ஈழப் பிரச்னையில் மத்திய அரசு பாராமுகம் ஏன்?

by **அருள்** Mon Aug 13, 2012 7:48 am

சென்னை ராயப்பேட்டை ஒய்.எம்.சி.ஏ. மைதானத்தில்
திமுக தலைவர் மு. கருணாநிதி தலைமையில் ஞாயிற்றுக்கிழமை நடைபெற்ற ஈழத்
தமிழர் வாழ்வுரிமை பாதுகாப்பு மாநாட்டில

சென்னை, ஆக. 12: ஈழத் தமிழர் பிரச்னையை மத்திய அரசு கண்டும், காணாமல் இருப்பது
ஏன் என்று டெசோ மாநாட்டில் தி.மு.க. கேள்வி எழுப்பியது.
ஈழத் தமிழர்கள் தாங்கள் விரும்பும் அரசியல் தீர்வை ஈழத் தமிழர்களே முடிவு
செய்து கொள்ள ஐ.நா. மன்றத்தில் மத்திய அரசு தீர்மானம் கொண்டு வர வேண்டும் என டெசோ
மாநாட்டில் தி.மு.க. வலியுறுத்தியுள்ளது.
உயர்நீதிமன்றத்தின் தீர்ப்பை அடுத்து சென்னை ராயப்பேட்டை ஒய்.எம்.சி.ஏ.
மைதானத்தில் திமுக தலைவர் மு.கருணாநிதி தலைமையில் ஈழத் தமிழர் வாழ்வுரிமை பாதுகாப்பு
மாநாடு ஞாயிற்றுக்கிழமை மாலை தொடங்கியது. டெசோ மாநாட்டில் நிறைவேற்றப்பட்ட
தீர்மானங்கள் விவரம்:-
அண்டை நாடான இலங்கையில் அமைதியும், சமத்துவமும் நிலவுவதற்கு உரிய பணிகளைச்
செய்ய வேண்டிய கடமையும், உரிமையும், பொறுப்பும் இந்தியாவுக்கு உள்ளது. ஆனால்,
மத்திய அரசு கண்டும், காணாமலும் இருப்பது ஏன் என்ற கேள்வி தமிழர் நெஞ்சங்களில்
எழுகிறது.
எனவே, இலங்கையின் தற்போதைய சூழல் மாறி ஈழத் தமிழர்கள் அரசியல், பொருளாதாரம்,
பண்பாட்டு உரிமைகளை மீட்டெடுத்து சமத்துவமும்,அமைதியும் நிறைந்த வாழ்வை மேற்கொள்ள
மத்திய அரசு முழு மூச்சுடன் செயல்பட வேண்டும். இலங்கைத் தமிழர்கள் தாங்கள்
விரும்பும் அரசியல் தீர்வை தாங்களே முடிவு செய்து கொள்ளும் வகையில் அவர்களுக்கு முழு
உரிமை வழங்குவதற்கு ஐ.நா மன்றத்தில் இந்திய அரசு தீர்மானம் கொண்டு வர வேண்டும்.
இலங்கை அரசுக்கு கண்டனம்: தமிழ் இனத்தின் பண்பாட்டுக் கூறுகளை அழித்து,
அவற்றின் வேர்களையும், சிதைக்கும் கொடுமையான முயற்சிகளை இலங்கை அரசு மேற்கொண்டு
வருகிறது. அதன் ஒரு பகுதிதான் சிங்கள மக்களை ஈழப் பகுதிகளில் குடியமர்த்தும்
முயற்சியாகும். ஈழத் தமிழர்களின் இந்துக் கோயில்கள், மசூதிகள், தேவாலயங்கள் ஆகியவை
அழிக்கப்பட்டு வருகின்றன. இது வன்மையாக கண்டிக்கதக்கது. எனவே, இலங்கை அரசின் இந்த
நடவடிக்கைகளை ஐ.நா. மன்றம் உடனே தடுத்து நிறுத்த வேண்டும்.
இலங்கையில் 2009-ல் நடைபெற்ற போரில் தமிழர்கள் கூட்டம், கூட்டமாக
கொல்லப்பட்டனர். போர்க் குற்றங்கள் வெளியே தெரியாமல் இருக்க தடயங்களை அழிக்கும்
முயற்சிகளும் நடைபெற்றன. ஐ.நா பொதுச்செயலர் பான் கீ மூன் அமைத்த மூவர் குழு இது
குறித்த விசாரணை நடத்தி அளித்த அறிக்கை வெளியாகி ஓராண்டு கடந்த பின்னரும் போர்க்
குற்றங்கள் குறித்து ஆராய சுயேச்சையான சர்வதேச குழு அமைக்கப்படவில்லை. எனவே, ஐ. நா
மனித உரிமைக் குழுவின் சார்பில் சர்வதேச குழு ஒன்று அமைக்கப்பட்டு போர்க்குற்றங்கள்
கண்டறியப்பட வேண்டும். குற்றவாளிகள் தண்டிக்கப்பட வேண்டும்.
ஐ.நா.வுக்கு வலியுறுத்தல்: ஈழப் பகுதிகளில் தமிழ் மக்களின் நிலங்களும்,
வீடுகளும் வன்பறிப்புக்கு உள்ளாக்கப்பட்டு வருகின்றன. குறிப்பாக சம்பூர், மன்னார்,
வவுனியா போன்ற பகுதிகளில் பல்லாயிரக்கணக்கான ஏக்கர் நிலங்கள் பறிக்கப்பட்டுள்ளன.
இவ்வாறு சொந்த மண்ணிலேயே அகதிகளாக வாழும் கொடுமைக்கு முடிவு கட்டும் முயற்சிகளை ஐ.நா.
மன்றம் உடனடியாக மேற்கொள்ள வேண்டும். தமிழீழப் பகுதிகளிலிருந்து உடனடியாக ராணுவத்தை
சிங்கள அரசு விலக்கிக் கொள்வதற்கு ஐக்கிய நாடுகள் சபையும் உலக நாடுகளும் இலங்கை
அரசுக்கு அழுத்தம் கொடுக்க வேண்டும். ராணுவம் திரும்பப் பெறுவதை நேரடியாகக்
கண்காணிக்க ஐக்கிய நாடுகளை சபை ஒரு பன்னாட்டுக் குழுவையும் ஏற்படுத்த வேண்டும்.
தமிழர் வாழும் பகுதிகளில் வலிந்து குடியமர்த்தப்பட்டுள்ள சிங்களவர்களை உடனே திருப்பி
அனுப்ப வேண்டும்.
மீண்டும் தமிழர்கள் தங்களின் தொழில், வணிக மற்றும் மூலவள ஆதாரங்களின் மீது
உரிமை கொண்டவர்களாய் அறிவிக்கப்பட வேண்டும். இதை ஐ.நா. சபை இலங்கை அரசிடம்
வலியுறுத்த வேண்டும்.
பல்வேறு நாடுகளில் அகதிகளாக வாழும் ஈழத் தமிழர்களை உடனடியாக ஐக்கிய நாடுகள்
சபையின் அகதிகளுக்கான ஆணையரிடம் ஒப்படைக்கப்பட வேண்டும். அவர்களுக்குத் தேவையான
பொருளாதார உதவிகளையும், பயண உரிம ஆவணங்களையும் பெற்றுத்தர ஐ.நா. நடவடிக்கை எடுக்க
வேண்டும். இந்தியாவில் அகதிகளாக வாழும் இலங்கைத் தமிழர்களுக்கு இந்திய குடியுரிமையை
மத்திய அரசு வழங்க வேண்டும் உள்ளிட்ட தீர்மானங்கள் டெசோ மாநாட்டில்
நிறைவேற்றப்பட்டன.