வடக்கு ரத வீதியை "கைப்பற்றியது' தி.மு.க.,: ஜெ., தெருமுனை பிரசாரம்

சங்கரன்கோவில்: சங்கரன்கோவில் வடக்கு ரத வீதியில், மார்ச் 15ல்
தி.மு.க., தலைவர் கருணாநிதியின் தேர்தல் பொதுக்கூட்டம் நடக்கிறது. இதற்காக
முன்பே இடத்தை, தி.மு.க.,வினர் "புக்கிங்' செய்தனர். இதனால், மார்ச் 13ல்
முதல்வர் ஜெயலலிதா கிழக்கு ரத வீதியில் தெருமுனை பிரசாரம் செய்ய வேண்டிய
கட்டாயம் ஏற்பட்டுள்ளது.

"சங்கரன்கோவில் வடக்கு ரத வீதியில், தேர்தல் பொதுக்கூட்டம் நடத்தும்
கட்சியின் வேட்பாளர் வெற்றி பெறுவார்' என்பது, இங்குள்ள அரசியல்
கட்சியினரிடையே அசைக்க முடியாத நம்பிக்கையாக உள்ளது. வடக்கு ரத வீதியை விட
தெற்கு ரத வீதி பொதுக்கூட்டம் நடத்த ஏதுவான இடமாக இருந்தாலும்,
தெற்கு-மேற்கு ரத வீதிகள் சந்திக்கும் இடத்தில், கோவில் கிணறு இருப்பதால்,
"சென்ட்டிமென்ட்' கருதி, அங்கு அரசியல் கட்சியினர் பொதுக்கூட்டம் நடத்துவது
கிடையாது.

"புக்கிங்' செய்து முந்திய தி.மு.க.,: சங்கரன்கோவில்
இடைத்தேர்தல் அறிவிக்கப்பட்டதும் பொதுக்கூட்டம் நடத்துவதற்கு வசதியாக,
வடக்கு ரத வீதியை முன்பே, தி.மு.க., வினர் போலீசாரிடம் அனுமதி பெற்று
"புக்கிங்' செய்தனர். ஆனால், தேவைப்படும் பட்சத்தில் வடக்கு ரத வீதியை
ஒப்படைக்க வேண்டும் என, தி.மு.க.,வினருக்கு போலீசார் கண்டிஷன் போட்டனர்.
இதற்கு எதிர்ப்பு தெரிவித்து, தமிழக தலைமை தேர்தல் கமிஷனர்
பிரவீன்குமாரிடம் தி.மு.க.,வினர் புகார் செய்தனர். "முதலில் வந்தவர்களுக்கே
முன்னுரிமை தர வேண்டும். எனவே, வடக்கு ரத வீதியை தி.மு.க.,வினரிடம்
இருந்து பறிக்கக் கூடாது' என, போலீசாருக்கு பிரவீன்குமார் உத்தரவிட்டார்.

ஜெ., தெருமுனை பிரசாரம்: பொதுக்கூட்டத்திற்கு வடக்கு ரத வீதியை
தவிர சங்கரன்கோவிலில் வேறு இடம் இல்லை. சங்கரன்கோவில்-நெல்லை ரோடு
அமைந்துள்ள குறுகலான கிழக்கு ரத வீதி தேரடியில், தெருமுனை பிரசாரம் செய்ய
மட்டும் போலீசார் அனுமதி வழங்குவர். எனவே, மார்ச் 13 அல்லது 14ல்
சங்கரன்கோவில் வரும் ஜெ., கிழக்கு ரத வீதியில், தெருமுனை பிரசாரம் செய்ய
வேண்டிய கட்டாயம் ஏற்பட்டுள்ளது. ஒரு வேளை, மார்ச் 13 அல்லது 14ல் ஏதாவது
ஒரு நாளில், வடக்கு ரத வீதியில் பொதுக்கூட்டம் நடத்துவதாக இருந்தாலும்,
ஜெ.,யின் பாதுகாப்பு கருதி ஒரு வாரத்திற்கு முன்பே, வடக்கு ரத வீதி போலீஸ்
கட்டுப்பாட்டிற்குள் வந்து விட வேண்டும். எனவே, அதற்கும் வழியில்லாத சூழல்
ஏற்பட்டுள்ளது.

பூனைக்கு மணி கட்டுவது யார்? அ.தி.மு.க., சார்பில், 1996 முதல்
2011 வரை தொடர்ந்து, நான்கு முறை வெற்றி பெற்று அமைச்சரான, கருப்பசாமிக்கு
வெற்றியை பெற்று தந்தது, வடக்கு ரத வீதியில் நடத்திய தேர்தல்
பொதுக்கூட்டங்கள் தான். தற்போது, வடக்கு ரத வீதியை முன்பே, தி.மு.க.,
புக்கிங் செய்தது குறித்தும், பொதுக்கூட்டத்திற்கு பதிலாக வெறும் தெருமுனை
பிரசாரம் மட்டுமே ஜெ., நடத்த வேண்டிய கட்டாயம் ஏற்பட்டது குறித்தும்,
ஜெ.,யிடம் விளக்கி சொல்வது யார்? என, தேர்தல் பணிக்குழுவினருக்கு தலைவலியை
ஏற்படுத்தி உள்ளது.

ஹெலிபேடு தயார்: சங்கரன்கோவில் இடைத்தேர்தலுக்காக, முதல்வர் ஜெ.,
வரும் மார்ச் 13 அல்லது 14ல் சங்கரன்கோவிலில் பிரசாரம் செய்யவுள்ளார்.
சென்னையில் இருந்து ஜெ., வரும் ஹெலிகாப்டர், தரை இறங்குவதற்கு வசதியாக
திருவேங்கடம் தனியார் பள்ளி, தேவர்குளம் மற்றும் ராஜபாளையம் தனியார்
இடங்களிலும் "ஹெலிபேடுகள்' அமைக்கப்பட்டுள்ளன. ஒவ்வொரு ஹெலிபேடிலும்
எஸ்.ஐ., தலைமையில் ஆயுதம் தாங்கிய போலீசார் 10 பேர் பாதுகாப்பு பணியில்
ஈடுபட்டு வருகின்றனர். இந்த மூன்று இடங்களில் ஜெ., எங்கு இறங்குகிறாரோ,
அங்கிருந்து பிரசார வேனில் இருந்தபடி பிரசாரத்தை துவக்கவுள்ளார்.