மீண்டும் அடிவாங்கிய தமிழக மீனவர்கள்: தொடரும் இலங்கை கடற்படையின் அட்டூழியம்!!

நடுக்கடலில் மீன் பிடித்த
ராமேஸ்வரம் மீனவர்களை இலங்கை கடற்படையினர் கல்லால் தாக்கினர்; மீன்பிடி
வலைகளை சேதப்படுத்தினர். மீன்களை பறித்து கடலில் வீசினர். ஷூ காலால்
மிதித்து உதைத்தனர்.

தாக்குதலை தொடர்ந்து, 4 மீனவர்களை பிடித்துச் சென்றுவிட்டனர். மற்றொரு
படகில் இருந்த 5 மீனவர்களையும் பிடித்துச் சென்றுள்ளதாக தகவல் கிடைத்தது.
இதையடுத்து ராமேஸ்வரம் பகுதியில் பதற்றம் காணப்படுகிறது.

ராமேஸ்வரத்தில் இருந்து நேற்று காலை 680 விசைப் படகுகளில் மீனவர்கள்
கடலுக்குச் சென்றனர். கச்சத்தீவு அருகே அவர்கள் மீன்பிடித்தபோது மதியம் 2
மணிக்கு இலங்கை கடற்படையினர் 10 விரைவுப் படகுகளில் அங்கு வந்தனர்.

அவர்கள் மூடைகளில் தயாராக கொண்டு வந்திருந்த கற்களை எடுத்து தமிழக
மீனவர்கள் மீது சரமாரியாக வீசினர். இதனால் நிலைகுலைந்த மீனவர்கள்,
நடுக்கடலில் நாலாபுறமும் படகுகளை திருப்பிக் கொண்டு தப்பி ஓடினர்.

இருப்பினும் விடாமல் துரத்திய இலங்கை கடற்படையினர், மீனவர்களின்
படகுகளில் ஏறி உருட்டுக்கட்டைகளால் அவர்களை தாக்கியதோடு படகுகளில் இருந்த
மீன்பிடி சாதனங்களையும் சேதப்படுத்தினர்.

மீனவர்கள் கெஞ்சியும் அவர்கள் விடுவதாக இல்லை. வலைகளை அறுத்து எரிந்தனர். பிடித்து வைத்திருந்த மீன்களை அள்ளி கடலில் வீசினர்.

பின்னர், ராமேஸ்வரத்தைச் சேர்ந்த போஸ் என்பவர் படகில் இருந்த
தின்னையன், செல்வராஜ், தமிழ்செல்வம், மலைச்சாமி ஆகிய 4 மீனவர்களையும்
படகுடன் சிறைபிடித்துச் சென்றனர்.

இந்த கொடூர தாக்குதலால் அச்சமடைந்த மற்ற மீனவர்கள் வேகமாக கரைக்கு
திரும்பினர். இலங்கை கடற்படை தாக்கியதில், ராமேஸ்வரம் மாந்தோப்பு
பகுதியைச் சேர்ந்த மீனவர் ஜெகதீஸ் (35) படுகாயமடைந்தார்.

இவர் ராமேஸ்வரம் அரசு மருத்துவமனையில் சிகிச்சை பெற்று வருகிறார். சில மீனவர்கள் லேசான காயத்துடன் சிகிச்சை பெற்று சென்றனர்.

ராம் என்பவருக்குச் சொந்தமான படகில் ராம், ராஜமாணிக்கம், பாக்கிய
ஜோசப், பத்திரபாண்டி, மாரியப்பன் ஆகியோர் மீன்பிடிக்கச் சென்றனர்.
இவர்களது படகும் கரை திரும்பவில்லை.

இவர்கள் 5 பேரையும் இலங்கை கடற்படை பிடித்துச் சென்றுள்ளதாக நேற்று இரவு
தகவல் கிடைத்தது. ஷூ காலால்: கொடூர தாக்குதலில் காயமடைந்த மீனவர் ஜெகதீஸ்
கூறுகையில், கச்சத்தீவு அருகே மீன் பிடித்துக் கொண்டிருந்தோம். அங்கு
வந்த இலங்கை கடற்படையினர் திடீரென கற்களை எங்கள் படகு மீது வீசினர்.

இதனால் நிலைகுலைந்த நாங்கள் அப்படியே படகில் உட்கார்ந்து கல்வீச்சில்
இருந்து தப்பிக்க முயன்றோம். ஆனால், படகில் தாவிக் குதித்த கடற்படையினர்
உருட்டுக் கட்டைகளால் அடித்தனர்.

சிலரை ஷூ காலால் மிதித்து கீழே தள்ளினர். வலைகளை வெட்டி கடலுக்குள்
வீசினர். பிடித்து வைத்திருந்த மீன்களை அள்ளி கடலில் கொட்டினர் என்று
தெரிவித்தார்.

கிருஷ்ணா பயணத்துக்கு பின் மீண்டும் சம்பவம்

ராமேஸ்வரம் மீனவர்கள் கூறுகையில், ‘வெளியுறவுத் துறை அமைச்சர்
எஸ்.எம்.கிருஷ்ணா, ராஜபக்சேவை சந்தித்த பின்னர் இனி தாக்குதல் இருக்காது
என்றார்.

ஆனால், ஒரே வாரத்தில் கண்மூடித்தனமாக தாக்கியுள்ளனர். இலங்கையின்
பயமில்லா தன்மையையே இது காட்டுகிறது. தமிழக சட்டமன்றத்தில் நிறைவேற்றிய
தீர்மானத்தின்படி இலங்கைக்கு பொருளாதாரத் தடை விதிக்க வேண்டும்’ என்றனர்.