2013 : உலகின் எதிர்பார்ப்புக்கள்!

2013 ஐ உலகம் வரவேற்க தொடங்கியுள்ளது. ஆஸ்திரேலியாவிலிருந்து ஆரம்பித்த
வானவேடிக்கை நிகழ்வுகள் ஆசியா, ஐரோப்பாவை கடந்து அமெரிக்கா வரை தொடர்கிறது.


கிரெகொரியின் நாட்காட்டி படியே இது 2013ம் வருடம். தமிழுக்கு 2044ம்
ஆண்டு (திருவள்ளுவர் ஆண்டு) சீன நாட்காட்டிப்படி 4709-4710. இந்து
நாட்காட்டியின் கலியுகம் படி 5114-5115, இஸ்லாமிய நாட்காட்டி படி
1434-1435.

கிரித்மாதி (கிரிஸ்மஸ் தீவு) எனும் மத்திய பசுபிக் தீவுகள் தான் புது வருடம் 2013 ஐ முதலில் கொண்டாடியது.

அமெரிக்காவின் சமோவா தீவுகளே புதுவருடத்தை கடைசியாக கொண்டாடுகிறது.
இன்று (செவ்வாய்க்கிழமை) GMT நேரம் காலை 11 மணிக்கே அத்தீவுகளில்
புதுவருடம் பிறக்கிறது.

ஆஸ்திரேலிய தலைநகர் சிட்னியில் 1.5 மில்லியன் மக்கள் இரவு வானவேடிக்கை
நிகழ்வுகளில் கலந்து கொண்டனர். மியன்மார் தனது முதலாவது சுதந்திர பொது
மக்கள் முன்னிலையிலான கவுண்டவுன் மூலம் புதுவருடத்தை வரவேற்றது.

இந்திய
தலைநகர் டெல்லியில் இம்முறை புதுவருட கொண்டாட்டங்கள்
புறக்கணிக்கப்பட்டுள்ளன. அங்கு அண்மையில் பாலியல்
பலாத்காரப்படுத்தப்பட்டதனால் உயிரிழந்த டெல்லி கல்லூரி மாணவிக்கு நீதி கோரி
தொடர்ச்சியாக போராட்டங்கள் நடைபெற்று வருவதால் இப்புதுவருட கொண்டாட்டங்கள்
புறக்கணிப்பு செய்யப்பட்டுள்ளன.

அமெரிக்காவின் நியூயோர்க் டைம்ஸ் கொயார் சதுக்கத்தில் ஒரு மில்லியன்
பொதுமக்கள் கூடியுள்ளனர். அங்கு, கலாச்சார முறையில் கிரிஸ்டல் பந்து
வீழ்த்தப்பட்டு நள்ளிரவு புதுவருட கவுண்டவுன் நடத்தப்படுகிறது.

சீனாவில் 2013, கடந்த ஆண்டை விட சிக்கல் குறைந்த ஆண்டாக இருக்கும் என
ஹாங்காங்கின் பிரபல ஆன்மீக குரு ரேய்மொண்ட் லோ எதிர்வு கூறியுள்ளார்.
ஏனெனில் கடந்த வருடம் அவர்களுக்கு டிராகன் வருடம். அது தண்ணீருடன்
தொடர்புடையதாம். தண்ணீர் என்பது பயத்தை குறிக்கும். அதனால் கடந்த
வருடத்தின் குளிர்காலத்தில் மிகவும் கஷ்டப்பட்டோம். கல்லூரியில்
துப்பாக்கிச்சூடு, வரிச்சுமை விவகாரம், உலக அழிவுகள் குறித்த எதிர்வுகூறல்
என எதிர்மறையான விடயங்களையே கேள்விப்பட்டோம். ஆனால் மலர்ந்துள்ள புதுவருடம்
பாம்பை குறிக்கிறது. அதோரு நெருப்புடன் தொடர்புடையது. தண்ணீருக்கு
எதிரானது. நெருப்பு என்பது சந்தோஷம். அதனால் இவ்வருடம் பொருளாதார
ரீதியிலும் எமக்கு நன்மை பயக்க கூடும் என கூறியுள்ளார் ரேய்மாண்ட் லோ.

ஜேர்மனிய
அதிபர் ஆஞ்செலா மார்கெல் இந்த 2013ம் வருடம் கடுமையான பொருளாதார
நெருக்கடிகளை ஜேர்மனி சந்திக்க கூடும் என எச்சரிக்கை விடுத்துள்ளார்.

கிரீஸ் அரசு, 'கடந்த வருடம் பொருளாதார நெருக்கடியில் மிக கடுமையாக
பாதிக்கப்பட்டிருந்தோம். மலர்ந்துள்ள புதுவருடம் எமக்கு புதிய நம்பிக்கைகளை
கொடுக்கட்டும்' என தெரிவித்துள்ளது.

பொருளாதார நெருக்கடியினால்,
சைப்பிரஸ் நாட்டின் தலைநகர் நிகோஸியா தனது புதுவருட கொண்டாட்டங்களை
இரத்து செய்துள்ளது. இதன் மூலம் சேமிக்கும் 16,000 யூரோக்களை,320
ஏழைக்குழந்தைகளுக்கு கொடுக்க போவதாக அறிவித்துள்ளது.

அனைத்து
வகையான மரணங்களும், அநீதிகளும் நடைபெற்று வருகின்ற போதும் புதுவருடத்தில்
நல்லது நடக்கும் என நம்புவோம் என தனது வாழ்த்துச்செய்தியில் பாப்பரசர் 7வது
பெனக்டிக்ட கூறியுள்ளார்.

ஐரோப்ப்பாவில் மிகப்பெரும், புதுவருட கொண்டாட்டத்தை நள்ளிரவில்
கொண்டாடும் நாடு ஸ்காட்லாந்து. இதன் பிரதான நகர் ஈடின்பேர்கில் நடைபெற்ற
கொண்டாட்டங்களில் 75,000 பேர் பங்கு பெற்றனர்.

2012 : லண்டன்
ஒலிம்பிக், அமெரிக்க அதிபர் தேர்தல் என களைகட்டியது. ஆனால் 2013 இல்
இவ்வாறான முக்கிய சுவாரஷ்யமான நிகழ்வுகள் எதுவும் இடம்பெறவில்லை. எனினும்
2013 ஜூலை 1ம் திகதி குரோஷியா ஐரோப்பிய ஒன்றியத்தில் இணையவுள்ளது. 2013
நவம்பரில் இந்தியா செவ்வாய் கோள் பற்றிய ஆராய்ச்சிக்கான 'மாங்கல்யான்'
செய்மதியை ஏவவுள்ளது. இது செவ்வாய்க்கான இந்தியாவின் முதல் செய்மதி திட்டம்
என்பது குறிப்பிடத்தக்கது. நாசா மாவென் எனும் விண்கலத்தை செவ்வாய்க்கு
ஏவுகிறது. சீனா தனது முதல் ஆளில்லா நிலவு பயணத்தை மேற்கொள்ளவுள்ளது.
பிறந்துள்ள 2013ம் வருடம் உங்களுக்கு எப்படி? நம்பிக்கைகளை தளரவிடாது
தொடர்ந்து பயணியுங்கள். நிச்சயம் இவ்வருடம் உங்களுக்கு நன்மை பயக்கும்.