ஏகபோக கும்பலின் ஆதிக்கம்: ஆபரேட்டர்கள் கொதிப்பு

கேபிள் தொழிலில் ஏற்கனவே ஆதிக்கம் செலுத்தி, கோடிக்கணக்கில் சம்பாதித்த
நிறுவனம், அரசு கேபிள் வாரியத்தை கையில் போட்டுக் கொண்டு, மீண்டும்
ஆதிக்கம் செலுத்த முயற்சி நடக்கிறது என்று கேபிள் ஆபரேட்டர்கள் தரப்பில்
குற்றஞ்சாட்டப்படுகிறது.

இது குறித்து கேபிள் ஆபரேட்டர்கள் தரப்பில் கூறப்படுவதாவது:
கடந்த ஆட்சியில் கேபிள் ஆபரேட்டர்களையும், பொதுமக்களையும் வாட்டி வதைத்த
சர்வாதிகார கும்பலுக்கு முடிவு கட்டும் வகையில், அரசு கேபிள் வாரியம்
செயல்படும் என்ற நம்பிக்கையோடு, ஆபரேட்டர்கள் இருந்தனர். கடந்த ஆகஸ்ட்
மாதம் கேபிள் வாரியத்திடம், 34 ஆயிரத்து 900 பேர் ஆபரேட்டர்களாக பணியாற்ற,
தலா 1,000 ரூபாய் கட்டி பதிவு செய்தனர். இவர்களில் 20 ஆயிரம் ஆபரேட்டர்கள்
ஏற்கனவே தொழிலில் இருந்தவர்கள்.

வாக்குறுதி என்ன ஆச்சு? இது தவிர, அந்தந்த ஊர்களில்
கட்டுப்பாட்டு அறை நடத்தி வந்தவர்கள், 2,000 ரூபாய் செலுத்தி பதிவு
செய்தனர். இவர்களுக்கு வழங்கப்படுவதாக சொன்ன கட்டணம், சலுகைகள் உட்பட
எதையும் இதுவரை கேபிள் வாரியமோ, அரசோ வழங்கவில்லை. அ.தி.மு.க., தேர்தல்
அறிக்கையில், அரசின் மானிய தொகையோடு, கேபிள் கட்டணம் குறைக்கப்படும் என்று
அறிவித்தனர். ஆனால், இதுவரை ஒரு ரூபாய் கூட கொடுக்கவில்லை. இந்த நிலையில்,
செப்டம்பர் 2ம்தேதி முதல் அரசு கேபிள் ஒளிபரப்பை தொடங்கினர். ஒரு
இணைப்புக்கு 70 ரூபாய் கட்டணம் வாங்க வேண்டும் என்றும், அதில், அரசுக்கு 22
ரூபாய் (வரியோடு சேர்த்து) மீதி தொகையை கேபிள் ஆபரேட்டர்கள் வைத்துக்
கொள்ளலாம் என்று அறிவித்தார்கள். ஒரு இணைப்புக்கு 48 ரூபாய் எங்களுக்கு
வழங்கப்படுகிறது. இதில், பணியாளர் சம்பளம், இணைப்பு சரி செய்ய செலவு,
டிரான்ஸ்மீட்டர், கேபிள் போன்றவை மாற்றுதல் என, அனைத்தையும் செய்து கொள்ள
முடியாமல் கஷ்டப்படுகிறோம்.

"ஈகோ' யுத்தம்: அதே நேரத்தில், கட்டண சேனல்களுக்கு பெரும்தொகை
தாராளமாக தரப்படுகிறது. இதற்கான நிர்ணயம் செய்ததில் முறைகேடு நடந்துள்ளதாக
கூறப்படுகிறது. உள்ளூர் சேனல் ஒதுக்கீடு விஷயத்திலும் பெரும் முறைகேடு
நடந்து உள்ளது. அரசு கேபிள் வாரியத்தின் தலைவருக்கும், அதிகாரிகளுக்கும்
இடையே, "ஈகோ' யுத்தம் நடக்கிறது. இதைப் பயன்படுத்தி, முன்பு கேபிள்
தொழிலில் ஆட்சி நடத்தியவர்கள் தங்களது, ஆட்கள் மூலமாக வாரியத்தையே தங்கள்
கட்டுப்பாட்டில் கொண்டு வர முயற்சிக்கின்றனர்.

கட்டண சேனல்கள் மீது அக்கறை: அரசு கேபிள் வாரியத்திற்கு
கட்டுப்படாமல், யுத்தம் நடத்தும் சேனலின் வினியோகஸ்தராக இருந்த ஒருவர்
மூலம் கட்டுப்பாட்டு அறைகளை பிரித்து கொடுத்து உள்ளனர். அரசு நிர்ணயம்
செய்த 70 ரூபாயுடன், 10 ரூபாய் சேவைக்கட்டணத்தையும் சேர்த்து வாங்க
அவர்களுக்கு அனுமதி வழங்கப் பட்டு உள்ளது. தற்போது குறிப்பிட்ட கட்டண
சேனலுக்கு மாதம் எட்டு கோடி ரூபாய் வரை கொடுக்க, பேச்சுவார்த்தையில்
உடன்பாடு ஏற்படுத்தப்பட்டதாக தகவல் கிடைத்திருக்கிறது. தனிப்பட்ட ஒரு
சேனலுக்கு அவ்வளவு பெரிய தொகையை கொடுப்பதில், கேபிள் வாரிய அதிகாரிகள்
கூடுதல் அக்கறை காட்டுவது ஏன்?

டி.டி.எச்., விற்பனை அதிகரிப்பு: அரசு கேபிள் வசம் பெரும்பான்மை
இணைப்புகள் உள்ள நிலையில், அரசு கோரும் நியாயமான தொகைக்கு சேனல்கள் ஒப்புக்
கொள்ளவில்லை என்றால், அவர்களை எளிதில் பணிய வைக்க முடியும். அந்த சேனல்களை
முறைகேடாக ஒளிபரப்புவதை ஒரு வாரத்திற்கு தடுத்து நிறுத்தினாலே,
டி.ஆர்.பி., ரேட்டிங் போய்விடும் என்பதால், அரசிடம் பணிந்து வருவார்கள்.
இதனை செய்வதற்கு கேபிள் வாரியம் அக்கறை காட்டவில்லை. அது மட்டுமல்லாமல்,
அரசு கேபிள் இணைப்புகள் முறையாக வழங்கப்படாததால், குறிப்பிட்ட நிறுவனத்தின்
டி.டி.எச்., விற்பனை கூடியுள்ளது. பொதுமக்களிடம் இருந்து வசூலிக்கும்
கோடிக்கணக்கான ரூபாய் மீண்டும் ஒரு தனியாருக்கு போவதற்கு அரசு துணை நிற்கக்
கூடாது என்றே விரும்புகிறோம். கடந்த காலங்களில் எங்களின் ரத்தத்தை
உறிஞ்சி, கட்டணக் கொள்ளை நடத்தியவர்கள், வெவ்வேறு வகைகளில் கேபிள்
வாரியத்தில், வாரியத்தின் முடிவுகளில் ஆதிக்கம் செலுத்தி வருகின்றனர். அதன்
விளைவாகவே, எவ்வித முன்னேற்றமும் இல்லாமல் வாரியம் முடங்கிப் போயுள்ளது.
இவ்வாறு அவர்கள் தெரிவித்தனர்.

எதிர்பார்ப்பு என்ன? கேபிள் ஆபரேட்டர்கள் மூன்று விஷயங்களை அரசிடம் இருந்து உடனடியாக எதிர்பார்க்கின்றனர்.

* பிரச்னைகளை தீர்க்கும் வகையில், கேபிள் ஆபரேட்டர்கள் கொண்ட கமிட்டியை மாநில அளவிலும், மாவட்ட அளவிலும் அமைக்க வேண்டும்.

* எல்லா மாவட்டங்களிலும் அரசு கேபிளுக்கென நவீன கட்டுப்பாட்டு
அறைகள் அமைக்க வேண்டும். அதற்கு தேவையான பராமரிப்பு செலவு கொடுப்பதுடன்,
பணியளர்கள் நியமனத்தையும் செய்ய வேண்டும்.

* கேபிள் வாரியத்தின் செயல்பாடுகளை விருப்பு வெறுப்பின்றி அரசு கண்காணிக்க வேண்டும்.