அணை ஒப்பந்தத்தை ரத்து செய்ய கேரளா தீவிரம்: சட்ட வல்லுனர்களுடன் ஆலோசனை

தமிழகத்திற்கும், கேரளாவுக்கும் இடையே, 999 ஆண்டுகளுக்கான முல்லைப்
பெரியாறு அணை ஒப்பந்தத்தை ரத்து செய்ய வேண்டும் என்பதில், கேரள அரசு தீவிர
நடவடிக்கைகளில் ஈடுபட்டு வருகிறது. இது, அம்மாநிலத்தில் நடைபெற உள்ள
இடைத்தேர்தலுக்கான நாடகமாகவும் கருதப்படுகிறது.

முல்லைப் பெரியாறு அணை பிரச்னை குறித்து, தமிழக, கேரள மாநிலங்களுக்கு
இடையே இருந்துவரும் பிரச்னையை தீர்க்க, சுப்ரீம் கோர்ட் நியமித்த
உயர்மட்டக்குழு, தனது அறிக்கையை, கடந்த 25ம் தேதி சுப்ரீம் கோர்ட்டில்
தாக்கல் செய்தது. இதில், முல்லைப் பெரியாறு அணை உறுதியுடன் இருப்பதாகவும்,
அதற்கு பதிலாக புதிய அணை கட்டத் தேவையில்லை என்றும், அணையின் நீர்மட்டத்தை
142 அடியாக உயர்த்திக் கொள்ளலாம் என்றும் குறிப்பிட்டுள்ளது.இந்த அறிக்கை,
முல்லைப் பெரியாறில் புதிய அணை கட்டலாம் என்று எதிர்பார்ப்புடன்
காத்திருந்த கேரளாவுக்கு, பெருத்த ஏமாற்றத்தை அளித்தது. சுப்ரீம் கோர்ட்
நியமித்த உயர்மட்டக்குழுவில், கேரள அரசு சார்பில் பணியாற்றிய நீதிபதி
கே.டி.தாமஸ் குறித்து, மாநிலத்தில் கடும் விமர்சனங்கள் எழுந்தன.

கேரளா எதிர்ப்பு:உயர்மட்டக்குழுவின் அறிக்கையில், முல்லைப்
பெரியாறு அணை எத்தனை காலத்திற்கு பாதுகாப்பானது என்பது குறித்து தெளிவாக
குறிப்பிடவில்லை என்றும், அதுகுறித்து தெளிவாக விளக்கப்பட வேண்டும்
என்றும், கேரள அரசு கருதுகிறது. இதற்காக, சுப்ரீம் கோர்ட்டை அணுகவும்
முடிவு செய்துள்ளது.முல்லைப் பெரியாறு அணையில், தமிழகத்திற்கு நீர் பெற,
இரு மாநிலங்களுக்கு இடையே, 999 ஆண்டுக்கால ஒப்பந்தம் அமலில் உள்ளது. இதில்,
119 ஆண்டுகள் தான் முடிந்துள்ளது. இந்நிலையில், அணை பலமிழந்து
விட்டதாகவும், அதனால் அணையின் நீர்மட்டத்தை தற்போதுள்ள 136 அடியில்
இருந்து, 120 அடியாக குறைக்க வேண்டும் என்றும், பலமிழந்து விட்ட அணைக்குப்
பதிலாக, புதிய அணை கட்ட வேண்டும் என்றும், கேரள அரசும், அங்குள்ள
கட்சிகளும் மத்திய அரசை வலியுறுத்தி வருகின்றன.

அணை பாதுகாப்பானது:இதுகுறித்து ஆராய்ந்த உயர்மட்டக்குழு,
முல்லைப் பெரியாறு அணை அமைப்பு ரீதியாகவும், நிலம் மற்றும் நீர் சார்ந்த
ஆய்வுகளின் அடிப்படையில் பார்த்தால், அணையின் கட்டுமானம் பாதுகாப்பாக
உள்ளது. எனவே, அணையில் சில பராமரிப்புப் பணிகளை மேற்கொண்ட பின், அணையின்
நீர்மட்டத்தை தற்போதுள்ள, 136 அடியிலிருந்து 142 அடி வரை
உயர்த்தலாம்.மேலும், அணையானது நிலநடுக்கத்தை தாங்கும் வகையிலும் உள்ளது.
கடந்த ஆண்டு, இடுக்கி பகுதியில், பலமுறை நிலநடுக்கங்கள் ஏற்பட்டும்,
அதனால், அணைக்கு எந்த பாதிப்பும் ஏற்படவில்லை. அதேபோல், அப்பகுதியில் உள்ள
இடுக்கி அணைக்கும் பாதிப்பு ஏற்படவில்லை என அறிக்கையில் குறிப்பிட்டது.

சுப்ரீம் கோர்ட்டை அணுக முடிவு:தாங்கள் எதிர்பார்த்ததுபோல்,
அறிக்கை அமையாததால், அதிருப்தியில் உள்ள கேரள அரசு, ஒப்பந்தத்தை
எப்படியாவது ரத்து செய்து விட நடவடிக்கைகளை மேற்கொண்டு வருகிறது. இதற்காக,
டில்லியில் சட்ட வல்லுனர்களுடன் ஆலோசனைகளை துவக்கிவிட்டது. இதற்காக
விரைவில், சுப்ரீம் கோர்ட்டை அணுகவும் முடிவு செய்துள்ளது.

"தமிழக அரசு விருந்தினர் மாளிகையில் தங்கவில்லை':சுப்ரீம் கோர்ட்
நியமித்த உயர்மட்டக்குழுவில், என்னை வற்புறுத்தி கேரள அரசு சார்பில்
நியமித்த பிறகு, தற்போது என்னை பற்றி விமர்சனங்கள் செய்து வருகின்றனர்.
தமிழகத்திற்கு ஆதரவாக செயல்படவும் இல்லை; தமிழக அரசின் விருந்தினர்
மாளிகையில் தங்கவும் இல்லை.நான் இந்த பொறுப்புக்கு வந்த பிறகு,
உயர்மட்டக்குழு ஆலோசனை கூட்டங்களுக்காக, சுப்ரீம் கோர்ட் விருந்தினர்
மாளிகையில் 13 முறையும், நான்கு முறை கேரள விருந்தினர் மாளிகையிலும்,
ஒரேயொரு முறை கோவா மாநில விருந்தினர் மாளிகையிலும் தங்கினேன். ஆலோசனைக்
கூட்டங்களுக்கு செல்லும்போது, தங்குமிடம், உணவு போன்ற வசதிகளை
உயர்மட்டக்குழு அதிகாரிகள் தான் செய்து தருகின்றனர். இவ்வாறு, கேரள அரசு
சார்பில் உயர்மட்டக்குழுவில் இடம் பெற்ற நீதிபதி கே.டி.தாமஸ், தான் எழுதிய
நூலில் குறிப்பிட்டுள்ளார்.