அதிசயம் நிகழ்ந்தால் வெற்றி: சங்மா

by **logu** Mon Jun 25, 2012 7:29 am

புது
தில்லி, ஜூன் 24: அதிசயம் நிகழ்ந்தால் குடியரசுத் தலைவர் தேர்தலில் நான்
வெற்றி பெறுவேன். அதிசயங்கள் நிகழும் என்பதில் எனக்கு நம்பிக்கை உண்டு
என்று பி.ஏ. சங்மா தெரிவித்துள்ளார்.அதிமுக, பிஜு ஜனதா தளம் ஆகிய
கட்சிகளால் குடியரசுத் தலைவர் தேர்தலில் வேட்பாளராக முன்னிறுத்தப்பட்டவர்
மக்களவை முன்னாள் தலைவர் பி.ஏ. சங்மா. பின்னர் பாஜக தலைமையிலான தேசிய
ஜனநாயகக் கூட்டணியும் அவருக்கு ஆதரவு தெரிவித்துள்ளது. எனினும் குடியரசுத்
தலைவர் தேர்தலில் காங்கிரஸ் கூட்டணி வேட்பாளரான பிரணாப் முகர்ஜி வெற்றி
பெறவே அதிக வாய்ப்பு உள்ளது.அதிசயம் நிகழும்: இந்நிலையில் தனியார்
தொலைக்காட்சி சேனலுக்கு ஞாயிற்றுக்கிழமை அளித்த பேட்டியில் சங்மா
கூறியிருப்பது: உலகில் அதிசயங்கள் நிகழ்வது உண்மைதான். எனக்கும் அதிசயங்கள்
நிகழ்வதில் நம்பிக்கை உண்டு. எனவே குடியரசுத் தலைவர் தேர்தலிலும் அதிசயம்
நடக்க வாய்ப்பு உள்ளது.கடவுள் எனது பக்கம் இருக்கும் பட்சத்தில்
தேர்தல் முடியும் முன்னரே நான் தோல்வியடைவேன் என்று கூற முடியாது.
அரசியலில் காட்சிகள் மிகவேகமாக மாறும். எப்போது வேண்டுமானாலும், எது
வேண்டுமானாலும் நிகழலாம். தேர்தல் என்பது அரசியல். எனவே இங்கும் மாற்றங்கள்
நிகழும். என்ன மாற்றங்கள் வருகின்றன என்பதை பொறுத்திருந்து பார்க்க
வேண்டும்.அரசியல் ஆதாயம்? குடியரசுத் தலைவர் தேர்தலில் என்னை
முன்னிறுத்திய கட்சிகளும், எனக்கு ஆதரவு அளித்த கட்சிகளும் அவர்களின்
அரசியல் ஆதாயத்துக்காக என்னை பயன்படுத்துகின்றனர் என்று கூறப்படுவதை
ஒருபோதும் ஏற்றுக் கொள்ள முடியாது. செய்தி தொலைக்காட்சிகளும்,
பத்திரிகைகளும்தான் பலரது கைகளில் சிக்கியுள்ளன. ஒருசிலரது அரசியல்
லாபங்களுக்காக அவை பயன்படுத்தப்படுகின்றன என்றார் அவர்.மன்னிப்பதே
கிறிஸ்தவம்: பாஜக, அதிமுக ஆகிய கட்சிகள் முன்பு கிறிஸ்தவர்களுக்கு எதிராக
செயல்பட்டுள்ள நிலையில் அந்த மதத்தைச் சேர்ந்த நீங்கள் அவர்களது ஆதரவைப்
பெறுவது முறையானதுதானா என்ற கேள்விக்கு, "மதத்தை அரசியலுடன் இணைக்கும்
பிரச்னை அனைத்து நாடுகளிலும் உள்ளது. பிறர் செய்யும் தவறுகளை
மன்னிப்பது என்பது கிறிஸ்தவ மதத்தின் அடிப்படை. எனவே நாங்கள் எந்த
கசப்புணர்வுகளையும் மனதில் வைத்துக் கொள்வது இல்லை. உலகிலேயே
மிகப்பெரிய மதம் கிறிஸ்தவம். அதற்கு விசாலமான இதயம் உண்டு. எனவே இங்கும்,
அங்கும் நடக்கும் சிறு விஷயங்களைப் பெரிதுபடுத்த விரும்புவதில்லை.கட்சிகளை
குறைகூற முடியாது: இந்தியா மிகப்பெரிய ஜனநாயக நாடு. அதில் காங்கிரஸ் ஆளும்
கட்சியாக உள்ளது. பாஜக அதற்கு அடுத்த நிலையில் உள்ளது. கட்சி
விஷயங்களில் வெவ்வேறு இடங்களில் பல்வேறு சம்பவங்கள் நிகழ்ந்திருக்கலாம்.
எதிர்காலத்திலும் நிகழும். அதற்காக ஒட்டுமொத்தமாக அந்தக் கட்சிகளையே
குற்றம்சாட்ட முடியாது.மக்களின் நலனுக்காகவும், எனது
மனசாட்சிப்படியும், ஜனநாயகத்தில் வலுவான போட்டி இருக்க வேண்டும் என்ற
கொள்கைக்காகவும் குடியரசுத் தலைவர் தேர்தலில் களம் காண்கிறேன்.அரசியல்
வாழ்வு முடிந்ததா? இந்தத் தேர்தலில் போட்டியிடுவதால் தேசியவாத காங்கிரஸில்
இருந்து நீக்கப்பட்டுள்ளதால், எனது அரசியல் வாழ்வு முடிவுக்கு
வந்துவிடாது. எனக்கு மக்களிடம் உள்ள செல்வாக்கு எப்போதும் குறையாது. அது
அதிகரித்துதான் செல்கிறது.தேர்தலில் எனக்கு ஆதரவு தருமாறு மம்தாவிடம் கேட்டுக் கொண்டுள்ளேன். இன்னும் காலம் அதிகம் இருக்கிறது. எனவே
அவரது சாதகமான முடிவுக்காக காத்திருக்கிறேன். இந்தியக் குடிமகனாக,
பழக்குடியின மக்களின் பிரதிநிதியாக குடியரசுத் தலைவர் பதவிக்குப்
போட்டியிடுகிறேன் என்றார் சங்மா.