ஐ.நா. குழுவை அனுமதிக்க இலங்கை இணக்கம்! அழுத்தத்துக்கு பணிந்த மகிந்த அரசு!!

ஐ.நா. மனித உரிமைகள் பேரவையின் உயர் மட்டக் குழுவை தமது நாட்டுக்குள் அனுமதிப்பதில்லை என்பதில்




இறுக்கமாக இருந்த இலங்கை அரசு, அந்த நிலைப்பாட்டைத் தளர்த்திக்கொண்டு ஐ.நா. குழுவை நாட்டுக்குள் அனுமதிப்பதற்கு இணக்கம் தெரிவிக்கும் என கொழும்புச் செய்திகள் கூறுகின்றன.

கடந்த மார்ச் மாதம் நடைபெற்ற ஜெனீவா கூட்டத் தொடரில் இலங்கைக்கு எதிரான தீர்மானம் ஒன்று அமெரிக்காவினால் கொண்டுவரப்பட்டு நிறைவேற்றப்பட்டது.

இதற்கமைய நல்லிணக்க ஆணைக்குழுவின் பரிந்துரைகள் நடைமுறைப்படுத்தப்படுவதைக் கண்காணிப்பதற்காகவும், அதற்கு உதவுவதற்காகவும் மனித உரிமைகள் பேரவையின் குழு ஒன்று இலங்கைக்கு அனுப்பிவைக்கப்படும் எனவும் தெரிவிக்கப்பட்டிருந்தது.

இருந்தபோதிலும் இவ்வாறான குழு ஒன்றை அனுமதிப்பதில்லை என்ற நிலைப்பாட்டையே இலங்கை அரசாங்கம் வெளிப்படுத்திவந்தது. எனினும் தற்போது சர்வதேச ரீதியான அழுத்தங்கள் அதிகரித்துவருவதால், இவ்விடயத்தில் சாதகமான பிரதிபலிப்பை வெளிப்படுத்துவதற்கு தீர்மானித்திருப்பதாக கொழும்பு ஆங்கில வாரப் பத்திரிகை ஒன்று இன்று செய்தி வெளியிட்டுள்ளது.

இது தொடர்பில் இலங்கை அரசாங்கத்தின் பதில் அடுத்த வார முற்பகுதியில் ஜெனீவாவுக்கு அனுப்பிவைக்கப்படும் எனத் தெரிவிக்கப்படுகின்றது.

ஜனாதிபதி மகிந்த ராஜபக்‌ச நாட்டில் இல்லாத நிலையிலேயே இந்தப் பதில் அனுப்பிவைக்கப்படவிருக்கின்றது. மகிந்த ராஜபக்‌ச கியூபா மற்றும் பிரேஸில் ஆகிய நாடுகளுக்கான பயணம் ஒன்றை தற்போது மேற்கொண்டிருக்கின்றார். எதிர்வரும் வெள்ளிக்கிழமையே அவர் நாடு திரும்புவார் எனத் தெரிவிக்கப்படுகின்றது.

தமது குழு ஒன்றை அனுப்பிவைப்பதற்கான கோரிக்கையை மனித உரிமைகள் பேரவை கடந்த மாதம் அனுப்பிவைத்திருந்தது. மனித உரிமைகள் ஆணையாளர் நவநீதம்பிள்ளையின் விஜயத்துக்கான முன்னோடியாக இந்தக் குழுவின் வருகை அமையும் எனக் கருதப்பட்டதால் இதனை அனுமதிப்பதில்லை என்ற நிலைப்பாட்டை இலங்கை அரசாங்கம் முதலில் வெளிப்படுத்தியிருந்தது.

இருந்தபோதிலும் சர்வதேச ரீதியான அழுத்தங்கள் அதிகரித்துவரும் நிலையில், இந்தக் கோரிக்கையை ஏற்றுக்கொள்ள வேண்டிய நிர்ப்பந்தம் மகிந்த ராஜபக்‌ச அரசுக்கு ஏற்பட்டிருப்பதாக இராஜதந்திர வட்டாரங்கள் தெரிவித்தன.

கற்றுக்கொண்ட பாடங்கள் மற்றும் நல்லிணக்க ஆணைக்குழுவின் பரிந்துரைகளை நடைமுறைப்படுத்துவதற்கு ஐ.நா. மனித உரிமைகள் பேரவையுடன் இணைந்து செயற்பட முன்வர வேண்டும் என ஐ.நா. செயலாளர் நாயகம் பான் கீ மூன் சில தினங்களுக்கு முன்னர்தான் இலங்கை அரசாங்கத்தைக் கோரியிருந்தார் என்பதும் கவனிக்கத்தக்கது.