போக்குவரத்துக் கழக ஊழியர்களுக்கு 7% அகவிலைப்படி உயர்வு

சென்னை, ஜூன் 6: அரசு போக்குவரத்துக் கழக ஊழியர்களுக்கு 7 சதவீத அகவிலைப்படி
உயர்வு அளிக்கப்படும் என முதல்வர் ஜெயலலிதா அறிவித்துள்ளார்.
இது குறித்து அவர் புதன்கிழமை வெளியிட்டுள்ள செய்திக் குறிப்பு:
தமிழ்நாட்டில் உள்ள 8 போக்குவரத்துக் கழகங்களில் பணியாற்றும் அலுவலர்கள்,
தொழில்நுட்பப் பணியாளர்கள் மற்றும் தொழிலாளர்களுக்கு வழங்கி வரும் அகவிலைப்படியை
1.1.2012 முதல் 58 சதவீதத்திலிருந்து 65 சதவீதமாக உயர்த்தி வழங்க உத்தரவிட்டுள்ளேன்.
இந்த அகவிலைப்படி உயர்வு, போக்குவரத்துக் கழகங்களில் பணியாற்றி ஓய்வுபெற்ற
பணியாளர்களுக்கும், குடும்ப ஓய்வூதியர்களுக்கும் பொருந்தும். மேலும், இந்த
அகவிலைப்படி உயர்வானது நிலுவை இல்லாமல் ரொக்கமாக 1.1.2012 முதல் வழங்கப்படும்.
இதனால் அரசு போக்குவரத்துக் கழகங்களுக்கு கூடுதலாக மாதம் ஒன்றுக்கு ரூ. 10.55 கோடி
செலவாகும்.
இந்த அகவிலைப்படி உயர்வின் மூலம் போக்குவரத்துக் கழகங்களில் பணிபுரியும்
1,19,764 பணியாளர்கள், 41,520 ஓய்வூதியர்கள் மற்றும் குடும்ப ஓய்வூதியர்கள் பயன்
பெறுவர்.
இப்போது அளிக்கப்பட்டுள்ள அகவிலைப்படி, அரசுப் போக்குவரத்துக் கழகங்களில்
பணியாற்றும் தொழிலாளர்களும், பணியாளர்களும் மேலும் ஊக்கத்துடனும், உற்சாகத்துடனும்
பணியாற்ற உத்வேகம் அளிக்கும் என நம்புகிறேன் என்றார் முதல்வர் ஜெயலலிதா.
இந்த 7 சதவீத அகவிலைப்படி உயர்வின் மூலம் ஊழியர்களுக்கு குறைந்தபட்சம் ரூ.
350 முதல் ரூ. 1,500 வரை கிடைக்கும் என தொழிற்சங்க வட்டாரங்கள் தெரிவித்தன.