ஆக்கிரமிப்பில் விஜயகாந்த் அலுவலகம்: நடவடிக்கைக்கு தயாராகும் அதிகாரிகள்

மதுரை: மாநகராட்சி ஆக்கிரமிப்பு கணக்கெடுப்பு பட்டியலில், தே.மு.தி.க., தலைவர் விஜயகாந்தின் மதுரை அலுவலகமும் இடம்பெற்றுள்ளது.

மதுரை மீனாட்சி அம்மன் கோயிலை சுற்றிய ஒரு கி.மீ., சுற்றளவில் இருக்கும்
கட்டடங்கள், 9 மீ.,க்கு மேல் உயரம் இருக்க கூடாது, என்ற விதி உள்ளது. அதை
மீறி, நிறைய கட்டடங்கள் உள்ளன. இது குறித்து கலெக்டர் சகாயத்திடம் சிலர்,
புகார் அளித்தனர். அவர் உத்தரவு படி, உள்ளூர் திட்டக்குழு அதிகாரிகள்
நடத்திய கணக்கெடுப்பில், விதிமுறை மீறிய 750 கட்டடங்கள் இருப்பது
தெரியவந்தது. அறிக்கையை மாநகராட்சி அதிகாரிகளுக்கு அனுப்பிய, உள்ளூர்
திட்டக்குழும அதிகாரிகள், அதன் மீது நடவடிக்கை எடுக்க வலியுறுத்தினர்.
அறிக்கை குறித்து, மறு கணக்கெடுப்பு நடத்த மாநகராட்சி நிர்வாகம் முடிவு
செய்தது. 12 பேர் கொண்ட குழு அமைத்து, மீனாட்சி அம்மன் கோயிலை சுற்றி
கட்டடங்கள் கணக்கெடுக்கப்பட்டன. இதில், உள்ளூர் திட்டக்குழு கணக்கெடுத்ததை
விட, கூடுதல் விதிமீறிய கட்டடங்கள் இருப்பது தெரியவந்தது. ஆக்கிரமிப்பு
பட்டியலில், மேல ஆவணி மூலவீதியில் உள்ள, தே.மு.தி.க., தலைவர் விஜயகாந்தின்
அலுவலகமும் இடம்பெற்றுள்ளது. அந்த கட்டடத்தை மாவட்ட கட்சி அலுவலகமாகவும்
பயன்படுத்தி வருகின்றனர்.

மாநகராட்சி அதிகாரி ஒருவர் கூறியதாவது: விதிமீறிய கட்டடங்கள்
பட்டியல் தயாராகி விட்டது. விஜயகாந்த் கட்டடமும் அதில் வருகிறது. அடுத்த
கட்ட நடவடிக்கை குறித்து ஆலோசித்து வருகிறோம், என்றார். தே.மு.தி.க.,
மாவட்ட தலைவர் அரவிந்தன் கூறியதாவது: அது எங்கள் தலைவருடய அலுவலகம். மாவட்ட
அலுவலகம் என போர்டு மட்டும் வைத்துள்ளோம். ஆக்கிரமிப்பு குறித்து,
சுந்தரராஜன் எம்.எல்.ஏ.,விடம் கேளுங்கள், என்றார்.

சுந்தராஜன் எம்.எல்.ஏ., கூறியதாவது: அது சிறிய அலுவலகம் தான்.
கோயிலில் இருந்து தள்ளி தான் உள்ளது. மதுரையில் ஆக்கிரமிப்பு கட்டடங்கள்
எத்தனையோ உள்ளன. அதை முதலில் இடித்து விட்டு இங்கே வரட்டும். பிற
கட்டடங்களுக்கு நீதிமன்றம் என்ன உத்தரவிடுகிறதோ, அதை நாங்களும் ஏற்போம்,
என்றார்.