தனி ஈழத்தை அழுத்தந்திருத்தமாக சொல்ல உத்தேசமில்லை : கருணாநிதி

by **மாலதி** Mon Jul 16, 2012 5:47 pm

சென்னை,
ஜூலை 16 : திமுக தலைவர் கருணாநிதி இன்று கேள்வி-பதில் வடிவிலான ஒரு
அறிக்கையை அனுப்பியுள்ளார். அதில் டெசோ மாநாடு குறித்து சில விளக்கங்களை
அவர் அளித்துள்ளார்.அறிக்கையில், டெசோ மாநாட்டில் கலந்து
கொள்வதாக இதுவரை ஒப்புக் கொண்டுள்ள தலைவர்கள் யார் யார்? என்ற கேள்விக்கு
திமுக தலைவர் கருணாநிதி அளித்துள்ள பதிலில், "மத்திய அமைச்சர்கள் சரத்
பவார், பரூக் அப்துல்லா, ஐக்கிய ஜனதா தளக் கட்சித் தலைவர் சரத் யாதவ், லோக்
ஜன சக்திக் கட்சித் தலைவர் ராம் விலாஸ் பஸ்வான், நைஜீரிய நாட்டின் ஈடோ
மாநில வர்த்தகத் துறை அமைச்சர் அல் ஹாஜி மூசா அகமத், ஸ்வீடன் நாட்டைச்
சேர்ந்த ஐக்கிய நாடுகள் சபையின் மனித உரிமைத் தூதர் நாசிம் மாலிக்
உள்ளிட்டோர் கலந்து கொள்ள சம்மதம் தெரிவித்துள்ளனர்.மாநாட்டில்
பார்வையாளாகளாக கலந்து கொள்ள உலக அளவில் உள்ள ஈழத் தமிழ் அமைப்புகளின்
நிர்வாகிகள் - அமெரிக்கா, கனடா, இங்கிலாந்து, நார்வே, பிரான்ஸ், ஜெர்மனி,
ஆஸ்திரேலியா, நியூசிலாந்து, தென் அமெரிக்க ஆகிய நாடுகளிலிருந்து தமிழ்
அமைப்புகளின் நிர்வாகிகள் மாநாட்டில் கலந்து கொள்பவர்களாகவும்,
பார்வையாளர்களாகவும் வரவிருக்கிறார்கள்.தமிழர் தேசிய
கூட்டணித் தலைவர் சம்பந்தன், எம்.பி., மாவெ சேனாதிராஜா, எம்.பி.,
எஸ்.யோகேஸ்வரன், எம்.பி., மாநாட்டிற்கு வர ஒப்புதல் தந்திருக்கிறார்கள்.
தமிழர் தேசிய மக்கள் முன்னணித் தலைவர் கஜேந்திரகுமார் பொன்னம்பலம்,
முன்னாள் நாடாளுமன்ற உறுப்பினர், தமிழர் தேசிய மக்கள் முன்னணியின் பொதுச்
செயலாளர் செல்வராஜ் கஜேந்திரன், முன்னாள் நாடாளுமன்ற உறுப்பினர்,
சுமேந்திரன், எம்.பி., ஆகியோரெல்லாம் மாநாட்டிற்கு வருவதைப் பற்றி
பேசியிருக்கிறார்கள். இவர்கள் தவிர சரவணபவன், எம்.பி., அவர்களும்
பேசியிருக்கிறார்" என்று கருணாநிதி கூறியுள்ளார்.இந்த டெசோ
மாநாட்டில் தனி ஈழம் கோரி வலியுறுத்தி தீர்மானம் நிறைவேற்ற வாய்ப்புகள்
இருக்கிறதா? என்ற கேள்விக்கு, தனி ஈழத்தைப் பற்றி கருத்து இருக்கிறதே தவிர,
அதை இப்போது அழுத்தந்திருத்தமாகச் சொல்லி, அதற்கான கிளர்ச்சிகளை
நடத்துவதாக உத்தேசமில்லை. ஏனென்றால் அங்கே நடைபெற்ற ஆயுதப்
போராட்டத்திற்குப் பிறகு, ஆயுதப் போராளிகளை சிங்கள ராணுவம் அழித்து
ஒழித்துள்ள இந்த நேரத்தில் எஞ்சியுள்ள இலங்கைத் தமிழர்களைப் பாதுகாப்பது,
அவர்களின் வாழ்வாதாரங்களை வளப்படுத்துவது, அவர்களுக்கு போரினால் ஏற்பட்ட
இன்னல்களைக் களைவது, இவற்றில் எப்படியெல்லாம் நடவடிக்கை எடுக்கலாம்,
நாட்டம் செலுத்தலாம், ஆதரவு கோரலாம் என்பதற்காகத்தான் இந்த மாநாட்டைக்
கூட்டி, அதிலே கலந்து கொள்கின்றவர்களின் அறிவுரை, கருத்துரை ஆகியவற்றையும்
நாங்கள் முக்கியமாகக் கருதி, அவற்றின் அடிப்படையில் அமைதியான முறையில்
அறவழியில் நடவடிக்கைகளை மேற்கொள்ளலாம் என்பது தான் இந்த மாநாட்டை
நடத்துகின்ற எங்களுடைய திட்டமாகும்.ஏற்கனவே தனி ஈழம் தான்
எங்களின் குறிக்கோள் என்று சொல்லியிருந்தீர்கள். தற்போது அதை மாற்றுவதற்கு,
மத்திய அரசிலே இருந்து தி.மு.க. விற்கு ஏதாவது நெருக்கடி இருக்கிறதா? என்ற
கேள்விக்கு மத்திய அரசின் நெருக்கடி எதுவும் இல்லை. நீங்களாக கற்பனை
செய்து கொள்ள வேண்டாம் என்று பதிலளித்துள்ளார்.தனி ஈழம்
பற்றி தற்போது திறந்த மனதோடு இருப்பதாக எடுத்துக் கொள்ளலாமா? என்ற
கேள்விக்கு, தனி ஈழத்துக்காக போராட்டமோ, கிளர்ச்சிகளோ எதுவும் இப்போது
இல்லை. இப்போது இருப்பதெல்லாம் அடிபட்டுக் கிடக்கின்ற இலங்கைத்
தமிழர்களுடைய ரணத்தை ஆற்றுவது - அவர்களுடைய பசியைப் போக்குவது - அவர்களுடைய
வாழ்வாதாரங்களை வளப்படுத்துவது என்பது தான். இப்போதுள்ள அவசரமான தேவை இது
தான் என்று கருணாநிதி பதிலளித்துள்ளார்.