காணாமல்போனோர் தொடர்பாக சர்வதேசத்திடம் முறையிடக் கூடாது - இராணுவம் எச்சரிக்கை: பி.பி.ஸி

by **மாலதி** Thu Dec 27, 2012 7:19 am

காணாமல்போனோர் தொடர்பாக சர்வதேசத்திடம் முறையிடக் கூடாது - இராணுவம் எச்சரிக்கை: பி.பி.ஸி

கடந்த காலங்களில் கடத்தப்பட்டு காணாமல்போனோரின் உறவுகள் இதுதொடர்பில்
ஐ.நா. உள்ளிட்ட சர்வதேச அமைப்புகளிடமோ அல்லது வேறு வெளிநாட்டு
நிறுவனங்களிடமோ முறைப்பாடு செய்யக்கூடாது என்று படையினர் எச்சரித்துள்ளனர்
என பி.பி.ஸி. தெரிவிக்கின்றது.

இதுதொடர்பில் பி.பி.ஸி. செய்திச்சேவை வெளியிட்டுள்ள செய்தியில் மேலும் தெரிவிக்கப்பட்டுள்ளதாவது:

திருகோணமலை மாவட்டத்தில் தம்பலகாமம் கிராமத்தைச் சேர்ந்த மக்கள்
பாதுகாப்புத் தரப்பினரால் இவ்வாறு எச்சரிக்கப்பட்டுள்ளனர் எனத்
தெரிவிக்கப்பட்டுள்ளது. அந்தப் பிரதேசங்களில் கடந்த காலங்களில்
கடத்தப்பட்டு காணாமல் போனவர்களின் உறவினர்கள் ஐ.நா. உள்ளிட்ட சர்வதேச
அமைப்புகளிடமோ அல்லது வேறு வெளிநாட்டு நிறுவனங்களிடமோ முறைப்பாடு
செய்யக்கூடாது என்றும் படையினர் எச்சரித்து விட்டுச் சென்றுள்ளனர் என
அப்பகுதி மக்கள் முறைப்பாடு செய்துள்ளனர் என வடக்கு கிழக்குப்
பிரதேசங்களில் போரினால் பாதிக்கப்பட்ட பெண்களுக்காகக் குரல்கொடுக்கின்ற
அமைப்பொன்றின் தலைவி தெரிவித்துள்ளார்.

தம்பலகாமத்துக்கு இரண்டு
தினங்களுக்கு முன்னர் இராணுவ வாகனமொன்றில் சென்ற நபர்கள் விடுதலைப்
புலிகளோடு தொடர்புடைய எவராவது அங்கு வசிக்கிறார்களா என்று தேடிச்சென்றனர்
என போரினால் பாதிக்கப்பட்ட பெண்கள் அமைப்பின் தலைவி கூறினார். மக்கள் தமது
காணாமல்போன உறவினர்கள் தொடர்பில் வெளிநாட்டு அமைப்புகளிடம் முறையிடக்கூடாது
என படையினர் எச்சரித்துச் சென்றனர் என்றும் அவர் தெரிவித்தார்.

தமது கணவன்மாரும் பிள்ளைகளும் கடத்தப்பட்டபோது அவர்களை விடுவிப்பதற்காக
தம்மிடம் கப்பம் பறித்த ஆயுதக் குழுக்களைச் சேர்ந்த பலரும் எந்தவிதமான
பிரச்சினைகளுமின்றி தமது பிரதேசங்களில் நடமாடி வருகின்றனர் எனவும் அவர்
தெரிவித்தார். கடத்தப்பட்டு காணாமல்போனவர்களின் குடும்பங்கள் பொருளாதார
ரீதியில் மிகவும் சிரமப்படுகின்றனர் எனவும் அந்தக் குடும்பங்களுக்கு
நட்டஈடு வழங்க அரச அதிகாரிகள் முன்வரவேண்டும் என்றும் பாதிக்கப்பட்ட
குடும்பங்கள் கூறுகின்றன.

2008 முதல் 2009 வரையான காலப்பகுதியில்
போர் உச்சத்தில் இருந்தபோது ஆயுதக் குழுக்களால் கடத்தப்பட்டு
காணமல்போனவர்களின் நூற்றுக்கும் அதிகமான குடும்பங்கள் தமது அமைப்பில்
அங்கம் வகிக்கின்றனர் என்றும் அவர் தெரிவித்தார்.