"ஆயுதமுனையில் அழைத்துவரப்பட்ட மக்கள் மரங்களின் கீழ் தங்க வைக்கப்பட்டுள்ளனர்"

by **மாலதி** Wed Sep 26, 2012 7:38 am

"ஆயுதமுனையில் அழைத்துவரப்பட்ட மக்கள் மரங்களின் கீழ் தங்க வைக்கப்பட்டுள்ளனர்"

மீழ்குடியேற்றம் முடிவடைந்துவிட்டதாக சர்வதேச சமூகத்தை ஏமாற்றுவதற்காக
முகாமில் இருந்த மக்களை ஆயுத முனையில் மிரட்டி அழைத்து வந்து முல்லைத்தீவு
மாவட்டத்தில் மரங்களின் கீழ் எந்தவிதமான அடிப்படை வசதிகளும் இன்றி தவிக்க
விட்டுள்ளனர். நலன்புரி முகாமில் தங்கியிருந்த கேப்பாபிலவு, மந்துவில்
கிராமங்களைச் சேர்ந்த 361 குடும்பங்களே நேற்றுத் திங்கட்கிழமை
இராணுவத்தினரால் வற்றாப்பளைக்கு கொண்டுவரப்பட்டன.பலவந்தமாக இந்தக்
குடும்பங்கள் முல்லைத்தீவு மாவட்டத்தின் கைவேலி மற்றும் வற்றாப்பளை மகா
வித்தியாலயம் ஆகிய இடங்களில் எந்தவித அடிப்படை வசதிகளும் இன்றித்
தங்கவைக்கப்பட்டுள்ளன.

நேற்றுக்காலை செட்டி குளம் நலன்புரி
நிலையத்துக்குச் சென்ற இராணுவத்தினரும் அரச அதிகாரிகளும் அங்கிருந்த
மக்களை வெளியேற்றுவதற்கான நடவடிக்கைகளை மேற்கொண்டனர். அங்கிருந்த மக்கள்
பஸ்களில் ஏற்றப்பட்டார்கள். அவர்களுடைய பொருள்கள் அனைத்தும் லொறிகளில்
ஏற்றப்பட்டன.

முதலில் மந்துவில்
கிராமத்தைச் சேர்ந்த குடும்பங்கள் அங்கிருந்து பிற்பகல் ஒரு மணியளவில்
முல்லைத்தீவு நோக்கிக் கொண்டு செல்லப்பட்டனர். இந்தக் குடும்பங்கள்
புதுக்குடியிருப்பு கைவேலி என்ற இடத்தில் மர நிழல்களின் கீழ் நேற்று மாலை 5
மணியளவில் இறக்கிவிடப்பட்டன.

அந்தக் குடும்பங்கள் தொடர்ந்து
நேற்று இரவு முழுவதும் மர நிழல்களிலேயே தமது பொழுதைக் கழித்தனர். இந்த
மக்களுக்கான உணவு வசதிகளை முல்லைத்தீவு மாவட்ட செயலகம் ஏற்பாடு செய்ததாகத்
தெரிவிக்கப்பட்டது. எனினும் ஏனைய அடிப்படை வசதிகள் மேற்கொள்ளப்படாமையால்
அந்தக் குடும்பங்கள் பெரும் நிர்க்கதியான நிலையில் அவலப்பட்டுக்
கொண்டிருந்தன.

இதன்பின்னர் பிற்பகல் 1.30 மணியளவில் கேப்பாபுலவு
கிராமத்தைச் சேர்ந்த 110 குடும்பங்கள் செட்டிகுளம் முகாமில் இருந்து
ஏற்றிவரப்பட்டனர். இந்த மக்கள் வற்றாப்பளை மகா வித்தியாலயத்தில் தங்க
வைக்கப்பட்டனர். இவர்களுக்கும் உணவு வசதி மாத்திரமே
ஏற்படுத்தப்பட்டிருந்தது. ஏனைய அடிப்படை வசதிகள் இல்லாமையால் அங்கு
பெண்களும், சிறுவர்களும் பெரும் சிரமங்களை எதிர்நோக்கியுள்ளதாகத்
தெரிவிக்கப்பட்டது
தம்மை சொந்த இடங்களான கேப்பாபுலவு, மந்துவில்
பகுதிகளில் இன்று குடியமர்த்துவதற்கு ஏற்பாடுகள் செய்யப்பட்டுள்ளதாக
முல்லைத்தீவு மாவட்ட செயலகத்தினர் தம்மிடம் கூறியதாக அந்த மக்கள்
தெரிவித்தனர்.
செட்டிகுளம் அகதி முகாமில் இருந்து மக்களை வெளியேற்றிய
பின்னர் அங்கிருந்த அனைத்துக் கட்டடங்களையும் படையினர் தகர்த்து
நிர்மூலமாக்கியதாக மக்கள் தெரிவித்தனர்