சென்னை, பிப். 9: முல்லைப் பெரியாறு அணையில் நீரின் அழுத்தத்தை அளவிடும் கருவியைப் பொருத்தும் கேரளத்தின் முயற்சியைத் தடுத்து நிறுத்த வேண்டும் என்று பிரதமர் மன்மோகன் சிங்குக்கு முதல்வர் ஜெயலலிதா கடிதம் எழுதியிருக்கிறார். இந்த விஷயத்தில், தமிழகத்தின் உரிமைகள

by **ஜனனி** Fri Feb 10, 2012 11:13 am

சென்னை,
பிப். 9: முல்லைப் பெரியாறு அணையில் நீரின் அழுத்தத்தை அளவிடும் கருவியைப்
பொருத்தும் கேரளத்தின் முயற்சியைத் தடுத்து நிறுத்த வேண்டும் என்று
பிரதமர் மன்மோகன் சிங்குக்கு முதல்வர் ஜெயலலிதா கடிதம் எழுதியிருக்கிறார்.இந்த
விஷயத்தில், தமிழகத்தின் உரிமைகளுக்கு எதிரான நடவடிக்கைகளில் ஈடுபட
வேண்டாம் என அறிவியல் மற்றும் தொழில்நுட்பத் துறையையும், கேரள மாநில
அரசையும் வலியுறுத்த வேண்டும் என்றும் அவர் கோரியுள்ளார்.இதுகுறித்து, வியாழக்கிழமை அவர் அனுப்பிய கடிதத்தின் விவரம்:"முல்லைப்
பெரியாறு அணையில் நீரின் அளவைத் தொடர்ந்து கண்காணிப்பதற்கு ஏற்ற வகையிலான
கருவியைப் பொருத்த கேரள அரசு தன்னிச்சையாக முடிவு செய்திருப்பதாக
ஊடகங்களில் செய்தி வெளியாகியுள்ளது. மத்திய அரசின் அறிவியல் மற்றும்
தொழில்நுட்பத் துறையுடன் செய்து கொண்ட ஒப்பந்தப்படி அந்தக் கருவியை நிறுவ
கேரள அரசு முயற்சிப்பதாகச் செய்திகள் தெரிவிக்கின்றன.முல்லைப்
பெரியாறு அணை பாதுகாப்பாக இருக்கிறது எனவும், அதில் 142 அடி அளவுக்கு
நீரைத் தேக்கலாம் என்றும் உச்ச நீதிமன்றம் கடந்த 2006-ம் ஆண்டு தீர்ப்பு
வழங்கியது. ஆனாலும், அணையின் பாதுகாப்பு குறித்து அச்சமூட்டும் தகவல்களைக்
கேரள அரசு தொடர்ந்து வெளியிட்டு வருவது பற்றித் தங்களுக்கு முன்பு எழுதிய
கடிதங்களில் குறிப்பிட்டிருந்தேன்.அணையைப் பார்வையிட்டு அறிக்கை
அளிக்க நீதிபதி ஏ.எஸ்.ஆனந்த் தலைமையில் அதிகாரம் அளிக்கப்பட்ட குழுவை உச்ச
நீதிமன்றம் அமைத்தது. அந்தக் குழுவும் முல்லைப் பெரியாறு அணையை ஆய்வு
செய்து விரைவில் அறிக்கையை அளிக்கவுள்ளதாகத் தெரிகிறது.இந்தச்
சூழ்நிலையில், குறிப்பிட்ட கால இடைவெளிகளில் அணையில் நீரின் அழுத்தத்தை
அறிய உதவிடும் கருவியைப் பொருத்த கேரள அரசு முயன்று வருகிறது. இது, அணையின்
பாதுகாப்பைப் பற்றி மக்களிடம் அச்சத்தை ஊட்ட அந்த மாநில அரசு மேற்கொண்டு
வரும் மற்றொரு நடவடிக்கையாகும்.முல்லைப் பெரியாறு அணையின்
கட்டுமானங்கள் தமிழகத்துக்குச் சொந்தமானவை என்பதால் அதைப் பராமரிக்கும்
பொறுப்பை தமிழக அரசு ஏற்றுக் கொண்டுள்ளது. இந்த நிலையில், அணையில் உள்ள
நீரை குறிப்பிட்ட கால அளவுகளில் கண்காணிப்பதற்கான கருவியை தமிழக அரசின்
ஒப்புதல் இல்லாமல் மத்திய அரசுத் துறையின் துணையுடன் அமைப்பது,
கூட்டாட்சித் தத்துவத்துக்கும், அரசியலமைப்புச் சட்டத்துக்கும் எதிரானது.கருவியை
நிறுவுவதற்காக கேரளத்துக்கும் மத்திய அரசின் அறிவியல் மற்றும்
தொழில்நுட்பத் துறைக்கும் இடையே ஏதேனும் ஒப்பந்தம் ஏற்பட்டு இருந்தால் அதை
ரத்து செய்ய வேண்டும். முல்லைப் பெரியாறு அணைப் பிரச்னையில்
தமிழகத்தின் உரிமைகளுக்கு எதிராக அறிவியல் மற்றும் தொழில்நுட்பத் துறையும்,
கேரள அரசும் ஈடுபட வேண்டாம் என்பதை அவர்களுக்கு அறிவுறுத்த வேண்டும்.மத்திய
தொழில் பாதுகாப்புப் படை: அணையின் பாதுகாப்புக்கு மத்திய தொழில்
பாதுகாப்புப் படையினரை ஈடுபடுத்த வேண்டுமென கடந்த டிசம்பர் 4-ம் தேதி
தங்களுக்குக் கடிதம் எழுதியிருந்தேன். இப்போது தண்ணீரை அளவிடும் கருவியைப் பொருத்தும் நடவடிக்கையை கேரள அரசு தன்னிச்சையாக எடுத்துச் செயல்படுத்த முயற்சிக்கிறது.முல்லைப்
பெரியாறு அணையைப் பராமரிப்பதில் அந்த மாநில அரசின் தலையீடு இருக்கிறது.
அணைப் பகுதியில் மத்திய பாதுகாப்புப் படையினரை ஈடுபடுத்த வேண்டும் என்கிற
எனது முந்தைய கோரிக்கைக்கு வலுசேர்க்கும் வகையில் கேரளத்தின் இப்போதைய
நடவடிக்கை அமைந்திருக்கிறது. எனவே அணைப் பகுதியில் மத்திய தொழில்
பாதுகாப்புப் படையினரை ஈடுபடுத்த வேண்டுமென மீண்டும் வலியுறுத்துகிறேன்'
என்று தனது கடிதத்தில் குறிப்பிட்டுள்ளார் முதல்வர் ஜெயலலிதா.