விசைத்தறி நெசவாளர்களுக்கு மின் கட்டணச் சலுகை

சென்னை, மே 10: வேலைநிறுத்தப் போராட்டத்தில் ஈடுபட்டுள்ள விசைத்தறி
நெசவாளர்களுக்கு பல்வேறு வகையான மின் கட்டணச் சலுகைகளை முதல்வர் ஜெயலலிதா
அறிவித்துள்ளார்.
பேரவையில் விதி 110-ன் கீழ் முதல்வர் ஜெயலலிதா வியாழக்கிழமை பேசியதாவது:
வேளாண்மைக்கு அடுத்தபடியாக ஊரகப் பகுதி மக்களின் வாழ்வாதாரமாக விளங்குவதிலும்,
நாட்டின் ஏற்றுமதியைப் பெருக்குவதிலும் முக்கியப் பங்கு வகிப்பது நெசவுத் தொழில்.
இத் தொழிலின் வளர்ச்சிக்கு தமிழக அரசு முன்னுரிமை அளித்து வருகிறது.
தமிழ்நாடு மின்சார ஒழுங்குமுறை ஆணையம், கடந்த மார்ச்சில் மின் கட்டண விகித
மாற்றம் குறித்த ஆணையை வெளியிட்டது. அதில் விவசாயிகள், விசைத்தறி நெசவாளர்கள்,
வீட்டு மின் பயனீட்டாளர்கள் உள்ளிட்டவர்களுக்கு ரூ. 3,554.16 கோடிக்கு கட்டணச்
சலுகையை அரசு வழங்கியிருந்தது. மேலும், ரூ. 740 கோடி மானியத்தையும் பேரவையில்
அறிவித்தேன்.
இந்தக் கட்டணச் சலுகையின்படி, விசைத்தறி நெசவாளர்கள் தற்போது இரு மாதங்களுக்கு
பயன்படுத்தும் முதல் 500 யூனிட்டுகளுக்கு கட்டணம் ஏதும் செலுத்த வேண்டியதில்லை. 500
யூனிட்களுக்கு மேல் மின்சாரம் பயன்படுத்தும் விசைத்தறி நெசவாளர்கள், 501-வது
யூனிட்டிலிருந்து, ஒரு யூனிட்டுக்கு ரூ. 4 கட்டணம் செலுத்த வேண்டும்.
அதாவது, முதல் 500 யூனிட் வரை விசைத்தறி நெசவாளர்களுக்கு ஒரு யூனிட்டிற்கு
ரூ. 4.50 என்று தமிழ்நாடு மின்சார ஒழுங்குமுறை ஆணையம் கட்டணம் நிர்ணயித்திருந்தது.
எனினும், அந்த கட்டணத்தை அரசே ஏற்று, அவர்களுக்கு கட்டணம் இல்லாத சலுகை
வழங்கப்பட்டது. 500 யூனிட்டுகளுக்கு மேல் மின்சாரத்தை பயன்படுத்தும் விசைத்தறி
நெசவாளர்களுக்கு, தமிழ்நாடு மின்சார ஒழுங்குமுறை ஆணையம் ஒரு யூனிட்டுக்கு ரூ.5 என்று
கட்டணம் விதித்திருந்த போதிலும், ஒரு யூனிட்டுக்கு ஒரு ரூபாய் மானியத்தை அரசு வழங்கி
வருகிறது.
அதன்படி விசைத்தறி நெசவாளர்களிடமிருந்து ஒரு யூனிட்டுக்கு ரூ.4 மட்டுமே
கட்டணமாக வசூலிக்கப்பட்டு வருகிறது. இதனால் இந்த ஆண்டு விசைத்தறி நெசவாளர்களுக்கு
மானியம் வழங்க ரூ.153.15 கோடியை அரசு ஒதுக்கீடு செய்தது.
எனினும், தற்போது செலுத்தப்பட வேண்டிய மின் கட்டணம் உயர் அளவாக உள்ளது என்றும்,
அது குறைக்கப்பட வேண்டும் என்றும் விசைத்தறி நெசவாளர்கள் கோரிக்கைகள் விடுத்துள்ளனர்.
இதனை வலியுறுத்தி கடந்த சில நாள்களாக வேலைநிறுத்தம் மேற்கொண்டுள்ளனர்.
கூடுதல் சலுகை: விசைத்தறி நெசவாளர்களின் இந்த கோரிக்கைகளை கனிவுடன்
பரிசீலித்த அரசு, அவர்களுக்குக் கூடுதல் சலுகைகளை வழங்க தற்போது முடிவு எடுத்துள்ளது.

அதன்படி, 2 மாதங்களுக்கு 500 யூனிட்டுகள் வரை பயன்படுத்தும் விசைத்தறி
நெசவாளர்களுக்கான கட்டணம் இல்லாத சலுகை தொடரும். இதனால் 69,476 விசைத்தறி மின்
நுகர்வோர் பயனடைவர்.
2 மாதங்களுக்கு 501 முதல் 1000 யூனிட்டுகள் வரை பயன்படுத்தும்
உபயோகிப்பாளர்கள் தற்போதுள்ள கட்டணமான ரூ. 4-க்குப் பதிலாக யூனிட் ஒன்றுக்கு ரூ. 2
மட்டும் செலுத்தினால் போதும்.
அதாவது, அவர்களுக்கு யூனிட் ஒன்றுக்கு ஏற்கெனவே வழங்கப்பட்டு வரும் ஒரு
ரூபாயுடன், கூடுதலாக ரூ.2 மானியம் வழங்கப்படும். இதன் மூலம் 24,171 விசைத்தறி
மின்நுகர்வோர் பயனடைவார்கள். இரண்டு மாதங்களுக்கு 1001 முதல் 1500 யூனிட்டுகள் வரை
பயன்படுத்தும் உபயோகிப்பாளர்கள் தற்போதுள்ள கட்டணமான ரூ. 4-க்கு பதிலாக யூனிட்
ஒன்றுக்கு ரூ.3 மட்டுமே செலுத்தினால் போதும்.
அதாவது, அவர்களுக்கு ஏற்கெனவே யூனிட் ஒன்றுக்கு வழங்கப்பட்டு வரும் ஒரு ரூபாய்
மானியத்துடன், கூடுதலாக ஒரு ரூபாய் மானியத்தை அரசு வழங்கும். இதன் மூலம் 9,297
விசைத்தறி மின்நுகர்வோர் பயனடைவார்கள்.
இரண்டு மாதங்களில் 1,500 யூனிட்டுகளுக்கும் அதிகமாக மின்சாரத்தை பயன்படுத்தும்
28,056 நெசவாளர்கள், இப்போது அனுபவித்து வரும் ஒரு ரூபாய் மானியத்தை தொடர்ந்து
பெறுவார்கள். மேலும், முதல் 500 யூனிட்டுகள் கட்டணம் ஏதுமின்றியும், 501 முதல் 1500
யூனிட்டுகள் வரை உள்ள பயன்பாட்டுக்கான சலுகைகளையும் பெறுவார்கள்.
இந்த சலுகைகளின் காரணமாக, ரூ. 47.05 கோடி கூடுதல் மானியமாக தமிழ்நாடு மின்சார
வாரியத்துக்கு தமிழக அரசு வழங்கும். இதுமட்டுமன்றி நிலையான கட்டணமாக, கிலோவாட்
ஒன்றுக்கு தமிழ்நாடு மின்சார ஒழுங்கு முறை ஆணையம் நிர்ணயித்த கட்டணமான ரூ.50 என்பது
ரூ.30 ஆக குறைக்கப்படும். இதற்காக அரசு ரூ.12.64 கோடியை தமிழ்நாடு மின்சார
வாரியத்திற்கு மானியமாக வழங்கும்.
இப்போது அறிவிக்கப்பட்ட இந்த சலுகைகளால் விசைத்தறி பயனீட்டாளர்களுக்கான
மானியத் தொகை ஆண்டொன்றுக்கு ரூ.153.15 கோடியிலிருந்து ரூ.212.84 கோடியாக
அதிகரிக்கும். இந்த அதிகரிக்கப்பட்ட மானியத் தொகையான ரூ.59.69 கோடியை தமிழ்நாடு
மின்சார வாரியத்திற்கு தமிழக அரசு வழங்கும்.
இந்த சலுகைகள் மூலம் நெசவுத் தொழிலை நம்பியுள்ள நெசவாளர்கள் நலம் பெற்று
வளமான வாழ்வு பெறுவார்கள் என்றார் முதல்வர் ஜெயலலிதா.