"சூப்பர்' மலிங்கா! * இலங்கை "திரில்' வெற்றி * நியூசி., போராட்டம் வீண்

பல்லேகெலே:"டுவென்டி-20'
உலக கோப்பை பரபரப்பான போட்டியில் இலங்கை அணி "சூப்பர் ஓவர்' முறையில்
"திரில்' வெற்றி பெற்றது. "சூப்பர் ஓவரில்' அசத்திய "வேகப்புயல்' மலிங்கா,
வெற்றிநாயகனாக ஜொலித்தார். நியூசிலாந்து அணியின் போராட்டம் வீணானது.
இலங்கையில்,
நான்காவது "டுவென்டி-20' உலக கோப்பை கிரிக்கெட் தொடர் நடக்கிறது.
பல்லேகெலே மைதானத்தில் நேற்று நடந்த "சூப்பர்-8' சுற்று பிரிவு-1
போட்டியில் இலங்கை, நியூசிலாந்து அணிகள் மோதின. "டாஸ்' வென்ற நியூசிலாந்து
கேப்டன் ராஸ் டெய்லர், "பேட்டிங்' தேர்வு செய்தார்.
நிகோல் அரைசதம்:
நியூசிலாந்து
அணிக்கு நிகோல், கப்டில் ஜோடி நிதான துவக்கம் கொடுத்தது. இந்த ஜோடி முதல்
விக்கெட்டுக்கு 57 ரன்கள் சேர்த்த போது கப்டில் (38) அவுட்டானார். பிரண்டன்
மெக்கலம் (25) பெரிய அளவில் சோபிக்கவில்லை. அபாரமாக ஆடிய நிகோல், அஜந்தா
மெண்டிஸ் சுழலில் அடுத்தடுத்து இரண்டு சிக்சர் அடித்து, அரைசதம் அடித்தார்.
இவர் 58 ரன்களுக்கு வெளியேறினார். கேப்டன் ராஸ் டெய்லர் (23) ஓரளவு ரன்
சேர்த்தார்.
அடுத்து வந்த ஜேக்கப் ஓரம் (6), நாதன் மெக்கலம் (3),
வில்லியம்சன் (4) ஏமாற்றினர். நியூசிலாந்து அணி 20 ஓவரில் 7
விக்கெட்டுக்கு 174 ரன்கள் எடுத்தது.
அதிரடி துவக்கம்:
சவாலான
இலக்கை விரட்டிய இலங்கை அணிக்கு கேப்டன் மகிளா ஜெயவர்தனா, தில்ஷன் ஜோடி
அதிரடி துவக்கம் கொடுத்தது. நாதன் மெக்கலம் வீசிய முதல் ஓவரில் 17 ரன்கள்
கிடைத்தது. முதல் விக்கெட்டுக்கு 80 ரன்கள் சேர்த்த போது ஜெயவர்தனா (44)
வெளியேறினார். சங்ககரா (21) ஓரளவு கைகொடுத்தார். அதிரடி காட்டிய தில்ஷன்,
தனது 6வது அரைசதம் அடித்தார். இவர் 76 ரன்களுக்கு "ரன்-அவுட்' ஆனார்.
ஆட்டம் "டை':
"மிடில்-ஆர்டரில்'
களமிறங்கிய பெரேரா (5) ஏமாற்றினார். இலங்கை அணியின் வெற்றிக்கு கடைசி
ஓவரில் 8 ரன்கள் தேவைப்பட்டது. டிம் சவுத்தி வீசிய முதல் மூன்று பந்தில்
தலா ஒரு ரன் கிடைத்தது. நான்காவது பந்தை கோட்டைவிட்ட திரிமான்னே, 5வது
பந்தை பவுண்டரிக்கு விரட்டி ஆட்டத்தில் திருப்பம் ஏற்படுத்தினார். இதனால்
கடைசி பந்தில் ஒரு ரன் தேவைப்பட்டது. திரிமான்னே ஓடினார். இந்த நேரத்தில்
ராஸ் டெய்லர் கையில் இருந்து நழுவிய பந்து "பெயில்சை' தகர்த்தது. இது
தொடர்பாக சந்தேகம் எழ, பல முறை "ரீப்ளே' பார்க்கப்பட்டது. இறுதியில்
திரிமான்னே (5) "ரன்-அவுட்' ஆனார். இலங்கை அணி 20 ஓவரில் 6 விக்கெட்டுக்கு
174 ரன்கள் எடுத்தது. இரு அணிகளும் ஒரே ஸ்கோர் எடுக்க போட்டி "டை' ஆனது.
"சூப்பர் ஓவர்':
இதனால்
போட்டியின் முடிவு "சூப்பர் ஓவர்' முறைக்கு சென்றது. இதில் இரு
அணிகளுக்கும் ஒரு ஓவர் வழங்கப்படும். 3 பேர் பேட் செய்யலாம். நியூசிலாந்து
சார்பில் டிம் சவுத்தி பந்துவீசினார். இலங்கை அணி 13 ரன்கள் எடுத்தது.
பின்
14 ரன்கள் எடுத்தால் வெற்றி என்ற நிலையில் நியூசிலாந்து களமிறங்கியது.
இலங்கை தரப்பில் மலிங்கா "வேகத்தில்' மிரட்டினார். மார்டின் கப்டிலை (3)
அவுட்டாக்கி அசத்தினார். பிரண்டன் மெக்கலம் சொதப்பினார். 7 ரன்கள் மட்டுமே
விட்டுக் கொடுத்த மலிங்கா, அணிக்கு வெற்றி தேடித் தந்தார். நியூசிலாந்து
அணி ஒரு ஓவரில் 7 ரன்கள் மட்டுமே எடுத்து தோல்வி அடைந்தது. ஆட்ட நாயகன்
விருதை தில்ஷன் பெற்றார்.
ஆயிரம் ரன்கள்
இலங்கை
கேப்டன் மகிளா ஜெயவர்தனா, தனது 2வது ரன்னை கடந்த போது சர்வதேச
"டுவென்டி-20' போட்டியில் 1000 ரன்கள் என்ற புதிய மைல்கல்லை எட்டினார்.
நியூசிலாந்துக்கு எதிராக 44 ரன்கள் எடுத்த இவர், இதுவரை 40 போட்டியில் ஒரு
சதம், 6 அரைசதம் உட்பட 1042 ரன்கள் எடுத்துள்ளார்.
* தவிர இவர்,
சர்வதேச "டுவென்டி-20' போட்டி வரலாற்றில் ஆயிரம் ரன்களை கடந்த நான்காவது
வீரர் என்ற பெருமை பெற்றார். முன்னதாக நியூசிலாந்தின் பிரண்டன் மெக்கலம்
(1623), இங்கிலாந்தின் கெவின் பீட்டர்சன் (1176), ஆஸ்திரேலியாவின் டேவிட்
வார்னர் (1032) ஆகியோர் இச்சாதனை படைத்தனர்.
* அபாரமாக ஆடிய
மற்றொரு இலங்கை வீரர் தில்ஷன், தனது 44வது ரன்னை கடந்த போது, சர்வதேச
"டுவென்டி-20' போட்டியில் 1000 ரன்கள் எடுத்த வீரர்கள் பட்டியலில்
இணைந்தார். இந்த இலக்கை எட்டிய ஐந்தாவது வீரரானார். மொத்தம் 76 ரன்கள்
எடுத்த இவர், 41 போட்டியில் ஒரு சதம், 6 அரைசதம் உட்பட 1031 ரன்கள்
எடுத்துள்ளார்.
100வது சிக்சர்
நியூசிலாந்தின்
பிராங்க்ளின் வீசிய போட்டியின் 19வது ஓவரின் முதல் பந்தை சிக்சருக்கு
பறக்கவிட்டார் தில்ஷன். இது, இத்தொடரின் 100வது சிக்சராக அமைந்தது.
இரண்டாவது "டை'
நேற்றைய
இலங்கை, நியூசிலாந்து அணிகளுக்கு இடையிலான "சூப்பர்-8' போட்டி "டை' ஆனது.
இது "டுவென்டி-20' உலக கோப்பை வரலாற்றில் "டை'யில் முடிந்த இரண்டாவது
போட்டி. முன்னதாக 2007ல் இந்தியா-பாகிஸ்தான் இடையிலான லீக் போட்டி "டை'
ஆனது. இதில் "பவுல் அவுட்' முறையில் இந்தியா வெற்றி பெற்றது.
* இப்போட்டி, சர்வதேச "டுவென்டி-20' அரங்கில் "டை'யில் முடிந்த ஏழாவது போட்டி.
சபாஷ் தனன்ஜயா
இலங்கை
அணியின் இளம் வீரர் தனன்ஜயா, 18. சர்வதேச போட்டியில் விளையாடாத இவரை,
"டுவென்டி-20' உலக கோப்பை தொடருக்கு தேர்வு செய்தது தொடர்பாக சர்ச்சை
எழுந்தது. நேற்று, நியூசிலாந்துக்கு எதிரான "சூப்பர்-8' போட்டியில்
அறிமுகமானார். இப்போட்டியின் 12வது ஓவரை வீசினார். அப்போது முதல் பந்தை
நிகோல் தூக்கி அடிக்க, பந்து இவரது கன்னத்தில் பலமாக தாக்கியது. காயம்
பெரிய அளவில் இல்லை. உடனடியாக சிகிச்சை மேற்கொண்ட இவர், வலியை
பொருட்படுத்தாது துல்லிய பந்துவீசி மொத்தம் இரண்டு விக்கெட் வீழ்த்தினார்.
இதன்மூலம் கேப்டன் ஜெயவர்தனா, இவர் மீது வைத்திருந்த நம்பிக்கையை பூர்த்தி
செய்து, தேர்வை நியாயப்படுத்தினார்.