2 எம்.எல்.ஏ.,க்கள் பதவியை பறிக்க அ.தி.மு.க., மனு: தி.மு.க.,பொதுக்குழுவில் கலந்து கொண்டவர்கள்

by **Tamil** Tue Feb 23, 2010 6:58 am

சென்னை
: சென்னையில், கடந்த 20ம் தேதி நடந்த தி.மு.க., பொதுக்குழுவில், கலந்து
கொண்ட இரண்டு அ.தி.மு.க., எம்.எல்.ஏ.,க்களின் பதவியை, கட்சித் தாவல் தடைச்
சட்டத்தின் கீழ் பறிக்க வேண்டும் என, அ.தி.மு.க., சார்பில் சபாநாயகரிடம்
நேற்று மனு கொடுக்கப்பட்டுள்ளது.

கடந்த
2006ம் ஆண்டு சட்டசபைத் தேர்தலில் தி.மு.க.,விற்கு பெரும்பான்மை
எம்.எல்.ஏ.,க்கள் கிடைக்கவில்லை. இருப்பினும், கூட்டணிக் கட்சியான
காங்கிரஸ் ஆதரவுடன் தி.மு.க., ஆட்சி நடந்து வருகிறது. தி.மு.க., அரசை,
"மைனாரிட்டி அரசு' என, அ.தி.மு.க., பொதுச் செயலர் ஜெயலலிதா தனது பேச்சு,
பேட்டி மற்றும் அறிக்கையில் அடிக்கடி சுட்டிக்காட்டுவதை வழக்கமாக
கொண்டுள்ளார்.அ.தி.மு.க.,வுக்கு பதிலடி தரும் வகையில் அக்கட்சியின்
எம்.எல்.ஏ.,க்களுக்கு தி.மு.க., தரப்பில் வலை விரிக்கப்பட்டுள்ளது.
மேலும், தங்களது கட்சிக்கு பெரும்பான்மை பலத்தை நிரூபிக்க வேண்டும்
என்பதற்காக அ.தி.மு.க.,விலிருந்து வரும் எம்.எல்.ஏ.,க்களுக்கு சிவப்பு
கம்பள வரவேற்பும் தி.மு.க., அளித்து வருகிறது.மதுரை மேற்கு தொகுதி
சார்பில், அ.தி.மு.க., எம்.எல்.ஏ.,வாக இருந்த சண்முகம் இறக்கும் முன்,
தி.மு.க.,விற்கு ஆதரவாக செயல்பட்டார்.

முன்னாள்
அமைச்சர் அனிதா ராதாகிருஷ்ணன் தன் எம்.எல்.ஏ., பதவியை ராஜினாமா செய்து
விட்டு தி.மு.க.,வில் இணைந்தார். பின், தி.மு.க., வேட்பாளராக
திருச்செந்தூர் தொகுதியில் போட்டியிட்டு, மீண்டும் எம்.எல்.ஏ., பதவியை
தக்க வைத்துக் கொண்டார்.நடிகர் எஸ்.வி.சேகர், தி.மு.க.,விற்கு ஆதரவாக
செயல்பட்டதால், அவர் கட்சியின் அடிப்படை உறுப்பினர் பதவியிலிருந்து
நீக்கப்பட்டார். அதனால், அவர் சட்டசபையில் எந்த கட்சியும் சாராத
எம்.எல்.ஏ.,வாக அறிவிக்கப்பட்டார். கடந்த 20ம் தேதி சென்னையில் நடந்த
தி.மு.க., பொதுக்குழுவில் எஸ்.வி.சேகர் கலந்து கொண்டார். அ.தி.மு.க.,வைச்
சேர்ந்த ஜெயங்கொண்டம் எம்.எல்.ஏ., ராஜேந்திரன், கோவில்பட்டி எம்.எல்.ஏ.,
ராதாகிருஷ்ணன் ஆகியோர், சமீபத்தில் முதல்வரை சந்தித்து பரபரப்பை
ஏற்படுத்தினர். ஆனால், அவர்கள் இருவரையும் அ.தி.மு.க., அடிப்படை
உறுப்பினர் பதவியிலிருந்து ஜெயலலிதா நீக்கவில்லை.

இந்நிலையில்,
அவர்கள் இருவரும் தி.மு.க., பொதுக்குழுவில் கலந்து கொண்டனர். அ.தி.மு.க.,
எம்.எல்.ஏ.,க்கள் இருவரும் தி.மு.க., பொதுக்குழுவில் கலந்து கொண்ட
புகைப்படம் மற்றும் பத்திரிகை செய்தி ஆதாரங்களுடன், அ.தி.மு.க., தலைமை
நிலைய செயலர் செங்கோட்டையன், எம்.எல்.ஏ.,க்கள் சேகர்பாபு, செந்தமிழன்
ஆகியோர் சபாநாயகர் ஆவுடையப்பனை நேற்று சந்தித்தனர்.அ.தி.மு.க.,
எம்.எல்.ஏ.,க்கள் இரண்டு பேர் மீதும் கட்சித் தாவல் தடைச் சட்டத்தின் கீழ்
நடவடிக்கை எடுத்து, பதவியை பறிக்கும்படி, இவர்கள் மனு கொடுத்தனர்.
தி.மு.க., பொதுக்குழுவில் எஸ்.வி.சேகர் கலந்து கொண்டிருந்தாலும், அவரை
அ.தி.மு.க., உறுப்பினர் பதவியில் இருந்து ஏற்கனவே நீக்கிவிட்டதால், அவர்
எக்கட்சியையும் சாராத உறுப்பினர் என அறிவிக்கப்பட்டு விட்டார். எனவே, அவர்
குறித்து அ.தி.மு.க., எதுவும் குறிப்பிடவில்லை.அ.தி.மு.க., சார்பில்
அளிக்கப்பட்ட மனுவை சபாநாயகர் பெற்றுக் கொண்டார். இதுகுறித்து நிருபர்கள்
கேட்ட போது, ""இந்த மனு என் ஆய்வில் உள்ளது,'' என்று சபாநாயகர்
பதிலளித்தார்.

வழக்கு தொடர முடிவு
: அணி மாறிய இரண்டு எம்.எல்.ஏ.,க்கள் மீதும் சபாநாயகர் நடவடிக்கை
எடுக்காவிட்டால், இதுகுறித்து கோர்ட்டில் வழக்கு தொடர அ.தி.மு.க.,
தரப்பில் முடிவு செய்துள்ளதாக அக்கட்சி வட்டாரங்கள் தெரிவித்துள்ளன