இணையதளங்களை தவறாக பயன்படுத்தினால் சட்டப்படி தண்டனை உறுதி: கபில் சிபல் பேட்டி

புதுடில்லி:""இணையதளங்கள் மூலமாக வதந்தியை பரப்புவோரை அடையாளம் காண்பது,
மிகவும் சிரமமாக உள்ளது. தொழில்நுட்ப வளர்ச்சி, தவறாக பயன்படுத்தப்படுவதை
தடுக்க, சமூக வலைத்தளங்களுடன் சேர்ந்து, அமைப்பு ரீதியான நடைமுறையை
உருவாக்கும் முயற்சி மேற்கொள்ளப்பட்டுள்ளது,''என, மத்திய தொலை தொடர்பு துறை
அமைச்சர் கபில் சிபல் கூறினார்.

மத்திய தொலை தொடர்பு துறை அமைச்சர் கபில் சிபல் கூறியதாவது:இணையதளங்கள்
மூலமாக, தவறான தகவல்களை வெளியிடுவதோடு, பதட்டத்தை ஏற்படுத்தும் வகையிலான
வதந்தியையும் பரவவிடும் நடைமுறை அதிகரித்து விட்டது. தவறான தகவல்களை
இணையங்கள் மூலமாக, பரப்புவோரை அடையாளம் காண்பது, மிகவும் சிரமமாக உள்ளது.
இதற்காக, சமூக வலைத்தளங்களுடன், இணைந்து செயல்பட வேண்டிய, அவசியம்
ஏற்பட்டுள்ளது. தொழில்நுட்ப வளர்ச்சி, தவறாக பயன்படுத்தப்படுவதை தடுக்க,
சமூக வலைத்தளங்களுடன் சேர்ந்து, ஒரு அமைப்பு ரீதியான நடைமுறையை
உருவாக்குவதற்கான முயற்சி மேற்கொள்ளப்பட்டுள்ளது.சில வலைத்தளங்கள்,
அரசுக்கு ஒத்துழைப்பு அளிக்க, சம்மதம் தெரிவித்துள்ளன.

இணையங்களை
தவறாக பயன்படுத்துவோருக்கு, சட்ட ரீதியான தண்டனை அளிக்கப்பட வேண்டும்.
இதற்குள்ள, சட்ட ரீதியான வாய்ப்புகள் குறித்து, அரசு ஆய்வு செய்து
வருகிறது. எதிர்காலங்களில், இணையதளங்களை தவறாக பயன்படுத்துவோர்,
தண்டிக்கப்படுவர்.சில சமூக வலைத்தளங்கள், முக்கியமான தகவல்களை, அரசுக்கு
அளிக்க மறுக்கின்றன. தங்களின் "சர்வர்'கள், வெளிநாடுகளில் உள்ளதால், இந்திய
சட்ட விதிமுறைகளுக்கு, தாங்கள் கட்டுப்பட வேண்டிய அவசியம் இல்லை
என்கின்றனர். இதனால் பிரச்னை ஏற்படுகிறது.இவ்வாறு கபில் சிபல் கூறினார்.

இதற்கிடையே,
ஆட்சேபகரமான தகவல்களைக் கொண்ட இணைய பக்கங்களை தடுக்கும் அரசின்
நடவடிக்கைகளுக்கு ஒத்துழைப்பு அளிப்பதாக, "ட்விட்டர்' சமூக வலைத்தளம்,
பிரதமர் அலுவலகத்திடம் உறுதி அளித்துள்ளது.