நவம்பர் 12ல் ஸ்பெக்ட்ரம் ஒதுக்கீடு ஏலம் டேவணி தொகை ரூ.1,332 கோடி நிர்ணயம்

by **KAPILS** Mon Oct 01, 2012 9:15 pm

2ஜி ஸ்பெக்ட்ரம் அலைக்கற்றை ஒதுக்கீடு ஏலம், நவம்பர் 12ம் தேதி துவங்குகிறது. இந்த ஏலத்தில் பங்கேற்கும் நிறுவனங்கள், குறைந்த பட்ச டேவணித் தொகையாக, 1,332 கோடி ரூபாய் செலுத்த வேண்டும்' என, தெரிவிக்கப்பட்டுள்ளது.

"2ஜி' ஸ்பெக்ட்ரம் ஒதுக்கீட்டில், ஏராளமான அளவில் முறைகேடுகள் நடந்ததாக புகார் தெரிவிக்கப்பட்டது. இது தொடர்பான வழக்கை விசாரித்த, சுப்ரீம் கோர்ட், 122 நிறுவனங்களுக்கு வழங்கப்பட்ட, ஸ்பெக்ட்ரம் உரிமங்களை ரத்து செய்தது. "புதிதாக ஏலம் நடத்தி, ஸ்பெக்ட்ரம் அலைக்கற்றை ஒதுக்கீடு செய்ய வேண்டும்' என, உத்தரவிட்டது.இதையடுத்து, ஸ்பெக்ட்ரத்தை ஏலம் விடுவதற்கான நடவடிக்கைகளை, மத்திய அரசு துவக்கியுள்ளது. இது தொடர்பான விண்ணப்ப அழைப்பு நோட்டீசை, தொலைத்தொடர்புத் துறை சமீபத்தில் வெளியிட்டது. அதில், ஏலம் தொடர்பான வழிகாட்டிக் குறிப்புகளும் இடம் பெற்றுள்ளன.

அதில், தெரிவிக்கப்பட்டுள்ளதாவது:

சுப்ரீம் கோர்ட் உத்தரவின்படி, ஸ்பெக்ட்ரம் உரிமங்கள் ரத்தான தொலைத்தொடர்பு நிறுவனங்கள், ஏலத்தில் பங்கேற்றால், அவை புதிய நிறுவனங்களாகவே கருதப்படும். நவம்பர் 12ம் தேதி நடக்கும், ஸ்பெக்ட்ரம் ஏலத்தில், பங்கேற்கும் நிறுவனங்கள், குறைந்தபட்ச டேவணித் தொகையாக, 1,332 கோடி ரூபாய் செலுத்த வேண்டும்.மொபைல் போன் சேவையில் புதிதாக ஈடுபட விரும்பும் நிறுவனங்கள், ஸ்பெக்ட்ரம் ஒதுக்கீட்டில், 800 மெகா ஹெட்ஸ் பாண்ட் பிரிவில், ஒன்றுக்கு மேற்பட்ட ஒதுக்கீடுகளைப் பெற வேண்டும். அதற்காகவே, 1,332 கோடி ரூபாய் டேவணித் தொகையாக வசூலிக்கப்படுகிறது. இருந்தாலும், ராஜஸ்தான் வட்டத்தில், ஸ்பெக்ட்ரம் எதுவும் கிடையாது.இவ்வாறு வழிகாட்டிக் குறிப்பில் தெரிவிக்கப்பட்டுள்ளது.

இதற்கிடையில், ஸ்பெக்ட்ரம் தொடர்பான, அமைச்சர்கள் அடங்கிய அதிகாரக் குழுவின் கூட்டம், வரும், 3ம் தேதி, நிதி அமைச்சர் சிதம்பரம் தலைமையில் நடக்கிறது. அப்போது, தற்போதுள்ள தொலைத்தொடர்பு நிறுவனங்களிடம், ஒரே கட்டமாக, ஸ்பெக்ட்ரம் கட்டணம் வசூலிப்பது குறித்து முடிவு செய்யப்படுகிறது.