவசாயிகள்
சுரண்டப்பட்டு வருகின்றனர். உரத்திற்கான மானியத்தை அவ்வப்போது மாற்றி
நிர்ணயித்த, மத்திய அரசு, உரங்களின் அதிகபட்ச சில்லரை விலை ஏறாத வகையில்,
பல்வேறு காலகட்டங்களில், பல்வேறு விதமாக, மானியம் கணக்கிடப்பட்டு, உர
உற்பத்தியாளர்களுக்கு வழங்கப்பட்டு வந்தது.கடந்த, 2010ம் ஆண்டு முதல்,
ஊட்டச்சத்து அடிப்படையிலான, புதிய கொள்கையை மத்திய அரசு அறிவித்தது.
இதன்படி, உரங்களுக்கான ஆண்டு மானியத் தொகை, மத்திய அரசால் ஒவ்வொரு ஆண்டும்
அறிவிக்கப்பட்டு, உர உற்பத்தி நிறுவனங்களுக்கு வழங்கப்படுகிறது.இதனால்,
அரசு வழங்கும் மானியம் நிலையாகவும், உரங்களின் சில்லரை விலை அவ்வபோது
மாற்றியமைக்கும் வகையில் அமைந்து விட்டது. இதனால், உரங்களின் விலை
தொடர்ந்து ஏறுமுகமாக உள்ளது.
மத்திய அரசின் புதிய கொள்கையால், 50 கிலோ,
ஏ.டி.பி., உரத்தின் விலை, 486லிருந்து, 1,200 ரூபாயாகவும், எம்.ஓ.பி.,
உரத்தின் விலை, 231லிருந்து, 840 ரூபாயாகவும், காம்ப்ளக்ஸ் உரத்தின் விலை,
374 ரூபாயில் இருந்து, 1,110 ரூபாயாகவும், இரண்டு, மூன்று மடங்கு உயர்ந்து
விட்டது.இந்த விவசாய விரோத கொள்கையை திரும்பப் பெற வலியுறுத்தி,
கடந்தாண்டு, பிரதமருக்கு கடிதம் எழுதிய போதும், எந்த நடவடிக்கையும்
எடுக்கப்பட வில்லை.
இந்நிலையில், டி.ஏ.பி., - எம்.ஓ.பி., உரத்திற்கான
மானியத்தை பெற்ற உர தயாரிப்பு நிறுவனங்கள், டன் ஒன்றிற்கு, 5,000 ரூபாய்
வரை லாபம் பெற்றதாக, உரத்துறை இணையமைச்சர், ஸ்ரீகாந்த் ஜெனா, மத்திய
அமைச்சர் அழகிரி கவனத்திற்கு கொண்டு சென்றுள்ளார்.அதேபோல், தனியார் உர
தயாரிப்பு நிறுவனங்கள், உரங்களின் விலை குறைக்கப்பட்டு விடும் என்பதற்காக,
முன்னதாகவே, தங்கள் இருப்பு உரத்தை, சந்தைக்கு அனுப்புவதற்கான ஒப்புதலை
பெற்றதாகவும், இணையமைச்சர் ஸ்ரீகாந்த் ஜெனா, அழகிரியின் கவனத்திற்கு கொண்டு
வந்துள்ளதாகவும், ஊடகங்களில் செய்திகள் வெளியாகியுள்ளன.
இதுகுறித்து,
மத்திய அமைச்சர் அழகிரியிடம், பத்திரிகையாளர்கள் கேட்டதற்கு, "பிரதமரிடம்
போய் கேளுங்கள்' என, தெரிவித்ததாக கூறப்படுகிறது. என் கடிதத்திற்கு
பிரதமரும், மத்திய இணையமைச்சர் கடிதத்திற்கு, மத்திய அமைச்சர் அழகிரியும்
நடவடிக்கை எடுக்காததை பார்க்கும் போது, புதிய கொள்கை, ஊழல் புரிய வகை
தருகிறதா என்ற எண்ணத்தை உருவாக்கியுள்ளது.ஊடகங்களில் வெளியாகியுள்ள
செய்தியின்படி, உர நிறுவனங்களுக்கு, 1,000 கோடி ரூபாய்க்கு கொள்ளை லாபம்
ஏற்பட்டுள்ளது. மத்திய அரசுக்கும், விவசாயிகளுக்கும் இழப்பு ஏற்பட்டுள்ளது.
இணையமைச்சர்,
தன் துறையில் ஏற்பட்டுள்ள இழப்பை தடுப்பதற்கான குறிப்பை அளித்துள்ள
நிலையில், அவற்றை உதாசீனப்படுத்தி, இழப்பை ஏற்படுத்தியுள்ள, மத்திய
அமைச்சர் அழகிரியை, அமைச்சரவையில் இருந்து நீக்க வேண்டும்.இதற்கு
காரணமானவர்கள் மீது, குற்றவியல் நடவடிக்கை எடுப்பதுடன், அரசுக்கு
ஏற்பட்டுள்ள இழப்பை மீட்க வேண்டும்.இவ்வாறு அறிக்கையில்
குறிப்பிட்டுள்ளார்.