லயன்ஸ் அணியிடம் வீழ்ந்தது சென்னை அணி

4-வது சாம்பியன்ஸ் லீக் 20 ஓவர் கிரிக்கெட் போட்டித் தொடர் தென்னாப்பிரிக்காவில் நடைபெற்று வருகிறது. இத்தொடரில் நேற்று நடந்த லீக் ஆட்டத்தில் சென்னை சூப்பர் கிங்ஸ் அணி, ஹைவெல்ட் லயன்ஸ் அணியை எதிர்கொண்டது. இதில் டாஸ் வென்ற லயன்ஸ் அணி, சென்னை அணியை முதலில் பேட்டிங் செய்ய அழைத்தது.

அதன்படி முதலில் ஆடிய சென்னை அணியின் துவக்க ஆட்டக்காரர்கள் மெதுவான துவக்கம் அளித்தனர். விஜய் 22 ரன்னிலும், டுபிளசிஸ் 26 ரன்னிலும், பின்னர் வந்த ரெய்னா 20 ரன்னிலும் வெளியேறினர். அதிரடியாக ஆடிய கேப்டன் டோனி 34 ரன்னும், ஜடேஜா 21 ரன்னும் எடுத்தனர். இறுதியில் 20 ஓவர்கள் முடிவில் சென்னை அணி 6 விக்கெட் இழப்புக்கு 158 ரன்கள் எடுத்தது. பத்ரிநாத் 2 சிக்சர்களுடன் 27 ரன்கள் விளாசி களத்தில் இருந்தார்.

பின்னர் 159 ரன்களை இலக்காகக் கொண்டு களமிறங்கிய லயன்ஸ் அணிக்கு போலிஞ்சர் அதிர்ச்சி அளித்தார். முதல் பந்திலேயே கேப்டன் பீட்டர்சனை அவுட்டாக்கிய அவர், தனது அடுத்த ஓவரிலேயே காக்கின் விக்கெட்டையும் வீழ்த்தினார். ஆனால் மூன்றாவது விக்கெட்டுக்கு ஜோடி சேர்ந்த போடியும், மெக்கன்சியும் சிறப்பாக ஆடினர். போடி 64 ரன்னும், மெக்கென்சி 32 ரன்னும் எடுத்தனர்.

இறுதி கட்டத்தில் சைமஸ் சிறப்பாக ஆடி 39 ரன்கள் சேர்க்க, லயன்ஸ் அணி 19.3 ஓவர்களில் 4 விக்கெட் இழப்புக்கு 159 ரன்கள் எடுத்து அபார வெற்றிபெற்றது. சென்னை அணியின் நட்சத்திர சுழற்பந்துவீச்சாளர் அஷ்வின், மோர்க்கலின் பந்துவீச்சு சுத்தமாக எடுபடாமல் போனது. இந்த தோல்வியால் சென்னை அணியின் அரையிறுதி வாய்ப்பு மங்கிவிட்டது. ஆனால், வெற்றிபெற்ற லயன்ஸ் அணி தனது அரையிறுதி வாய்ப்பை ஏறக்குறைய உறுதி செய்துவிட்டது.