மத்திய அமைச்சகங்களில் 1,400 ஊழல் புகார்கள் நிலுவை

by **அருள்** Thu Sep 06, 2012 7:57 am

புது
தில்லி, செப். 5: பல்வேறு மத்திய அமைச்சகங்களில் 1,400-க்கும் மேற்பட்ட
ஊழல் புகார்கள் மூன்று மாதங்களுக்கும் மேலாக, அறிக்கை சமர்ப்பிக்கப்படாமல்
நிலுவையில் இருப்பதாக மத்திய அரசு தெரிவித்துள்ளது. மக்களவையில்
எழுப்பப்பட்ட பல்வேறு கேள்விகளுக்கு சம்பந்தப்பட்ட துறை தொடர்பான
அமைச்சர்கள் புதன்கிழமை எழுத்து மூலம் அளித்த பதில் விவரம்:மத்திய
இணை அமைச்சர் வி.நாராயணசாமி கூறியது: மத்திய ஊழல் கண்காணிப்பு ஆணையத்துக்கு
வரும் ஊழல் தொடர்பான புகார்கள் சம்பந்தப்பட்ட அமைச்சகம், துறை மற்றும்
நிறுவனங்களுக்கு அனுப்பி வைக்கப்படும். இந்த புகார்கள் மீது விசாரணை
நடத்தி, மூன்று மாதங்களுக்குள் ஆணையத்திடம் அறிக்கை சமர்ப்பிக்க வேண்டும்.ஆனால்,
கடந்த 2011-ம் ஆண்டு டிசம்பர் 31-ம் தேதி நிலவரப்படி, பல்வேறு துறை
சார்ந்த அமைச்சகங்கள் மற்றும் துறைகளுக்கு விசாரணைக்காக அனுப்பி
வைக்கப்பட்ட 1,406 ஊழல் புகார்கள் மூன்று மாதங்களுக்கும் மேலாக அறிக்கை
சமர்ப்பிக்கப்படாமல் நிலுவையில் உள்ளன.ஆயுள்கால செல்போன் சேவை
தொடரும்: மத்திய தொலைத் தொடர்புத் துறை இணை அமைச்சர் மிலிந்த் தியோரா
கூறியது: செல்போன் நிறுவனங்கள், ஆயுள் கால திட்டத்தின் கீழ் சேர்ந்த
வாடிக்கையாளர்களுக்கு ஏற்கெனவே அந்த திட்டத்தில் குறிப்பிடப்பட்டுள்ள
நிபந்தனையின்படி, அதில் குறிப்பிட்ட காலத்துக்கு கூடுதல் கட்டணமின்றி
வாடிக்கையாளருக்கு சேவை வழங்க வேண்டும். மின் பற்றாக்குறை 11.1%:
மத்திய திட்டமிடல் துறை இணை அமைச்சர் அஸ்வனி குமார் கூறியது: கடந்த
நிதியாண்டில் பொருளாதார வளர்ச்சி குறைந்ததற்கு மின்சாரப் பற்றாக்குறை
முக்கிய காரணமாக அமைந்தது. 2011-12-ல் நாட்டின் மின்சார தேவை 93,656 கோடி
யூனிட்டாக இருந்தது. ஆனால் உற்பத்தி 85,723 கோடி யூனிட். இதனால்
பற்றாக்குறை 8.5 சதவீதம் அல்லது 7,932 கோடி யூனிட் ஆக இருந்தது. 2011-12-ல்
மின்சாரத் தேவை 1,30,250 மெகாவாட்டாகவும், உற்பத்தி 1,15,847
மெகாவாட்டாகவும் பற்றாக்குறை 14,403 மெகாவாட்டாகவும் (11.1%) இருந்தது. வங்கிகளிடமிருந்து பதில் இல்லை: மத்திய நிதித் துறை இணை அமைச்சர் நமோ நாராயண் மீனா கூறியது: சிறு
முதலீட்டாளர்களை பாதுகாப்பதற்காக பங்கு பரிவர்த்தனை வாரியம் (செபி) முதல்
நிலை பங்கு வெளியீட்டு (ஐபிஓ) விதிமுறைகளில் சில திருத்தங்களை மேற்கொள்ள
திட்டமிட்டுள்ளது. இதுதொடர்பான செபியின் கேள்விகளுக்கு மெர்ச்சன்ட்
வங்கிகள் உள்நோக்கத்துடன் பதில் அளிக்கவில்லை. முன்வரி வசூல்
கண்காணிக்கப்படும்: மத்திய நிதியமைச்சர் ப.சிதம்பரம் கூறியது: ஒவ்வொரு
மண்டலத்துக்கும் வரி வசூல் இலக்கு நிர்ணயிக்கப்பட்டுள்ளது. எனவே, இலக்கை
எட்டும் வகையில், நிறுவனங்கள் மற்றும் தனி நபர்கள் முன் வரியை உரிய
காலத்துக்குள் செலுத்துகிறார்களா என்பதைக் கண்காணிக்க வேண்டும் என
சம்பந்தப்பட்ட மதிப்பீட்டு அதிகாரிகளுக்கு உத்தரவிடப்பட்டுள்ளது. இந்தியா-மொரீஷியஸ்
இடையிலான இரட்டை வரி தவிர்ப்பு ஒப்பந்தத்தில் சில திருத்தங்களை
மேற்கொள்வது குறித்து மத்திய அரசு ஆய்வு செய்து வருகிறது.