விளம்பரத்திற்காக ரூ.100 கோடி செலவிடுகிறது மத்திய அரசு

by **mmani** Mon Sep 24, 2012 8:24 am

புதுடில்லி:டீசல் விலை உயர்வு, சில்லரை வர்த்தகத்தில் அன்னிய முதலீட்டுக்கு
அனுமதி போன்ற முடிவுகளை, மக்களிடம் நியாயப்படுத்தும் வகையில், 100 கோடி
ரூபாய் செலவில், ஊடகங்களில் விளம்பரப்படுத்தும் நடவடிக்கைகளை, மத்திய அரசு
துவங்கியுள்ளது.

பொருளாதார நெருக்கடியால், சிக்கன நடவடிக்கைகளை
அமல்படுத்த வேண்டிய நேரத்தில், விளம்பரத்துக்காக, அரசு பணத்தை வாரி
இறைப்பதற்கு, எதிர்க்கட்சிகள் கடும் கண்டனம் தெரிவித்துள்ளன.

சர்வதேச
சந்தையில் கச்சா எண்ணெய் விலை உயர்ந்ததால், சமீபத்தில் டீசல் விலையை,
லிட்டருக்கு, ஐந்து ரூபாய் அதிகரித்தது, மத்திய அரசு. சில்லரை
வர்த்தகத்தில் அன்னிய முதலீட்டுக்கும், அனுமதி அளித்தது.அரசின், இந்த
முடிவுகளுக்கு எதிராக, போராட்டம் வெடித்ததை அடுத்து, இதுகுறித்து, நாட்டு
மக்களுக்கு உரையாற்றிய, பிரதமர் மன்மோகன் சிங், "சர்வதேச அளவில், கடும்
பொருளாதார நெருக்கடி ஏற்பட்டுள்ளது. இதனால், நமக்கு பாதிப்பு ஏற்படாமல்
இருக்க, சில சீர்திருத்தங்களை மேற்கொள்ள வேண்டியது, அவசியம்' என, அரசின்
முடிவை நியாயப்படுத்தினார்.ஆனாலும், இந்த விவகாரத்தில், ஐ.மு., கூட்டணி
அரசுக்கு, நாளுக்கு நாள், நெருக்கடி அதிகரித்து வருகிறது. திரிணமுல்
காங்கிரஸ், மத்திய அரசுக்கு அளித்து வந்த ஆதரவை வாபஸ் பெற்றுள்ளதால்,
காங்கிரஸ் கட்சி அதிர்ந்து போயுள்ளது. அரசுக்கு, வெளியில் இருந்து ஆதரவு
அளித்து வரும், சமாஜ்வாதி, பகுஜன் சமாஜ் கட்சிகள், எந்த நேரத்திலும், காலை
வாரலாம் என்ற நிலை உள்ளது.

குஜராத், இமாச்சல பிரதேசம் உள்ளிட்ட
மாநிலங்களில், விரைவில் சட்டசபை தேர்தல்கள் நடக்கவுள்ளன. அதைத் தொடர்ந்து,
2014ல் லோக்சபா தேர்தலும் நடக்கவுள்ளது. தற்போது எடுக்கப்பட்டுள்ள
முடிவால், தேர்தலில், தங்களுக்கு பெரிய அளவில் பாதிப்பு வருவதைத்
தடுப்பதற்காக, மத்திய அரசு, அவசர நடவடிக் கைகளில் இறங்கியுள்ளது.இதன் முதல்
கட்டமாக, அரசின் நடவடிக்கைகளை, மக்களிடம் நியாயப்படுத்தும் வகையிலும்,
அரசின் திட்டங்கள் மற்றும் கொள்கைகளை, பிரசாரம் செய்யும் வகையிலும், 100
கோடி ரூபாய் செலவில், ஊடகங்களில் விளம்பரம் செய்யத் திட்டமிட்டுள்ளதாக,
தகவல்கள் வெளியாகியுள்ளன.

இதை உறுதிப்படுத்தும் வகையில் கடந்த
வாரம், முன்னணி ஆங்கிலப் பத்திரிகைகளில், சீர்திருத்த நடவடிக்கைகளை
நியாயப்படுத்தி, விளம்பரங்கள் கொடுக்கப்பட்டிருந்தன. இதைத் தொடர்ந்து,
மக்களுக்கு பயனளிக்கக் கூடிய திட்டங்களைச் செயல்படுத்தி வருவதாக, "டிவி'
சேனல்களில் விளம்பரம் வெளியிடப்பட்டு வருகிறது.அடுத்த கட்டமாக, விரைவில்
சட்டசபை தேர்தல்கள் நடக்கவுள்ள, குஜராத் உள்ளிட்ட மாநிலங்களில், அந்தந்த
மாநில மொழி நாளிதழ்களில், விளம்பரம் கொடுக்கவும் முடிவு செய்யப்பட்டதாக,
தகவல் வெளியாகியுள்ளது.இதையடுத்து, தேர்தலில் ஆதாயம் அடைவதற்காக, மக்களின்
வரிப் பணத்தை, காங்கிரஸ் கட்சி வீணடித்து வருவதாக, எதிர்க்கட்சிகள் குற்றம்
சாட்டியுள்ளன.

பா.ஜ., மூத்த தலைவர் யஷ்வந்த் சின்கா கூறியதாவது:நிதிப்
பற்றாக்குறை ஏற்பட்டுள்ளதாகவும், அதை சமாளிக்கவே, சீர்திருத்த
நடவடிக்கைகளை மேற்கொண்டுள்ளதாகவும், பிரதமர் கூறுகிறார். சிக்கன
நடவடிக்கைளை மேற்கொள்ளவும் அவர் வலியுறுத்துகிறார். ஆனால், தங்களின் சுய
புராணத்தைப் பாடுவதற்காக, அரசு தரப்பில் மட்டும், பல கோடி ரூபாயை,
விளம்பரம் என்ற பெயரில் வீணடிக்கின்றனர். டீசல் விலையை உயர்த்தி, மக்கள்
மீது சுமையை ஏற்றுவதற்கு முன், அரசு நிர்வாகத்தில் உள்ளவர்கள்,
சிக்கனத்தைப் பின்பற்ற வேண்டும்.இவ்வாறு யஷ்வந்த் சின்கா கூறினார்.

பார்லிமென்ட் விவகாரத் துறை இணை அமைச்சர் ராஜிவ் சுக்லா கூறியதாவது:அரசின்
கொள்கைகளையும், திட்டங்களையும், ஒரு சிலர், மக்களிடம் தவறாக பிரசாரம்
செய்கின்றனர். மக்களுக்கு பயனளிக்கும் திட்டங்களை எதிர்ப்பதன் மூலம்,
அவர்கள், மக்களின் நலனுக்கு எதிராகச் செயல்படுகின்றனர். எனவே, தங்களுக்கான
திட்டங்களை மக்கள் அறிந்து கொள்ள வேண்டியது அவசியம். அதற்கான கடமை,
அரசுக்கு உள்ளது. இதற்காகத் தானே, தகவல் தொடர்பு, ஒளிபரப்பு போன்ற துறைகள்
செயல்படுகின்றன.இவ்வாறு ராஜிவ் சுக்லா கூறினார்.