கோடிக்கணக்கில் கிரானைட் மோசடி: குவாரி அதிபர்கள் வீடுகளில் சோதனை

மதுரை, ஆக.13-


மதுரை மாவட்டம் மேலூர், கீழவளவு, இ.மலம்பட்டி, செம்மணிப்பட்டி உள்ளிட்ட பகுதிகளில் 175-க் கும் மேற்பட்ட கிரானைட் குவாரிகள் உள்ளன.
இந்த குவாரிகள் அரசு புறம்போக்கு நிலங்கள், கண்மாய்கள் ஆகியவற்றில் அமைந்துள்ளன.

அங்கு சட்டவிரோதமாக கிரானைட் கற்கள் வெட்டி எடுக்கப்பட்டதில் 16 ஆயிரம்
கோடி ரூபாய் அரசுக்கு வருவாய் இழப்பு ஏற்பட்டதாக மதுரை முன்னாள் கலெக்டர்
சகாயம் அரசுக்கு அறிக்கை அளித்தார்.


இதையடுத்து மதுரை கலெக்டர் அன்சுல் மிஸ்ரா, 18 தனிக்குழுக்களை அமைத்து
மேலூர் கிரானைட் குவாரிகளில் அதிரடி சோதனை நடத்தி வருகிறார். 12-வது நாளாக
இன்றும் சோதனை நீடித்து வருகிறது.


சட்டவிரோதமாக அரசு கனிமங்களை திருடியது, ஆவணங்களை மறைத்தது உள்ளிட்ட
பிரிவுகளில் போலீசார் 12 கிரானைட் கம்பெனிகள் மீது வழக்குப்பதிவு
செய்துள்ளனர்.


கடந்த வாரம் மேலூர் தெற்கு தெருவில் உள்ள பி.ஆர்.பி.கிரானைட் அலுவலகம் சீல்
வைக்கப்பட்டது. நேற்று அதிகாலை மேலூர் பகுதியில் கிரானைட் தொடர்பான
ஆவணங்களுடன் 2 கார்கள் பறிமுதல் செய்யப்பட்டன.


கிரானைட் அதிபர்கள் பி.ஆர்.பழனிச்சாமி, அவரது மகன்கள் சுரேஷ்குமார்,
செந்தில்குமார், மருமகன் மகாராஜன், ஒலிம்பஸ் கிரானைட் இயக்குனர் துரை
தயாநிதி (மு.க.அழகிரியின் மகன்), நாகராஜ், சிந்து கிரானைட் அதிபர்
செல்வராஜ், மதுரா கிரானைட் அதிபர் பன்னீர் உள்ளிட்ட 18 பேர்
தலைமறைவாகிவிட்டனர். அவர்களை பிடிக்க தனிப்படை அமைக்கப்பட்டுள்ளது.


இவர்கள் தாக்கல் செய்த முன்ஜாமீன் மனு விசாரணை மதுரை ஐகோர்ட்டு கிளையில் இன்று விசாரணைக்கு வருகிறது.
தலைமறைவான கிரானைட் அதிபர்கள், முறைகேடு ஆவணங்களை மறைக்கும் முயற்சியில் ஈடுபட்டு வருவதாக அதிகாரிகளுக்கு தகவல் கிடைத்தது.

இதையடுத்து மோசடி ஆவணங்கள் முழுவதையும் கைப்பற்றும் வகையில் போலீசார்
பல்வேறு நடவடிக்கைகளில் ஈடுபட்டு வருகிறார்கள்.
நேற்று 3-வது முறையாக கலெக்டர் அன்சுல் மிஸ்ரா மேலூர் பகுதிகளில் உள்ள
கிரானைட் குவாரிகளில் அதிரடி சோதனை நடத்தியபோது கண்மாய்க்குள் மறைத்து
வைக்கப்பட்டு இருந்த பல நூறு கோடி மதிப்புள்ள கிரானைட் கற்களை
கண்டுபிடித்தார். அதனை மதிப்பீடு செய்ய அதிகாரிகளுக்கு உத்தரவிட்டார்.


இன்று அதிகாலை 4 மணி முதல் மதுரை, மேலூர் பகுதிகளில் கிரானைட் குவாரி
அதிபர்கள், உறவினர்கள் வீடுகளில் தனிப்படை போலீசார் அதிரடி சோதனை நடத்தி
வருகிறார்கள்.


மதுரை அண்ணா நகரில் உள்ள பி.ஆர்.பழனிசாமியின் வீட்டில் இன்ஸ்பெக்டர்
திருமால் தலைமையில் சோதனை நடந்து வருகிறது. அவரது மகள் சிவரஞ்சனி
வீட்டிலும் போலீசார் சோதனை நடத்தி வருகிறார்கள்.
லேக் ஏரியாவில் உள்ள பி.ஆர்.பழனிசாமியின் மைத்துனர் முருகன் வீட்டில்
இன்ஸ்பெக்டர் கோமதிலிங்கம் தலைமையில் அதிரடி சோதனை நடந்து வருகிறது.


மேலூரில் பி.ஆர்.பி. கிரானைட் அலுவலகம் மற்றும் அங்கு பணிபுரியும் உயர்
அதிகாரிகள் ஆகியோரது வீடுகளில் சோதனை நடந்து வருகிறது. மதுரா கிரானைட்
அதிபர் பன்னீர் வீட்டிலும் போலீசார் சோதனை நடத்தி வருகிறார்கள்.


மேலூர் தி.மு.க. நகர செயலாளர் முகமது இப்ராகிம் சேட்டின் வீடு, கிரானைட்
அதிபர் பெரியசாமியின் லாட்ஜு மற்றும் மதுரை பி.பி.சாவடியில் உள்ள பார்வர்டு
பிளாக் பிரமுகர் தினகரன் வீடு உள்ளிட்ட 20 இடங்களில் தொடர்ந்து சோதனை
நடத்தப்பட்டு வருகிறது.


இந்த சோதனையின்போது பல்வேறு ஆவணங் கள் சிக்கி உள்ளதாக தெரிய வந்துள்ளது.
மேலூரில் இன்று காலை பி.ஆர்.பி. கிரானைட் நிறுவனத்தில் பணிபுரிந்து வரும்
சண்முகவேல் (வயது65) என்பவரது வீட்டில் போலீசார் சோதனை நடத்தினர்.


சண்முகவேல், மதுரை கனிம வள உதவி இயக்குனராக இருந்து ஓய்வு பெற்றவர். இவர்
ஓய்வு பெற்றதும் இங்கு அதிக சம்பளத்தில் பணிபுரிந்து வருகிறார்.
இவரிடம் தனிப்படை போலீசார் கிரானைட் மோசடி குறித்து நீண்ட நேரம் விசாரணை
நடத்தினர். ஆனால் போலீசார் விசாரணைக்கு அவர் ஒத்துழைக்க மறுத்தார். இதனால்
அவரை தனிப்படை போலீசார் கைது செய்து ரகசிய இடத்தில் வைத்து விசாரித்து
வருகிறார்கள்.