சென்னை அருகே சட்ட விரோதமாக கப்பல் உடைக்கும் தளம்

எண்ணூரில் சட்ட விரோதமாக கப்பல்களை உடைக்கும் தளம் செயல்படுகிறது. இங்கு
கப்பல்களை உடைக்க, பொதுப்பணித் துறை, மாசு கட்டுப்பாட்டு சான்று மற்றும்
சம்பந்தப்பட்ட உள்ளாட்சித் துறையின் அனுமதி பெறப்பட்டதா என்ற கேள்வி
எழுந்துள்ளது.

கடலோர காவல் படையில் ரோந்துக் கப்பல்கள் அதிகளவு பயன்படுத்தப்படுகின்றன.
இந்த கடலோர காவல் படை கப்பல்கள், கடல் எல்லையில் அத்துமீறி நுழையும்
கப்பல்கள், கள்ளக்கடத்தல் கும்பல்கள் நடமாட்டம் உள்ளிட்டவற்றை தீவிரமாகக்
கண்காணிக்கும் பணியில் ஈடுபடுகின்றன.

95 சதவீதம் இரும்பு:பயன்படுத்திய பின் ஒதுக்கப்படும் கப்பலில்
உள்ள கதிரியக்கம் உருவாக்கும் பொருட்கள், ஆஸ்பெஸ்டாஸ் உள்ளிட்ட நச்சுப்
பொருட்களை அகற்றிய பின், இந்த கப்பல்களை உடைக்கும் தளத்திற்கு அனுப்ப
வேண்டும். உடைக்கப்படும் கப்பலில் 95 சதவீதம் தரமான இரும்பு
கிடைக்கிறது.ஒரு கப்பலில் 95 சதவீதம் உயர் தர இரும்பால் செய்யப்பட்டது.
மீதமுள்ள 5 சதவீதம் இரும்பு அல்லாத உலோகங்கள், வண்ணப்பூச்சுகள், மின்
பொருட்கள், ஒயர்கள், இதர கட்டுமானப் பொருட்கள் அடங்கும்.

ஒருவார பணி:கடலோர காவல் படையினர் பயன்படுத்திய இரண்டு
கப்பல்கள், சமீபத்தில் சென்னையில் ஏலம் விடுவதாக அறிவிப்பு வெளியாகியது.
இந்த அறிவிப்பையடுத்து, கடலோர காவல் படை கப்பல்களை ஏலத்தில் எடுத்தவர்கள்,
கப்பல்களை உடைக்கும் தளமான குஜராத் அல்லது விசாகப்பட்டினத்துக்குத் தான்
எடுத்துச் செல்ல வேண்டும் என்று கூறப்பட்டது.ஆனால், அவ்வாறு செய்யாமல்
சென்னை அருகே எண்ணூர் நெட்டுக்குப்பம் கடற்கரையில், 55 மீட்டர் நீளம் கொண்ட
இரண்டு கடலோர காவல் படை கப்பல்களை நிறுத்தியுள்ளனர். அங்கு ஆட்களை வைத்து,
கடந்த ஒரு வாரமாக உடைக்கும் பணியில் ஈடுபட்டு வருகின்றனர். தற்போது
உடைக்கப்படும் கப்பல் 115 டன் எடையும், சிறிது தூரத்தில் நிறுத்தப்பட்டுள்ள
கப்பல் 140 டன் எடையும் கொண்டது.

கப்பல் உடைக்கும் பணி கடற்கரைப் பகுதியில் நடைபெறுவதால், இந்த நச்சு
ரசாயனங்கள் உபயத்தால் கடற்கரை நீர் மாசுபட்டு நீர்வாழ் உயிரிகளும், அவற்றை
உட்கொள்ளும் மனிதர்களும் பாதிக்கப்படுகின்றனர். பெயின்ட் போன்ற
வண்ணப்பூச்சுகளை அகற்றுவதற்காக அவை எரிக்கப்படுகின்றன.

கப்பல்களை உடைக்கும் பணியில் ஈடுபட்டுள்ள முகமது அக்கில் கூறுகையில்,
"இக்கப்பல்களில் ஒன்றை கடந்த ஒரு வாரத்திற்கு மேலாக வெல்டிங் மூலம்
பிரித்தெடுக்கும் பணி நடந்து வருகிறது. தற்போது உடைக்கப்படும் கப்பல், 115
டன் எடை கொண்டது. மற்றொரு கடலோர காவல் படை கப்பல், 140 டன் எடையுள்ளது. ஒரு
கப்பலை தனித்தனியாக பிரித்தெடுக்க குறைந்தபட்சம் மூன்று மாதம் ஆகும்'
என்றார்.

செய்தி வேண்டாம்:கப்பலை ஏலத்தில் எடுத்துள்ள இலியாஸ் கூறுகையில்,
"இங்கு கப்பல்கள் உடைப்பது குறித்து எம்.எல்.ஏ., கவுன்சிலர்கள் மற்றும்
அதிகாரிகளுக்குத் தெரியும். எனவே, இது பற்றி எதுவும் கேட்க வேண்டாம்;
செய்தியும் வெளியிட வேண்டாம். இதனால், மக்களுக்கு என்ன பயன்' என்றார்.

சென்னை மாநகராட்சி திருவொற்றியூர் மண்டலக் குழுக் கூட்டத்தில் பேசிய கவுன்சிலர் ஒருவர்,
எண்ணூர் நெட்டுக்குப்பத்தில் கப்பல்கள் உடைக்கப்படுகின்றன. அதற்கு யார்
அனுமதி அளித்தது. பொதுப்பணித் துறை, மாசு கட்டுப்பாட்டுத் துறை சான்று,
மாநகராட்சி அனுமதி பெறப்பட்டதா என்று கேள்வி எழுப்பினார்.