நவம்பரில் 2 ஜி அலைக்கற்றை ஏலம்

by **மாலதி** Wed Aug 08, 2012 10:35 am

புது
தில்லி, ஆக. 7: ""2ஜி அலைக்கற்றைத் தொகுப்பை ஆகஸ்ட் 31-ம் தேதிக்குள்
ஏலத்தில் விடவேண்டும் என்று விதிக்கப்பட்ட கெடுவை நவம்பர் மாதம் வரை
நீட்டிக்க வேண்டும்'' என்று உச்ச நீதிமன்றத்தில் மனு தாக்கல் செய்ய மத்திய
அமைச்சர்கள் குழு முடிவு செய்துள்ளது. மத்திய தொலைத் தொடர்புத்
துறைக்கான மத்திய அமைச்சர்கள் குழுக் கூட்டம் மத்திய நிதி அமைச்சர் ப.
சிதம்பரம் தலைமையில் புது தில்லியில் செவ்வாய்க்கிழமை நடைபெற்றது. இந்தக்
கூட்டத்தில் தொலைத் தொடர்புத் துறை அமைச்சர் கபில் சிபல், சட்ட அமைச்சர்
சல்மான் குர்ஷித் உள்ளிட்டோர் கலந்து கொண்டனர். இதில் எடுக்கப்பட்ட முடிவுகள் குறித்து செய்தியாளர்களிடம் கபில் சிபல் கூறியது:""2
ஜி அலைக்கற்றைத் தொகுப்பை ஏலத்தில் விற்பனை செய்ய "டைம்ஸ் இண்டெர்நெட்'
என்ற நிறுவனத்தைத் தொலைத்தொடர்புத் துறை தேர்வு செய்துள்ளது. அந்த
நிறுவனத்துடன் ஆலோசனை நடத்தியதில் "2 ஜி' அலைக்கற்றை ஏலம் விட ஆகஸ்ட் 31-ம்
தேதி வரை விதிக்கப்பட்ட அவகாசம் போதாது எனத் தெரிகிறது. அந்த
நிறுவனம் கூடுதல் அவகாசம் கோருகிறது. இதனால், "2 ஜி' ஏலம் விடுவது தொடர்பாக
மத்திய தொலைத் தொடர்பு அமைச்சகம் இதுவரை எடுத்துள்ள நடவடிக்கைகளை உச்ச
நீதிமன்றத்தில் விளக்குவது என்று முடிவு செய்துள்ளோம். இது குறித்து
மத்திய அமைச்சர்கள் குழுவில் விவாதிக்கப்பட்டது. அப்போது, ஆகஸ்ட் 31-ம்
தேதி வரை விதிக்கப்பட்ட கெடுவை நவம்பர் மாதம் வரை நீட்டித்தால்
பிரச்னையின்றி "2 ஜி' ஏலம் விட முடியும். அதனால், கால நீட்டிப்பு வழங்க
வேண்டும் என்று உச்ச நீதிமன்றத்தில் இந்த வாரத்துக்குள் மனு தாக்கல்
செய்யப்படும்'' என்று கபில் சிபல் கூறினார். "2 ஜி' ஏல நடவடிக்கை குறித்து
மத்திய தொலைத் தொடர்பு அமைச்சக உயரதிகாரி கூறியது:""2ஜி
அலைக்கற்றையை ஏலம் விடுவதற்குத் தனியார் நிறுவனம் தேர்வு செய்த தகவலை
அரசிதழில் மத்திய அரசு வெளியிட வேண்டும். அதன் பிறகு, ஏலம் எடுக்க தகுதி
வாய்ந்த நிறுவனங்களிடம் இருந்து விண்ணப்பங்களை வரவேற்க வேண்டும்.
அவற்றிலிருந்து ஏலம் ஒதுக்க வேண்டிய நடைமுறைகளைப் பின்பற்றுவது உள்பட 13
கட்ட நடவடிக்கைகளை மத்திய தொலைத் தொடர்பு அமைச்சகம் மேற்கொள்ள வேண்டும்.
இந்த நிலையில் மத்திய அரசு தாக்கல் செய்யும் மனுவை ஏற்று உச்ச நீதிமன்றம்
கால நீட்டிப்பு வழங்கினால், நவம்பர் முதல் வாரத்தில் ஏலம் நடத்த முடியும்''
என்றார் அந்த அதிகாரி."2 ஜி' அலைக்கற்றை பெற்றுள்ள தனியார் தொலைத்
தொடர்பு நிறுவனங்களின் உரிமம் செப்டம்பர் 7-ம் தேதி வரை செல்லுபடியாகும்
என்று உச்ச நீதிமன்றம் கூறியுள்ளது. இதனால், ஏலம் நடத்தப்படாமல்
2008-ம் ஆண்டில் "2 ஜி' அலைக்கற்றை பெற்றுள்ள சிஸ்டெமா ஷ்யாம், யூனிநார்,
விடியோகான் உள்ளிட்ட நிறுவனங்கள், இப்போது ஏலம் நடத்தப்படும்போது, அதில்
பங்கேற்க வேண்டும். அப்போது, அந்நிறுவனங்கள் ஏற்கெனவே ஒதுக்கீடு பெற்ற
தொலைத் தொடர்பு வட்டாரங்களில் சேவை நடத்த வாய்ப்பு கிடைக்குமா என்பது
கேள்விக் குறி. இது பிரச்னைகள் உள்ளதாகக் கருதப்படுகிறது. இது போன்ற
நிறுவனங்களைக் கருத்தில் கொண்டே ஏலம் விடுவதற்கான அவகாசத்தை
நீட்டிக்கும்படி உச்ச நீதிமன்றத்திடம் கோர மத்திய அமைச்சர்கள் குழு முடிவு
செய்துள்ளதாகத் தொலைத் தொடர்பு அமைச்சக வட்டாரங்கள் தெரிவித்தன.