பென்னாகரம் இடைத்தேர்தல் : மனு தாக்கல் முடிவு

தர்மபுரி
: பென்னாகரம் தொகுதியில் வேட்பு மனு தாக்கல் இன்று மாலை 3 மணியுடன்
முடிந்தது. நேற்று வரை 23 பேர், மனு தாக்கல் செய்திருந்த நிலையில், இன்று
தர்மபுரி கலெக்டர் அலுவலகத்தில் மேலும் 2 பேர் மனு தாக்கல் செய்தனர்.
பென்னாகரம் தாலுகா அலுவலகத்தில் 12 பேர் மனு தாக்கல் செய்தனர். மொத்தம்
37 பேர் மனு தாக்கல் செய்துள்ளனர். சேலத்தை சேர்ந்த கோபால் என்பவரும் ;
சென்னையை ‌சேர்ந்த இளங்கோ என்பவரும் மனு தாக்கல் செய்தனர்.




பென்னாகரம்
இடைத்தேர்தலுக்கான தேதி அறிவிக்கப்பட்டு, மனு தாக்கல் கடந்த 3ம் தேதி
துவங்கியது. தர்மபுரி கலெக்டர் அலுவலகம், தாசில்தார் அலுவலகத்தில்
மனுக்கள் பெறப்பட்டன. தி.மு.க., சார்பில் இன்பசேகரன், அ.தி.மு.க.,
அன்பழகன், பா.ம.க., தமிழ்குமரன், தே.மு.தி.க., வக்கீல் காவேரிவர்மன்
ஆகியோர், மனு தாக்கல் செய்துள்ளனர். இதில், தே.மு.தி.க., வேட்பாளரை தவிர
மற்ற மூவரும், தலா நான்கு மனுக்கள் தாக்கல் செய்துள்ளனர். நேற்று
முன்தினம் வரை, அரசியல் கட்சி வேட்பாளர்கள் மற்றும் மாற்று வேட்பாளர்கள்
சுயேச்சைகள் உள்ளிட்ட 18 பேர், மனு தாக்கல் செய்திருந்தனர். நேற்று,
தர்மபுரியில், தேர்தல் நடத்தும் அலுவலர் மகேஸ்வரியிடம், கம்மம்பட்டியைச்
சேர்ந்த வெங்கடேசன், திப்பம்பட்டி பழனி, அன்பழகன், பந்தாரஹள்ளி முருகேசன்
உட்பட ஐந்து பேர், சுயேச்சையாக மனு தாக்கல் செய்தனர். இதனால், மனு தாக்கல்
செய்தவர்களின் எண்ணிக்கை 23 ஆனது.பென்னாகரம் தாசில்தார் அலுவலகத்தில்,
நேற்று யாரும் மனு தாக்கல் செய்யாத நிலையில், இன்று, மனு தாக்கல் செய்ய
கடைசி நாள். மனு பரிசீலனை நாளையும், வரும் 13ம் தேதி மனு வாபஸ் பெறவும்
இறுதி நாள். 13ம் தேதி மாலை, வேட்பாளர் இறுதி பட்டியல் வெளியிடப்படும்.
தேர்தல் 27 ம் தேதி நடக்கிறது.


2வது துணை வாக்காளர் பட்டியல் :
பென்னாகரம் இடைத்தேர்தல் 2வது துணை வாக்காளர் பட்டியல்
வெளியிடப்பட்டுள்ளது. பென்னாகரம் தேர்தல் இறுதி வாக்காளர் பட்டியல்
வெளியிடப்பட்ட பிறகு, பெயர் மாற்றம், முகவரி மாற்றம் ஆகிய பல்வேறு
காரணங்களால் விடுபட்டு ‌போன தங்கள் பெயரை வாக்காளர் பட்டியலில் சேர்க்க
கோரி 3000க்கும் மேற்பட்டோர் விண்ணப்பித்திருந்தனர். அவற்ற‌ை பரிசீலனை
செய்து தற்போது 2483 பேர் புதிதாக வாக்காளர் பட்டியலில்
இணைக்கப்பட்டுள்ளனர். இறுதி நிலவரப்படி ‌பென்னாகரம் இடைத்தேர்தலில்
ஓட்டளிக்க தகுதியான வாக்காளர்கள் எண்ணிக்கை 2 லட்சத்து ஆயிரத்து எட்டு
ஆகும். இவர்களில் ஆண் வாக்காளர்கள் எண்ணிக்கை : 1 லட்சத்து 2 ஆயிரத்து 892
; பெண் வாக்காளர்கள் எண்ணிக்கை 98 ஆயிரத்து 116.