காபிபோசா சட்டத்தில் கைது செய்யாமல் இருக்க 8 லட்சம் லஞ்சம் மத்திய வருவாய் புலனாய்வு கூடுதல் இயக்குநர் கைது

by **மாலதி** Wed Mar 07, 2012 4:06 pm

சென்னை, - செல்போன் நிறுவன உரிமையாளரை ‘காபிபோசா’ சட்டத்தின்கீழ் கைது
செய்யாமல் இருக்க ரூ.8 லட்சம் லஞ்சம் கேட்ட, மத்திய வருவாய் புலனாய்வு
பிரிவின் கூடுதல் இயக்குநர் சென்னையில் இன்று கைது செய்யப்பட்டார். சிபிஐ
அதிகாரிகளின் இந்த அதிரடி நடவடிக்கை அரசு ஊழியர்கள் வட்டாரத்தில் பெரும்
அதிர்ச்சியை ஏற்படுத்தியுள்ளது.
தென் மண்டலத்தின் டிஆர்ஐ (மத்திய
வருவாய் புலனாய்வு) பிரிவின் கூடுதல் இயக்குநராக இருப்பவர் ராஜன்.
வெளிநாடுகளுக்கு அனுப்பப்படும் பொருட்கள், வெளிநாட்டில் இருந்து
கொண்டுவரப்படும் பொருட்கள் ஆகியவற்றுக்கு உரிய சுங்க வரி கட்டி எடுத்துச்
செல்லப்படுகிறதா? அதில் முறைகேடு நடக்கிறதா? என்பதை சோதனை செய்து,
நடவடிக்கை எடுத்து வந்தனர். அதோடு போதைப் பொருள் தடுப்பு பணியையும் இந்த
பிரிவினர் செய்து வந்தனர்.

சோதனை என்ற பெயரில், தனியார்
நிறுவனங்களை மிரட்டி, வருவாய் புலனாய்வு பிரிவினர் பணம் பறித்து வந்ததாக
ஏராளமான புகார்கள் சிபிஐ அதிகாரிகளுக்கு வந்தன. கூடுதல் இயக்குநராக உள்ள
ராஜனும் பணம் வசூலிப்பதாக புகார்கள் வந்தன. அதனால் அவரை கடந்த 6 மாதமாக
சிபிஐ அதிகாரிகள் ரகசியமாக கண்காணித்து வந்தனர்.
இந்நிலையில்,
வெளிநாட்டில் இருந்து செல்போன் இறக்குமதி செய்யும் ஒரு நிறுவனத்தின் மீது
மத்திய வருவாய் புலனாய்வு அதிகாரிகள் வழக்குப்பதிவு செய்திருந்தனர்.
ஏராளமான செல்போன்களை பறிமுதல் செய்ததோடு குடோன்களுக்கும் சீல்
வைத்திருந்தனர்.

இதனால் அந்த சீலை அகற்றவும், அந்த செல்போன் நிறுவன
உரிமையாளர் மீது காபிபோசா சட்டத்தின் கீழ் நடவடிக்கை எடுக்காமல்
இருப்பதற்காகவும் ரூ.8 லட்சமும், லேட்டஸ்ட் மாடல் ஐபேடு போனும் ராஜன்
கேட்டிருக்கிறார். ஆனால், லஞ்சம் கொடுக்க விரும்பாத செல்போன் நிறுவன
உரிமையாளரான, சென்னை புதுப்பேட்டையைச் சேர்ந்த உபயதுல்லா, இதுகுறித்து
சிபிஐ இணை இயக்குநர் அருணாச்சலத்திடம் புகார் செய்தார். அதன்படி எஸ்பி
ஈஸ்வரமூர்த்தி தலைமையிலான போலீசார் வழக்குப்பதிவு செய்து விசாரணை
நடத்தினர்.

நுங்கம்பாக்கத்தில் உள்ள ராஜனின் வீட்டில் முதல்கட்டமாக
ரூ.2 லட்சம், ஒரு ஐபேடு போனை உபயதுல்லா இன்று கொடுத்தபோது, மறைந்திருந்த
சிபிஐ அதிகாரிகள் ராஜனை கைது செய்தனர். பின்னர் அவரை சிபிஐ சிறப்பு
நீதிமன்றத்தில் ஆஜர்படுத்தி உடனடியாக புழல் சிறையில் அடைத்தனர். அவரை
காவலில் எடுத்து விசாரணை நடத்த போலீசார் முடிவு செய்துள்ளனர்.

ராஜனின்
சொந்த ஊர் தூத்துக்குடி மாவட்டம் ஆறுமுகநேரி. இவர், சென்னை ஏர்போர்ட்
கஸ்டம்ஸ் கமிஷனராக 3 ஆண்டுகளும், துறைமுகம் கஸ்டம்ஸ் கமிஷனராக 3 ஆண்டுகளும்
பணியாற்றினார். தற்போது, மத்திய வருவாய் புலனாய்வுத்துறையில் 2 ஆண்டுகளாக
கூடுதல் இயக்குநராக பதவி வகித்து வருகிறார். வழக்கமாக ஒரு அதிகாரி ஒரு
இடத்தில் 3 ஆண்டுகள்தான் பணியாற்ற முடியும். இவர், தனது செல்வாக்கால் கடந்த
8 ஆண்டுகளுக்கும் மேலாக சென்னையிலேயே முக்கிய பதவிகளில் பணியாற்றி
வருகிறார்.

‘இன்பார்மர்’கள் மூலம் பெரிய நெட்வொர்க் வைத்து, கடத்தல்
சம்பவங்களை கண்டறிந்து ஸ்பாட்டுக்கு உடனே சென்று பறிமுதல் செய்வதில்
கில்லாடி என்று இவரைப் பற்றி சொல்கிறார்கள். ‘கூடுதல் வேலை; கூடுதல்
பப்ளிசிட்டி’ என எல்லாவற்றிலும் அதிகப்படியாகவே செயல்பட்டதே அவருக்கு
சிக்கல் ஏற்பட காரணம் என்கிறார்கள் சக அதிகாரிகள்.

துறைமுகம்
கமிஷனராக இருந்தபோது ஒரு குறிப்பிட்ட நிறுவனத்துக்கு ஏஜென்சி வழங்க ராஜன்
உதவியாக இருந்தார் என்று சிபிஐ அதிகாரிகளுக்கு ஏற்கனவே ஒரு புகார் வந்தது.
அந்த நிறுவனத்தில் இவர், சைலன்ட் பார்ட்னராக இருப்பதாகவும் கூறப்பட்டது.
இதுகுறித்தும் சிபிஐ அதிகாரிகள் விசாரணை நடத்தி வருகின்றனர். இதற்கிடையில்
ராஜனின் வீட்டில் சிபிஐ அதிகாரிகள் நடத்திய அதிரடி சோதனையில் ஏராளமான
ஆவணங்கள் சிக்கியதாக கூறப்படுகிறது.

கடந்த 2 ஆண்டுகளுக்கு முன்பு
இவருடைய மகளுக்கு திருமணம் நடந்தது. இந்த திருமணத்தில் பல விஐபிக்கள்
கலந்து கொண்டனர். அதில் துறைமுகத்தில் ஏஜென்சி எடுத்த ஒரு நிறுவனம்
விலைமதிக்க முடியாத பொருட்களை பரிசளித்ததாகவும் சிபிஐ அதிகாரிகளுக்கு
தெரியவந்துள்ளது. சிபிஐ அதிகாரிகளின் தீவிர விசாரணையில் ராஜனின்
தொடர்புகள், வருமானம் பற்றிய திடுக்கிடும் தகவல்கள் வெளிவரலாம் என
தெரிகிறது.