இந்தியாவின் அதி நவீன கண்காணிப்பு செயற்கைக் கோளை 20ஆம் தேதி விண்ணில் செலுத்த இஸ்ரோ முடிவு

இந்தியாவிலேயே
உருவாக்கப்பட்ட "ரிசாட் - 1' என்கிற பூமியைத் துல்லியமாகப் புகைப்படம்
எடுக்கும் திறன் கொண்ட அதி நவீன கண்காணிப்பு செயற்கைக் கோளை வரும் 20-ம்
தேதி விண்ணில் செலுத்துவதற்கு இஸ்ரோ திட்டமிட்டிருக்கிறது.

காலநிலை
எப்படியிருந்தாலும், பகல் - இரவு நேரங்களிலும், மேகங்களை ஊருடுவியும்
பூமியைத் துல்லியமாக படமெடுத்து அனுப்பும் திறன் கொண்டது இந்தச்
செயற்கைக்கோள். ரிசாட் வரிசையில் இந்தியாவிலேயே தயாரான முதலாவது செயற்கைக்
கோள் இதுவாகும்.

ஏற்கெனவே இஸ்ரேலிடமிருந்து ரூ. 550 கோடி
மதிப்பில் வாங்கப்பட்ட ரிசாட் - 2 செயற்கைக்கோள் 2009-ம் ஆண்டு ஏப்ரல்
20-ம் தேதி விண்ணில் ஏவப்பட்டது. ரிசோர்ஸ்சாட்-2 என்கிற மற்றொரு
செயற்கைக்கோள் கடந்த ஆண்டு ஏப்ரல் 20-ம் தேதி வெற்றிகரமாக ஏவப்பட்டது.

இந்த
நிலையில், வரும் 20-ம் தேதி ரிசாட்-1 விண்ணில் செலுத்தப்படுவதாக இஸ்ரோ
அறிவித்திருக்கிறது. ஏப்ரல் 20-ம் தேதியைத் தேர்ந்தெடுத்தது பற்றிக்
குறிப்பிட்ட இஸ்ரோ அதிகாரி ஒருவர், "அது எங்களுக்கு அதிர்ஷ்டமான நாள்'
என்று தெரிவித்தார்.

1850 கிலோ எடையுள்ள இந்தச் செயற்கைக்கோளை பிஎஸ்எல்வி - சி19 என்கிற ஏவுவாகனம் விண்ணுக்கு கொண்டு செல்கிறது.

ஏற்கெனவே
விண்ணில் செயல்பட்டு வரும் ரிசாட் - 2, முழுக்க முழுக்க பாதுகாப்புப்
பயன்பாடுகளுக்கானது. ஆனால், ரிசாட் - 1, வேளாண்மை, நீர்வள மேலாண்மை
போன்றவற்றுக்குப் பயன்படும் என்று அறிவிக்கப்பட்டிருக்கிறது. இஸ்ரோவில்
நடந்ததாகக் கூறப்படும் ஊழல் தொடர்பான சர்ச்சைகள், அதைத் தொடர்ந்த
நடவடிக்கைகளால் இந்த செயற்கைக்கோள் ஏவப்படுவது சில மாதங்கள் தாமதமானது