உதயகுமாரை எதிர்த்தவர் கைதான மர்மம் என்ன? கருணாநிதி கேள்வி

by **மாலதி** Thu Feb 09, 2012 9:43 am

சென்னை:"உதயகுமாருக்கு எதிராகச் செயல்படும், வழக்கறிஞர் பூசை துரையை
தமிழக போலீசார் கைது செய்திருக்கின்றனர்; என்ன மர்மமோ' என, தி.மு.க.,
தலைவர் கருணாநிதி சந்தேகம் தெரிவித்துள்ளார்.

அவரது அறிக்கை:ஊழல் என்றால், இந்த ஆட்சியில் என்னவென்றே தெரியாது என்பதை
போல ஜெயலலிதா பேசியிருக்கிறார். "தினமலர்' நாளேட்டிலேயே, "அமைச்சர்
வீட்டில் தொடரும் வசூல் வேட்டை' என்ற தலைப்பில் எழுதியிருக்கின்றனர். இந்த
ஒரு உதாரணம் போதுமா, இன்னமும் வேண்டுமா?அணு உலைக்கு ஆதரவான வழக்கறிஞர்கள்
அமைப்பு சார்பில், மதுரையில் நடந்த உண்ணாவிரதத்தில் பேசிய வழக்கறிஞர் பூசை
துரை, "அணுமின் நிலையத்துக்கு 1986ல் அடிக்கல் நாட்டியபோது, அணு உலை
எதிர்ப்பாளர் உதயகுமார் ஏன் எதிர்ப்பைத் தெரிவிக்கவில்லை. அன்னிய
சக்திகளின் தூண்டுதலால் தான், மூன்று மாதங்களாக இவர், மக்களைப் போராடத்
தூண்டுகிறார். போராடும் மக்களுக்கு தினமும் பணம் கொடுத்து, உண்ணாவிரதம்
இருக்க அழைத்து வருகிறார். இது பற்றி சி.பி.ஐ., விசாரிக்க வேண்டும்' எனச்
சொல்லியிருக்கிறார். ஆனால், வழக்கறிஞர் பூசை துரையை தமிழக போலீசார் கைது
செய்திருக்கின்றனர். என்ன மர்மமோ!

சென்னையில், ஒரே மாதத்தில் 16 கொலைகள் என்ற தலைப்பில் ஒரு பத்திரிகைச்
செய்தி வந்துள்ளது. இது தான் ஜெயலலிதாவின் பொற்கால ஆட்சி
என்கின்றனர்.ராவணன், திவாகரன் ஆகியோர் அ.தி.மு.க., ஆட்சி
பொறுப்பேற்றதிலிருந்து, தவறான நடவடிக்கையில் ஈடுபட்டனர் என்றால்,
அவர்களுக்கு அப்போது உதவியாக இருந்தவர்கள் யார்; அவர்கள் மீது என்ன
நடவடிக்கை?ஜெயலலிதா அரசின் சார்பாக கடந்த ஆண்டு தமிழக சட்டசபையில்
படிக்கப்பட்ட பட்ஜெட் பக்கம் 42ல், "மின்வெட்டு தமிழகத்தில் படிப்படியாக
தளர்த்தப்பட்டு, 2012 ஆகஸ்ட் மாதத்துக்குள் முற்றிலும் நீக்கப்படும்' என
குறிப்பிடப்பட்டிருந்தது.தற்போது, 2012ம் ஆண்டை வசதியாக மறந்துவிட்டு,
"2013ம் ஆண்டு மத்தியில், மின் பற்றாக்குறை முழுவதுமாக நீக்கப்பட்டுவிடும்'
என சொல்லியிருக்கிறார் ஜெயலலிதா. 2013ல் என்ன சொல்வாரோ?இவ்வாறு கருணாநிதி
கேள்வி எழுப்பியுள்ளார்.