பெரியாறு அணை விவகாரம்: அரசியல் சட்ட அமர்வுக்கு அனுப்பியதால் உரிமை இழந்தோம்- வைகோ குற்றச்சாட்டு

கம்பம், ஜூன் 16: முல்லைப் பெரியாறு அணை விவகாரத்தை, அரசியல் சட்ட அமர்வுக்கு
அனுப்ப தமிழக அரசு வழக்குரைஞர் ஒப்புதல் வழங்கியதால், அணை மீதான உரிமையை இழக்கும்
சூழல் ஏற்பட்டது என்று மதிமுக பொதுச் செயலாளர் வைகோ தெரிவித்தார்.
முல்லைப் பெரியாறு அணையில் பரிசோதனைக்காக போடப்பட்ட துளைகளை அடைக்கும் பணிக்கு,
கேரள அரசு முட்டுக்கட்டை போடுவதைக் கண்டித்து மதிமுக சார்பில் கம்பத்தில் சனிக்கிழமை
ஆர்ப்பாட்டம் நடைபெற்றது.
ஆர்ப்பாட்டத்துக்கு தலைமைவகித்து வைகோ பேசியது: முல்லைப் பெரியாறு அணை
1961-ம் ஆண்டு வரை, தமிழக காவல் துறையின் பாதுகாப்பில் இருந்தது. பின்னர், அணையின்
பாதுகாப்பை கேரள காவல் துறையினரிடம் தமிழக அரசு ஒப்படைத்தது. இந்த நிலையில், பேபி
அணையை வலுப்படுத்திய பின்னர், பெரியாறு அணை நீர்மட்டத்தை 152 அடியாக உயர்த்திக்
கொள்ள உச்ச நீதிமன்றம் 2006-ல் தீர்ப்பு அளித்தது.
இத் தீர்ப்புக்கு எதிராக, கேரள அரசு 2006 செப்டம்பரில் அணைகள் பாதுகாப்பு
சிறப்புச் சட்டத் திருத்தம் கொண்டு வந்தது.
தமிழகத்துக்குச் சொந்தமான பெரியாறு அணை, கேரள அணைகள் பாதுகாப்பு ஆணையத்தின்
கட்டுப்பாட்டுக்குள் கொண்டு வரப்பட்டுள்ளதாகத் தெரிவித்தது.
இதனை எதிர்த்து, அப்போதைய அதிமுக அரசு சார்பில் உச்ச நீதிமன்றத்தில் வழக்குத்
தொடரப்பட்டது. இந்த வழக்கில் கேரள அரசு பலமுறை வாய்தா வாங்கியது. பின்னர், திமுக
ஆட்சியின்போது பெரியாறு அணை விவகாரத்தை, அரசியல் சட்ட அமர்வின் விசாரணைக்கு
மாற்றுவதற்கு உச்ச நீதிமன்றத்தில் தமிழக அரசு வழக்குரைஞர் ஒப்புதல் அளித்தார்.
இதனால் உச்ச நீதிமன்றம் ஐவர் குழுவை அமைப்பதற்கும், அணையில் பரிசோதனைகள்
நடத்துவதற்கும் காரணமாக இருந்தது. அணையின் பாதுகாப்புக்கு தமிழக காவல் துறையை
அனுப்பும் நிலை ஏற்படும் என்று பிரதமருக்கு, தமிழக முதல்வர் கடிதம் எழுதியதால்,
அணையில் துளைகளை அடைப்பதற்கு கேரள காவல் துறையினர் அனுமதி வழங்கினர். பின்னர்,
துளைகளை அடைக்கும் பணிக்கு இடையூறு செய்யும் வகையில் சிமென்ட் மூட்டைகள் கொண்டு
செல்வதை கேரள வனத் துறையினர் தடுத்தனர்.
தற்போது தமிழக எல்லையில் உள்ள கம்பத்தில், கேரள அரசுக்கு எதிராக ஆர்ப்பாட்டம்
அறிவிக்கப்பட்ட நிலையில், அணைப் பகுதிக்கு சிமென்ட் மூட்டைகள் கொண்டு செல்ல இரவோடு
இரவாக கேரள அரசு மீண்டும் அனுமதி அளித்துள்ளது.
பெரியாறு அணையை உடைக்கும் நோக்கத்துடன் கேரள அரசும், அரசியல் கட்சியினரும்
திட்டமிட்டு செயல்பட்டு பீதியைக் கிளப்பி வருகின்றனர். கேரள மக்கள் தமிழர்களுக்கு
எதிரி அல்ல. இதை கேரள மக்களும், ஊடகங்களும் புரிந்துகொண்டு கேரள அரசுக்கும், அரசியல்
கட்சியினருக்கும் உணர்த்த வேண்டும் என்றார் வைகோ. ஆர்ப்பாட்டத்தில், ஓய்வுபெற்ற
பொதுப்பணித் துறை முன்னாள் முதன்மைப் பொறியாளர் ஆர்.வி. விஜயகுமார், விவசாய சங்கத்
தலைவர் கே.எம். அப்பாஸ் உள்ளிட்டோர் கலந்து கொண்டனர்.
தமிழகம்- கேரளம் இடையே போக்குவரத்து நிறுத்தம்:
வைகோ தலைமையில் நடைபெற்ற ஆர்ப்பாட்டத்தை முன்னிட்டு சனிக்கிழமை குமுளி, கம்பம்
மெட்டு வழியாக தமிழக-கேரளப் பகுதிகளுக்கு போக்குவரத்து நிறுத்தி வைக்கப்பட்டது.
ஆர்ப்பாட்டத்தை முன்னிட்டு, 25 காவல் துணைக் கண்காணிப்பாளர்கள் தலைமையில் 8
மாவட்டங்களைச் சேர்ந்த 500-க்கும் மேற்பட்ட போலீஸôர் பாதுகாப்புப் பணியில் ஈடுபட்டனர்.