சாஞ்சியில் ராஜபக்சே நுழைந்தால் புத்தரின் எலும்புகள் நடுங்கும்! -வைகோ ஆவேசம்!!

மத்தியப்
பிரதேசத்தில் நடைபெற உள்ள நிகழ்ச்சி கலந்து கொள்வதற்காக இலங்கை அதிபர்
ராஜபக்சே வரவுள்ளதை அடுத்து, அவரை அனுமதிக்க வேண்டாம் என்று கோரி மத்தியப்
பிரதேச மாநில முதலமைச்சர் சிவராஜ்சிங் சௌஹானுக்கு ம.தி.மு.க. பொதுச்
செயலாளர் வைகோ கடிதம் அனுப்பியுள்ளார்.

வைகோ அனுப்பியுள்ள கடிதத்தில் கூறப்பட்டிருப்பதாவது:

அதிபர்
மகிந்த ராஜபக்சேயின் சிங்களப் பேரினவாத அரசின் மிருகத்தனமான இராணுவத்
தாக்குதலால், இலட்சக்கணக்கான ஈழத்தமிழ் மக்கள் படுகொலை செய்யப்பட்டதை,
இரத்தம் கசியும் இதயத்துடன் சுட்டிக் காட்டுகிறேன். இராஜபக்சேயின் இலங்கை
அரசு நடத்திய தமிழ் இனப்படுகொலையை, ஐ.நா. மன்றத்தின் பொதுச்செயலாளர் 2010
-ல் நியமித்த மூவர் குழு, தனது அறிக்கையில் அம்பலப்படுத்தியது.

தமிழ்
ஈழ விடுதலைப் புலிகளுடன் யுத்தம் செய்கிறோம் என்ற போர்வையில், சிங்கள
இராணுவம், உலகம் தடை செய்த நாசகாரக் குண்டுகளைப் பயன்படுத்தியும், விமானக்
குண்டுவீச்சாலும், தாக்குதலாலும், ஈவு இரக்கம் இல்லாமல், குழந்தைகள்,
பெண்கள், வயது முதிர்ந்தோர் உள்பட, எண்ணற்ற தமிழர்களைக் கொன்று குவித்தது.
இந்திய அரசின் முழுமையான ஆதரவோடுதான், தனது அரசு யுத்தத்தை நடத்தியதாக,
இலங்கையின் நாடாளுமன்றத்திலேயே, அதன் அதிபர் மகிந்த ராஜபக்சே,
மிகத்திமிராகச் சொன்னான்.

இப்பொழுது எங்கள் தலையில், மேலும் ஒரு
இடி விழுந்தது போல, புத்தர் பிரான் ஞானம் பெற்ற 2600- வது ஆண்டை ஒட்டி,
புத்த மதம் குறித்த கல்வி ஆய்வுக்கான மையத்தை, மத்தியப் பிரதேச மாநிலம்
சாஞ்சியில் நிறுவுவதற்காக, செப்டெம்பர் 21 -ம் நாள் நடைபெறுகின்ற அடிக்கல்
நாட்டு விழாவில், மகிந்த இராஜபக்சே, சுஷ்மா சுவராஜ் அழைப்பின்பேரில், பங்கு
ஏற்கப் போகிறார் என்று அறிவித்து உள்ளார்.

கௌதம
புத்தர், துன்பங்களைத் தானாக விரும்பி ஏற்றுக்கொண்டு, மனிதகுலத்துக்கு
அன்பையும், கருணையையும் போதித்தார். அந்த புத்த பெருமானின் பெயரைக்கூட
உச்சரிப்பதற்கு, எந்தத் தகுதியும் அற்றவன் இராஜபக்சே. இரத்த வெறி பிடித்த
இராஜபக்சே, சாஞ்சியில் நுழைந்தால், புத்தரின் எலும்புகள் நடுங்கும்;
இராஜபக்சேயை மட்டும் அல்ல, அவனை அழைத்து வந்தவர்களையும் ஒருபோதும்
மன்னிக்காது.

வாஜ்பாய் இன்று உடல்நலம் மிகவும் பாதிக்கப்பட்டு
இருப்பதை எண்ணி நான் மிகுந்த துயரத்தில் இருக்கிறேன். வாஜ்பாய், நலனோடும்,
பேசி இயங்கும் திறனோடும் இருந்தால், ஒருகாலத்தில் அவரை
நாடாளுமன்றத்துக்குத் தேர்ந்து எடுத்த விதிஷா தொகுதியில் உள்ள சாஞ்சிக்கு,
மகிந்த ராஜபக்சேயை அழைக்கின்ற துணிச்சல், சுஷ்மா சுவராஜூக்கு ஏற்பட்டு
இருக்காது.

இந்தப் பின்னணியில், மகிந்த இராஜபக்சேவுக்கு, சுஷ்மா
சுவராஜ் கொடுத்த அழைப்பிதழை ரத்து செய்து, அவனது வருகையைத் தடுத்து,
சாஞ்சியின் புத்த மத புனிதத்தன்மையைப் பாதுகாத்துக் கொள்ள வேண்டும் என்று,
உங்களை நான் வேண்டிக்கொள்கிறேன். தமிழ் மக்களின் உணர்வுகளைப் புரிந்து,
மதித்து, இந்தப் பிரச்சினையில் தக்க நடவடிக்கை எடுத்து, சாஞ்சிக்கு
இராஜபக்சே வருவதைத் தவிர்த்து விடுவீர்கள் என்று நான் நம்புகிறேன்.

ஆனால்,
பாரதிய ஜனதா கட்சியில், சில அக்கறை உள்ள சக்திகளின், நியாயம் அற்ற
அழுத்தங்களின் காரணமாக, சுஷ்மா சுவராஜூடைய அழைப்பினை ஆதரித்து, புத்தர்
விழாவில் அடிக்கல் நாட்டுவதற்கு, மகிந்த இராஜபக்சேயைப் பங்கு ஏற்கச்
செய்வீர்களானால், அந்தச் செயல், தமிழ்நாட்டில் உள்ள தமிழர்களுக்கும்,
உலகெங்கும் உள்ள தமிழர்களுக்கும் இழைக்கப்படும், மன்னிக்க முடியாத துரோகச்
செயல் ஆகி விடும் என்று, வருத்தத்தோடு நான் உங்களுக்குச் சுட்டிக்
காட்டுகிறேன்.
சாஞ்சிக்கு வரும் மகிந்த இராஜபக்சேயை எதிர்த்து, ஜனநாயக
முறையில், அமைதி வழியில், என்னுடைய தலைமையில், மறுமலர்ச்சி திராவிட
முன்னேற்றக் கழகம், செப்டெம்பர் 21 -ம் நாள், சாஞ்சியில், கருப்புக்கொடி
அறப்போராட்டம் நடத்தும் என்று, நான் ஏற்கனவே அறிவித்து விட்டேன்.

ம.தி.மு.க.வின்
1000 க்குக் குறையாத தொண்டர்களோடு, இப்போராட்டத்துக்கு நான் தலைமை
தாங்குவேன். ஜனநாயக உரிமைகளை மறுக்கின்ற வகையில், எந்தவிதமான
அடக்குமுறைகளிலும் உங்கள் அரசாங்கம் ஈடுபடாது என்று நான் நம்புகிறேன்.
இந்தப் புனிதப்போரில், எத்தகைய துன்பத்தையும் ஏற்றுக்கொள்ள நாங்கள்
ஆயத்தமாக இருக்கின்றோம்.

இவ்வாறு அந்தக் கடிதத்தில் வைகோ கூறியுள்ளார்.

இதேப்போல
பாரதிய ஜனதா கட்சித் தலைவர்கள் நிதின் கட்கரி, எல்.கே. அத்வானி, யஷ்வந்த்
சின்கா, ஜஸ்வந்த் சிங், ராம ஜெத்மலானி, வெங்கைய நாயுடு, ராஜீப் பிரதாப்
ரூடி ஆகியோருக்குத தனித்தனிக் கடிதங்கள் எழுதி, மத்தியப் பிரதேச முதல்
அமைச்சருக்கு எழுதி உள்ள கடிதத்தின் பிரதியை, இணைத்து வைகோ அனுப்பி
உள்ளதாகக் கூறப்பட்டுள்ளது.