போட்டியில் இல்லை: கலாம் திட்டவட்ட அறிவிப்பு

by **logu** Tue Jun 19, 2012 7:49 am

புது தில்லி, ஜூன் 18: ஐக்கிய முற்போக்குக் கூட்டணியின் குடியரசுத் தலைவர்
வேட்பாளரான பிரணாப் முகர்ஜியை எதிர்த்து தாம் போட்டியிடப் போவதில்லை என திங்கள்கிழமை
முன்னாள் குடியரசுத் தலைவர் ஏ.பி.ஜே. அப்துல் கலாம் அறிவித்தார்.
இது தொடர்பாக அவர் விடுத்திருக்கும் அறிக்கையில் கூறப்பட்டுள்ளதாவது:
நாட்டில் நிலவும் இப்போதைய அரசியல் நிலவரம், குடியரசுத் தலைவர் தேர்தலின்
ஒட்டுமொத்தத் தன்மை ஆகியவற்றைப் பரிசீலித்து நான் இந்த முடிவை எடுத்திருக்கிறேன்.
இன்னொரு முறை குடியரசுத் தலைவர் ஆக வேண்டும் என்று நான் விரும்பாவிட்டாலும்;
குடியரசுத் தலைவர் தேர்தலில் போட்டியிட வேண்டும் என நான் ஆசைப்படாவிட்டாலும், மம்தா
பானர்ஜி உள்ளிட்ட சில அரசியல் தலைவர்கள் என்னை வேட்பாளராக்க விரும்பினர். இந்திய
மக்களும் அவ்வாறே விரும்பினர். இது என் மீதான அவர்களின் அன்பையும் பற்றையும்
காட்டுவதாக உள்ளது. இந்த ஆதரவின் மூலம் நான் நெகிழ்ந்துபோனேன்.
அவர்களது விருப்பத்தை நான் மதிக்கிறேன். அவர்கள் என் மீது வைத்திருக்கும்
நம்பிக்கைக்கு நான் நன்றி தெரிவித்துக்கொள்கிறேன். இப்போதைய அரசியல் நிலவரம்,
குடியரசுத் தலைவர் தேர்தலின் ஒட்டுமொத்தத் தன்மை ஆகியவற்றை நான் பரிசீலித்துப்
பார்த்தேன். அதன் பிறகு 2012 குடியரசுத் தலைவர் தேர்தலில் போட்டியிடப் போவதில்லை என
முடிவெடுத்தேன். இவ்வாறு அப்துல் கலாம் தனது அறிக்கையில் தெரிவித்துள்ளார்.
கலாம் பெயரை மம்தா முன்வைத்த பிறகு, ஐக்கிய முற்போக்கு கூட்டணியுடன் அவர்
முரண்பட்டார். மேலும், பாரதிய ஜனதா கட்சியும் பிரணாப் முகர்ஜிக்கு எதிரான எதிர்க்
கட்சிகளின் பொது வேட்பாளராக அப்துல் கலாமை நிறுத்த பெரும் முயற்சி எடுத்துக்கொண்டது.
இதற்காக, அப்துல் கலாமை 3 முறை எல்.கே. அத்வானி தொலைபேசியில் தொடர்பு கொண்டார். அவரை
சம்மதிக்க வைக்க 2 முறை தனது நெருங்கிய உதவியாளர் சுதீந்திர குர்கர்னியை கலாம்
இல்லத்துக்கு அனுப்பிவைத்தார். இருந்தபோதிலும், குடியரசுத் தலைவர் தேர்தலில்
போட்டியிட தனது "மனசாட்சி' இடம்கொடுக்கவில்லை என கலாம் தெரிவித்துவிட்டதாக அவருக்கு
நெருங்கிய வட்டாரங்கள் தெரிவித்தன. திட்டவட்டமாக வெற்றிபெறுவோம் என்பது உறுதியாகத்
தெரிந்தால் மட்டுமே தன்னால் போட்டியிட முடியும் என அப்துல் கலாம் வலியுறுத்தி
வந்தார். அப்துல் கலாமின் திட்டம் என்ன என்பதைத் தெரிந்துகொள்ள ஞாயிற்றுக்கிழமை பல
எதிர்க்கட்சித் தலைவர்கள் அவரை தொலைபேசியில் தொடர்பு கொண்டனர்.
தமிழக முதல்வர் ஜெயலலிதா, ஒடிசா முதல்வர் நவீன் பட்நாயக் ஆகியோரால்
நிறுத்தப்பட்ட பி.ஏ. சங்மாவை ஆதரிப்பதைக் காட்டிலும் அப்துல் கலாமை நிறுத்தவே
பா.ஜ.க. விரும்பியது. பிரணாப் முகர்ஜி விஷயத்தில் கருத்தொற்றுமை தேவை என்று
கூறிவரும் ஐக்கிய ஜனதா தளம் கூட அப்துல் கலாமை ஆதரிக்கத் தயாராக இருந்தது.
மம்தாவின் நிலை: குடியரசுத் தலைவர் தேர்தலில் போட்டியிடவில்லை என அப்துல்
கலாம் அறிவித்துவிட்ட நிலையில், ஒரு திட்டவட்டமான முடிவினை எடுக்க வேண்டிய நிலைக்கு
திரிணமூல் காங்கிரஸ் தலைவர் மம்தா பானர்ஜி தள்ளப்பட்டுள்ளார். குடியரசுத் தலைவர்
தேர்தலில் போட்டியிடுவதிலிருந்து அப்துல் கலாம் விலகிவிட்டார் என இப்போதுதான்
கேள்விப்பட்டோம். இது தொடர்பாக மம்தா ஒரு முடிவெடுப்பார். அவர் எடுக்கும் முடிவு
ஊடகங்களுக்கு தெரிவிக்கப்படும் என திரிணமூல் காங்கிரஸின் மாநிலங்களவை உறுப்பினர்
குணால் கோஷ் தெரிவித்தார். அவர் மேலும் கூறியது:
மம்தாவும் திரிணமூல் காங்கிரஸýம் கலாம் பெயரை முன்மொழிந்ததன் மூலம் தங்கள்
கடமையை செய்தன. மம்தா எடுக்கும் எந்த முடிவும் ஊடகங்களுக்குத் தெரிவிக்கப்படும்
என்றார் குணால் கோஷ்.