அண்ணா நூலகத்தை மருத்துவமனையாக்கினால் தீக்குளிப்பேன்: கருணாநிதி சூளுரை

சங்கரன்கோவில், மார்ச் 15: சென்னை அண்ணா நூலகத்தை மருத்துவமனையாக மாற்றியே
தீருவேன் என்று சொல்லும் நாள்தான் கருணாநிதி தீக்குளிக்கும் நாளாக இருக்கும் என்றார்
திமுக தலைவர் கருணாநிதி.
சங்கரன்கோவிலில் திமுக வேட்பாளர் ஜவஹர் சூரியகுமாரை ஆதரித்து வியாழக்கிழமை
இரவு நடைபெற்ற பிரசார பொதுக்கூட்டத்தில் அவர் மேலும் பேசியது:
சென்னையில் நான் முதல்வராக இருந்தபோது அண்ணா பெயரால் அமைத்த நூற்றாண்டு
நூலகத்தில் 4 லட்சத்துக்கும் மேற்பட்ட புத்தகங்கள் உள்ளன. ஆசியாவிலேயே மிகப் பெரிய
நூலகம் என்று பிரிட்டிஷ், ரஷிய நாட்டினர்களும் கூறுகிறார்கள்.
அண்ணா வாழ்ந்ததை எதிர்காலத்தினர் மத்தியில் பதிவு செய்வதற்காகதான் இந்த
நூலகத்தை அமைத்தேன். ஆனால், அதை மருத்துவமனையாக மாற்றுவேன் என்று கூறுபவர்கள், அண்ணா
பெயரில் கட்சி வைத்துக் கொள்ள அருகதை இருக்கிறதா? மருத்துவமனை கூடாது என்று கூறுபவன்
அல்ல நான்.
ஆனால், வேண்டும் என்றே அதை மருத்துவமனையாக மாற்ற முயற்சிக்கிறார்கள். இது
தொடர்பான வழக்கு தற்போது நடைபெறுகிறது. இந்த வழக்கு உச்ச நீதிமன்றம் வரைக்கும்
போகலாம். நீதிமன்ற தீர்ப்புகள் வந்தாலும், அண்ணா நூலகத்தை எடுத்தே தீருவேன் என்கிற
நாள்தான் கருணாநிதி தீக்குளிக்கும் நாளாக இருக்கும்.
எங்களை ஆளாக்கியவர் அண்ணா. இளைஞர்களை அறிவாளியாக்கியவர் அவர். உலகம் என்றும்
அவரை நினைத்துக்கொண்டிருக்கிறது. அவர் பெயரால் அமைத்த நூலகத்தை எடுத்தே தீருவேன்
என்று ஒரு பெண்மணி ஆக்ரோஷமாக கூறிவருகிறார். தேர்தல் மட்டும் எங்களுக்கு முக்கியம்
அல்ல. அண்ணாவும் முக்கியம். அவரை உருவாக்கிய பெரியாரும் முக்கியம்.
அவர்களால் உருவாக்கப்பட்ட நாங்கள் தந்தைக்கும், தனயனுக்கும் செலுத்த வேண்டிய
கடமைகள் உள்ளன. என்னை யாரும் தடுத்துவிட முடியாது. எங்கள் குறிக்கோளை நிறைவேற்றியே
தீருவோம். அந்த குறிக்கோள் வலுப்பெற திமுகவுக்கு ஆதரவு தாருங்கள். எனது சூளுரைக்கு
பலம் சேர்க்க திமுகவை ஆதரியுங்கள் என்றார் கருணாநிதி.

மக்களைப் பற்றி கவலைப்படாத அதிமுக ஆட்சி
மக்களைப் பற்றி கவலைப்படாமல் ஆட்சி நடத்துகிறது அதிமுக என குற்றஞ்சாட்டினார்
திமுக தலைவர் மு.கருணாநிதி.
சங்கரன்கோவிலில் வியாழக்கிழமை இரவு நடைபெற்ற பிரசார பொதுக்கூட்டத்தில் அவர்
பேசியது: தமிழகத்தில் கடும் மின் பற்றாக்குறை காணப்படுகிறது. கிராமங்களிலும்,
ஊராட்சிகளிலும், பேரூராட்சிகளிலும் மின்சாரமே இல்லை. மக்கள் அவதிப்படும் இருண்ட நிலை
தமிழகத்தில் நிலவுகிறது. ஆனால், தேர்தலுக்கு முன்னர் கருணாநிதி அரசு தமிழகத்தை
இருளாக்கிவிட்டது என்றும், நாங்கள் வந்து ஒளி வழங்குவோம் என்றும் கூறினார்கள். ஆனால்,
ஒளி வழங்க முடியவில்லை.
கூடங்குளம் திட்டம்: கிடைத்த திட்டத்தை நிறைவேற்றவில்லை. கூடங்குளம் மூலம்
1000 மெகாவாட் மின்சாரம் கிடைக்க வழியிருந்தும், வேண்டாம் என்று ஒதுங்கிக்கொண்டு
மக்களின் கஷ்டத்தைப் பற்றி கவலைப்படாமல் இருக்கும் ஆட்சி, அதிமுக ஆட்சி.
இடைத்தேர்தல் என்பது நடக்கும் ஆட்சியை, கடந்த 9 மாதம் நடந்துள்ள ஆட்சியை
எடைபோட்டு பார்க்கும் தேர்தல். எனவே, இடைத்தேர்தலை எடைத்தேர்தல் எனலாம். சரியாக
எடைபோட்டு, எல்லாம் சரியாக நடக்கிறதா என்பதை தேர்தலில் எதிரொலிப்பது நமது கடமை.
கடந்த 9 மாதத்துக்கு முன்பு திமுக தோற்கடிக்கப்பட்டு ஜெயலலிதா தலைமையில் அதிமுக
ஆட்சி நடக்கிறது. இந்த ஆட்சியில் என்னென்ன கூத்துகள் நடக்கின்றன என்பதை நீங்கள்
பார்த்துக் கொண்டிருக்கிறீர்கள்.
கடந்த திமுக ஆட்சியின்போது ரூ.7,000 கோடி கூட்டுறவுக் கடனை தள்ளுபடி செய்தோம்.
விவசாயிகளுக்கு இலவச மின்சாரம் வழங்கப்பட்டது. சுயஉதவிக் குழுக்கள், நலவாரியம்
போன்ற திட்டங்கள் செயல்படுத்தப்பட்டன. நிலமற்ற விவசாயிகளுக்கு 2,12,995 ஏக்கர்
நிலத்தை திமுக ஆட்சியில் வழங்கினோம். அதிமுக ஆட்சிக்கு வந்ததும் சமச்சீர் கல்வித்
திட்டத்தை ரத்து செய்தனர். அதை எதிர்த்து நீதிமன்றத்தில் வழக்காடினோம். உச்ச
நீதிமன்றம்வரை சென்றதால் சமச்சீர் கல்வி தற்போது நடைமுறைக்கு வந்துள்ளது என்றார்
கருணாநிதி.

அரசியல் உள்நோக்கம்
ஏமாற்று வேலை