நாய்கள்- கழுதைகள் திருமணம் : காதலர் தின காட்சிகள்

‌
சென்னை: உலகம் முழுவதும் காதலர்கள் உற்சாக கொண்டாடும் காதலர்
தினத்துக்கு எதிர்ப்பும் இருந்து கொண்டுதான் இருக்கிறது. பல இடங்களில்
எதிர்ப்பு தெரிவித்து கழுதை-, நாயகளுக்கு திருமணம் நடத்தி வைக்கப்பட்டது.
புதுச்சேரியில் காதலிப்பவர் திருமணம் செய்து கொள்ள தயாரா என்ற சவாலை ஏற்று
பூங்காவிலேயே ஒரு காதல் ஜோடியினர் தாலி கட்டினர்.

இன்றைய காதலர் தினத்தில் வாழ்த்து அட்டை பரிமாறியும், மலர்கள் கொடுத்தும்,
சுற்றுலா ஸ்தலங்களில் சுற்றி திரிந்தும் காதலர்கள் தங்கள் தினத்தை
கொண்டாடினர். எஸ்.எம்.எஸ்., பறந்த வண்ணம் இருந்தன. கன்னியாகுமரி மாவட்டம்
நாகர்கோவிலில் இந்து மகா சபையினர் காதலர் தினத்துக்கு எதிர்ப்பு
தெரிவித்தனர். ஒரு ஆண் நாய் மற்றும் பெண் நாயை நாற்காலியில் அமர வைத்து
கழுத்தில் மாலை போட்டனர். தப்பட்டை அடித்து குரவையிட்டு பெண் நாய்
கழுத்தில் தாலி கட்டப்பட்டது. பின்னர் ஏராளானர்கள் பூதூவி வாழ்த்து
தெரிவித்தனர். காதலர் தினம் என்ற போர்வையில் நடைபெறும் அந்நிய
கலாச்சாரத்துக்கு எதிராக இந்த நூதன நிகழ்ச்சி நடத்தப்பட்டதாக இந்து
மகாசபையினர் தெரிவித்தனர். சென்னை கொருக்கு பேட்டையில் கழுதைகளுக்கும்
நாய்க்கும் திருமணம் செய்து வைக்கப்பட்டது.



புதுச்சேரியில் தாலி கட்டிய ஜோடிகள்: புதுச்சேரி பாரதி பூங்காவில்
காதலர் தினத்தையொட்டி கூடியிருந்த காதலர்களை மிரட்டி இந்து முன்னணி
திருமணம் செய்ய வலியுறுத்திய சம்பவத்தால் அங்கு பெரும்பரபரப்பு ஏற்பட்டது.
இவர்களின் மிரட்டலுக்கு பயந்து, ஒரு ஜோடி அவ்விடத்திலேயே தாலி கட்டி
திருமணம் செய்து கொண்டது குறிப்பிடத்தக்கது. இதுதொடர்பாக, இந்து முன்னணி
அமைப்பைச் சேர்ந்த 9 பேர் கைது செய்யப்பட்டுள்ளனர்.



ராமேஸ்வரத்தில் கழுதை திருமணம்: ராமேஸ்வரத்தில் எதிர்ப்பு தெரிவித்து
இந்து முன்னணியினர் இரண்டு கழுதைகளை கொண்டு வந்து மாலைகள் அணிவித்து
திருமணம் செய்து வைத்தனர். கழுதை திருமணத்தில் இந்து முன்னணி மாவட்ட
செயலாளர் ராமமூர்த்தி, ஒன்றிய தலைவர் தனபால், நகர் தலைவர் மாரியப்பன்,
ஆர்.எஸ்.எஸ்.,நகர் பொறுப்பாளர் தட்சினாமூர்த்தி, சக்திவேல் உட்பட பலர்
பங்கேற்றனர்.