அரை நூற்றாண்டு கண்ட அற்புத நூலகம்!

by **ஜனனி** Tue Sep 18, 2012 6:25 pm

மனிதனின் அறிவு வளர்ச்சிக்கு நூலகம் எவ்வளவு முக்கியம்
என்பதை இன்று எல்லோரும் உணர்ந்துகொண்டு இருக்கிறோம். ஆனாலும், நகரங்களில்
உள்ள அளவுக்கு நூலகத்தின் அறிமுகமும் பயன்பாடும் இன்னமும் கிராமங்களில்
முழு அளவை எட்டவில்லை. ஆனால், வெறும் விவசாயத்தை மட்டுமே அறிந்திருந்த
கீழத் தஞ்சை மாவட்டத்தில் உள்ள செம்பனார்கோவில் அருகில் இருக்கும்
மேலப்பாதியில் 1946-ம் ஆண்டிலேயே நூலகம் ஒன்று திறக்கப்பட்டு இன்று வரை
இயங்கிவருகிறது என்பது எவ்வளவு ஆச்சர்யமான விஷயம்.

மேலப்பாதி திரு.வி.க. நூலகம் என்றால், திரு.வி.க., மு.வரதராஜனில்
ஆரம்பித்து இன்று இருக்கிற தமிழறிஞர்கள் வரை அனைவருக்கும் தெரியும்.
திரு.வி.க. நூலகம் அர்ப்பணிப்பின் அடையாளம். அந்த அர்ப்பணிப்புக்கு
சொந்தக்காரர் சு.பாலகிருஷ்ணன் என்ற 87 வயது முதியவர்.

அரை நூற்றாண்டு கண்ட அற்புத நூலகம்! Library-4

நூலகத்தின் கீழ்த்தளம் துள்ளிக் குதித்தோடும் சிறுவர்களின் தொடக்கப்
பள்ளியாகத் திகழ... அழகான அந்தக் கட்டடத்தின் மேல்தளத்தில் காற்றோட்டம்
நிறைந்த சூழலில் அமைந்து இருக்கிறது நூலகம். தன்னுடைய ஆராய்ச்சி
படிப்பைப் பற்றி பாலகிருஷ்ணனிடம் சொல்லிக்கொண்டு இருக்கிறார்
மயிலாடுதுறையில் இருந்துவந்த ஒரு பெண்மணி. அதைக் காதுகொடுத்துக் கேட்ட அந்த
முதியவர் பெண்மணியை அழைத்துச் சென்று ஒரு அலமாரியில் இருந்து பல
நூல்களையும் எடுத்துத் தருகிறார். ''இவை எல்லாமே உன்னுடைய ஆராய்ச்சிக்கு
உதவும்'' என்கிறார். இத்தனைக்கும் பாலகிருஷ்ணன் படித்திருப்பது எட்டாம்
வகுப்பு வரைதான்.

வரலாறு, அரசியல், பொதுவுடமை, கதைகள், சிறுகதைகள், நாவல்கள், வாழ்க்கை
வரலாறு, தொழில் என்று எல்லாவிதமான தலைப்புகளிலும் படிக்கக் கிடைக்கின்றன
புத்தகங்கள். பூம்புகார் கல்லூரி, தருமபுர ஆதீன கல்லூரி, ஏ.வி.சி. கல்லூரி
என்று சுற்றுவட்டாரக் கல்லூரி மாணவர்கள், பேராசிரியர்கள் மற்றும் பள்ளி
ஆசிரியர்கள் தங்களுக்குத் தேவையான புத்தகங்களுக்காக இங்குதான்
வருகிறார்கள்.

அரை நூற்றாண்டு கண்ட அற்புத நூலகம்! Library-3

அரை நூற்றாண்டு கண்ட அற்புத நூலகம்! Library-5%281%29

''
இளம் பிராயத்தில் எங்கள் வீட்டில் நானும் என் நண்பர்களான கோவிந்தராஜன்,
மாரியப்பன் ஆகிய மூவரும் சேர்ந்து பேசிக்கொண்டு இருப்போம். நாங்கள்
எட்டாம் வகுப்பு வரை படித்தவர்கள். அப்போது வந்துகொண்டு இருந்த நாளிதழ்களான
தினமணி, நவசக்தி, சுதேசமித்திரன் ஆகியவற்றை வாங்கிப் படிப்போம்.
செம்பனார்கோவிலில் இருந்த சிட்ஃபண்ட் ஒன்றில் நான் வேலை பார்த்ததால் நிறைய
மனிதர்கள் பழக்கமானார்கள். அவர்களிடம் இருந்து கதைப் புத்தகங்கள்
வாங்கிவந்து படிப்போம். இங்கே ஒரு நூலகத்தை அமைத்தால் எல்லோரும் படிக்க
உதவியாக இருக்குமே என்று முடிவு செய்து எங்கள் வீட்டு திண்ணையில் 1946-ம்
ஆண்டு நூலகத்தைத் தொடங்கினோம். அப்போது எங்களிடம் இருந்த புத்தகங்கள் 46
மட்டுமே. கொஞ்சம் கொஞ்சமாகப் புத்தகம் சேர ஆரம்பித்தது. தெரிந்தவர்களின்
பிறந்த நாள், திருமணம், நினைவு தினம் அன்று அவர்களைப் புத்தகங்கள்
வாங்கித்தரச் சொன்னோம். சுதந்திர தினம், குடியரசு தினம் என்று விழாக்கள்
வந்தாலும் அதற்குப் புத்தகப் பரிசுதான்.

அரை நூற்றாண்டு கண்ட அற்புத நூலகம்! Library-1

காந்தி பிறந்த நாள் வந்தால், காந்தி நூலகத்தில் 75 சதவிகித கழிவில்
புத்தகம் தருவார்கள். அண்ணா பிறந்த நாளுக்குத் தமிழ்ப் பல்கலைக்கழகத்தில்
50 புத்தகங்கள் இலவசமாகத் தருவார்கள். சமயங்களில் பாதி விலைக்கும்
தருவார்கள். தருமபுரம், திருவாவடுதுறை, திருப்பனந்தாள் ஆதீனங்களில்
புத்தகங்கள் இலவசமாகவும் கழிவிலும் தருவார்கள். எதிர்பார்த்து இருந்து
சரியான நேரத்துக்குப் போய் அதைவாங்கி வருவோம். அதுதவிர நர்மதா பதிப்பகம்,
பொள்ளாச்சி மகாலிங்கம் ஆகியோர், புத்தகங்கள் தந்து இருக்கிறார்கள்.
இன்று 19,000 புத்தகங்கள் இருக்கின்றன'' என்று மூச்சு விடாமல் சொல்லி
முடித்தார்.

அரை நூற்றாண்டு கண்ட அற்புத நூலகம்! Library-2

அரை நூற்றாண்டு கண்ட அற்புத நூலகம்! Library-2

1946-ல்
ஆரம்பித்த தன்னுடைய பயணத்தை இன்னும் நிறுத்தவே இல்லை இவர். எட்டாம்
வகுப்பு முடித்து ஆசிரியர் பயிற்சி பெற்று ஆசிரியராகப் பணியில் சேர்ந்த
பாலகிருஷ்ணன், பின்பு பதினொன்றாம் வகுப்புத் தேர்வையும் எழுதித் தேர்ச்சி
பெற்றார். பள்ளி, நூலகம் இரண்டும்தான் அவருடைய வாழ்க்கை. மனைவி
இருக்கும்வரை மேலப்பாதியில் தங்கி இருந்த இவர் இப்போது மயிலாடுதுறையில்
இருக்கும் தன்னுடைய மகன் வீட்டில் தங்கி இருக்கிறார்.

இந்த நூலகத்தைப் பற்றிப் பாராட்டாதவர்களே இல்லை. ஐ.நா. பண்பாட்டுக்
கழகம் வெளியிட்டு இருக்கும் நூலக இதழில்கூட இந்த நூலகத்தினைப் பற்றிய
குறிப்பு இடம் பெற்றிருக்கிறது. நூலகத்தில் உள்ள லெட்டர் பேடில்
திரு.வி.க. தன்னுடைய கையெழுத்தைப் போட்டு தந்திருக்கிறார். நூலகத்துக்கு
வந்த டாக்டர் மு.வ-வும் அறிஞர் கி.ஆ.பெ.விசுவநாதனும் இவருடைய மூத்த
மகனுக்கு பாரதி என்று பெயர் சூட்டி இருக்கிறார்கள்.

மற்ற இரண்டு நண்பர்களும் இறந்துபோனபின்பும் தன்னுடைய உறுதி இழக்காமல்
இன்றுவரை அறிவுக் கோயிலைப் பாதுகாத்து வருகிறார். இந்தக் கருத்துப்
பெட்டகம் காலம் கடந்து நிலைத்து இருக்கும் என்பதில் எந்தச் சந்தேகமும்
இல்லை!

- கரு.முத்து
நன்றி :http://en.vikatan.com/article.php?aid=23917&sid=671&mid=33