2050ல் முதியோர்களே அதிக அளவில் இருப்பர்: ஐ.நா., அறிக்கையில் தகவல்

புதுடில்லி :"வரும், 2050ல், உலகில், 15 வயதுக்கு உட்பட்ட குழந்தைகளை
விட, 60 வயதை கடந்த முதியவர்களே அதிக அளவில் இருப்பர்' என, ஐ.நா., மக்கள்
தொகை நிதியம் (யு.என்.எப்.பி.ஏ.,), வெளியிட்ட அறிக்கையில்
தெரிவிக்கப்பட்டுள்ளது.

சர்வதேச முதியோர் தினம் நேற்று
அனுசரிக்கப்பட்டது. இதையொட்டி, ஐ.நா., மக்கள் தொகை நிதியம் மற்றும் ஹெல்ப்
ஏஜ் இந்தியா அமைப்புகளின் சார்பில், வெளியிடப்பட்ட அறிக்கையில்
கூறப்பட்டுள்ளதாவது:வரும், 2050ல், உலகில், 15 வயதுக்கு உட்பட்ட குழந்தைகளை
விட, 60 வயதை கடந்த முதியவர்களே அதிக அளவில் இருப்பர்; அவர்களில், ஐந்தில்
நான்கு பேர், இந்தியா போன்ற வளர்ந்து வரும் நாடுகளை சேர்ந்தவர்களாக
இருப்பர்.

தற்போது இந்தியாவில், ஒன்பது கோடி முதியோர்கள் உள்ளனர்.
இவர்களில், 75 சதவீதம் பேர் கிராமங்களில் வசிக்கின்றனர். அந்த, 75 சதவீதம்
பேரில், 48 சதவீதம் பேர், பெண்கள்; இவர்களில், 55 சதவீதம் பேர் விதவைகள்.
2050ல், இந்தியாவில், முதியோர்களின் எண்ணிக்கை, 31 கோடியே 50 லட்சமாக
இருக்கும். அதாவது, 2050ல், இந்தியாவில், முதியோர் எண்ணிக்கை, 60 சதவீதம்
கூடியிருக்கும். அதில், பெண்களே அதிகமாக இருப்பர்.இந்தியாவில், தற்போது, 80
வயதிற்கு மேற்பட்ட முதியோர்கள், 9,249 பேர் உள்ளனர். 2050ல், இந்த
எண்ணிக்கை, 44 ஆயிரமாக அதிகரிக்கும். உலகிலுள்ள, அனைத்து
முதியவர்களுக்கும், வருவாய்க்கு உத்தரவாதம் அளிப்பதும், அவர்களின்
ஆரோக்கியத்தை பேணிக்காப்பதும், அரசுகளுக்கு மிகப்பெரிய சவாலாக இருக்கும்.

இந்தியாவில்
உள்ள, முதியவர்களுக்கும் இவற்றை செய்து தர வேண்டியது, மிகவும்
முக்கியமானது.ஏனெனில், இந்தியாவில் அமைப்பு சாரா துறைகளில், ஏராளமானவர்கள்
பணிபுரிகின்றனர். அவர்களுக்கு, சமூக ரீதியான பாதுகாப்பு எதுவும்
வழங்கப்படவில்லை. எனவே, வயதான காலத்தில், முதியோர்களுக்கு வருமான
உத்தரவாதம் வழங்கப்படுவதோடு, அவர்கள், ஏழ்மையில் வாடுவதைத் தவிர்க்க,
விலைவாசிக்கேற்ற ஓய்வூதியமும் வழங்கப்பட வேண்டும்.இவ்வாறு அறிக்கையில்
தெரிவிக்கப்பட்டுள்ளது.


ஜனாதிபதி யோசனை
சர்வதேச
முதியோர் தினத்தையொட்டி, "ஹெல்ப் ஏஜ் இந்தியா' அமைப்பு, டில்லியில் நேற்று
ஏற்பாடு செய்திருந்த விழாவில், பேசிய ஜனாதிபதி பிரணாப் முகர்ஜி
கூறியதாவது:ஐ.நா., அமைப்பும், ஹெல்ப் ஏஜ் இந்தியா அமைப்பும் வெளியிட்ட
அறிக்கையின், முடிவுகளை பார்த்த பிறகாவது, முதியோர் அனுபவித்து வரும்
வேதனைகளை களைய இளைஞர்களும், தன்னார்வ தொண்டு நிறுவனங்களும் முன் வர
வேண்டும்.முதியோர்களும், வயதான காலம் என்பதை, ஓய்வு பெறும் காலமாக
கருதாமல், வாழ்வின், "இரண்டாவது இன்னிங்ஸ்' ஆக கருதி, சமுதாய சேவையில்
தங்களை ஈடுபடுத்தி கொள்ள வேண்டும். இவ்வாறு பிரணாப் முகர்ஜி கூறினார்.