சேலம் அ.தி.மு.க., எம்.எல்.ஏ.,வின் ஆட்டம் அதிகரிப்பு: உண்மை தொண்டர்கள் பரிதாபம

சசிகலா கும்பலுடன், நெருங்கிய தொடர்பில் இருந்த, சேலம் மாநகர் மாவட்ட
செயலர் செல்வராஜின் ஆதிக்கம், தற்போது மேலும் அதிகரித்துள்ளது. தன்னை
எதிர்ப்பவர்கள், கட்சியில் வளர கூடாது என, தலைமைக்கு புகார்களை அனுப்பி,
கட்சியில் உள்ள உண்மை விசுவாசிகளை ஓரம் கட்டி வருகிறார். சேலம்
அ.தி.மு.க.,வை காப்பாற்ற வேண்டும் எனக்கோரி, போயஸ் கார்டனை முற்றுகையிடும்
முடிவில் கட்சியினர் இருப்பதாக தகவல் வெளியாகியுள்ளது.

அ.தி.மு.க.,
கோட்டையான சேலம், சில ஆண்டுகளுக்கு முன், தி.மு.க.,வின் கைப்பாவையாக
செயல்பட்ட சிலரால், கை நழுவிப்போனது. மீண்டும், அ.தி.மு.க., கோட்டையாக
மாற்றுவதற்கு, நிர்வாகிகள் பல்வேறு முயற்சிகள் மேற்கொண்டு கைகூடவில்லை.
2009 லோக்சபா தேர்தலில், காங்கிரஸ் வசம் இருந்த சேலம் லோக்சபா தொகுதி,
அ.தி.மு.க., வசமானது.அதன் பின் நடந்த சட்டசபை தேர்தல், உள்ளாட்சி தேர்தல்
போன்றவை, அ.தி.மு.க.,வுக்கு சாதகமாக அமைய, சேலம் மாவட்டம் அ.தி.மு.க.,
கட்டுப்பாட்டுக்குள் வந்தது.சேலம் தெற்கு தொகுதி எம்.எல்.ஏ., செல்வராஜ்,
தற்போது மாநகர் மாவட்ட செயலராக உள்ளார். ஒருங்கிணைந்த புறநகர் மாவட்ட
செயலராக, நெடுஞ்சாலைத்துறை அமைச்சர் இடைப்பாடி பழனிசாமி உள்ளார்.மற்ற
மாவட்டங்களை விட, சேலம் மாவட்ட அ.தி.மு.க.,வில் தான் கோஷ்டி பூசல் அதிகம்.
எம்.எல்.ஏ.,க்கள் செல்வராஜ், வெங்கடாசலம், அமைச்சர் பழனிசாமி ஆகியோர் ஒரு
கோஷ்டியாகவும், செம்மலை எம்.பி., எஸ்.கே.செல்வம், விஜயலட்சுமிபழனிசாமி
ஆகியோர், தங்களுக்கென தனி தனி கோஷ்டி அமைத்தும்
செயல்படுகின்றனர்.இவர்களுடைய நடவடிக்கையால், கட்சி நிர்வாகிகளும்,
தொண்டர்களும் பலிகடா ஆக்கப்படுகின்றனர்.

உள்ளாட்சி தேர்தலின் போது,
கட்சிக்கு உண்மையாக உழைத்த, 50க்கும் மேற்பட்டோர், எம்.எல்.ஏ., செல்வராஜ்
மூலம் பழிவாங்கப்பட்டனர். சசிகலா அண்ட் கோவுடன் இருந்த நெருக்கத்தால், அவரை
ஒன்றும் செய்ய முடியாத நிலை இருந்தது. தனக்கு வேண்டாதவர்களை, கட்சியில்
இருந்து நீக்கினார். அவர் குறித்து யாராவது புகார் கொடுக்க சென்றால், அந்த
புகார் மனு அவருக்கே திரும்பி வந்தது. முதல்வர் மீது விசுவாசமுள்ளவர்கள்,
செல்வராஜின் நடவடிக்கையால் வேதனையில் உள்ளனர்.சமீபத்தில், முன்னாள்
எம்.எல்.ஏ., வெங்கடாசலம், சேலம் மேற்கு சட்டசபை தொகுதி செயலர்,
கே.சி.செல்வராஜ் ஆகியோர் நீக்கப்பட்டனர். என்ன காரணம் என்றே தெரியாத
அளவில், அவர்கள் கட்சியில் இருந்து நீக்கப்பட்டனர்.

வெங்கடாசலத்துக்கு மாநகர் மாவட்ட செயலர் பதவி கிடைத்து விடும் என்ற நிலை
உருவானதால், முதல்வருக்கு பொய்யான தகவல்களை அனுப்பி, அவரை செல்வராஜ்
நீக்கியுள்ளார் என, கட்சியினர் கூறி வருகின்றனர்.வெள்ளைக்கல் கடத்தலில்,
சேலம் மேற்கு தொகுதி, எம்.எல்.ஏ., வெங்கடாசலம் ஈடுபட்டு வருவது குறித்து,
கட்சி பிரமுகர்கள் பலரும் புகார் கூறினர். வெள்ளை கல் கடத்தலுக்கு,
கே.சி.செல்வராஜ் தடையாக இருப்பதாக கூறி, மாவட்ட செயலர் மூலம்,
கே.சி.செல்வராஜை கட்சியில் இருந்து நீக்க பரிந்துரை செய்து, அவரை நீக்கி
விட்டனர் என்கின்றனர் அ.தி.மு.க.,வினர்.

இரவு, பகல் பாராது உழைத்த
நிர்வாகிகள், தொண்டர்கள், பொய்யான தகவலால் கட்சியில் இருந்து
வெளியேற்றப்படுவதால், கட்சியில் உள்ள உண்மையான அ.தி.மு.க.,வினர் நொந்துபோய்
உள்ளனர். நீக்கப்பட்டவர்களிடம், கட்சி தலைமை எவ்வித விளக்கமும்
கேட்பதில்லை. அதனால், எம்.எல்.ஏ.,க்கள் செல்வராஜ், வெங்கடாசலம் ஆகியோர்
தங்கள் இஷ்டம் போல் பழிவாங்குகின்றனர் என்கின்றன ரத்தத்தின்
ரத்தங்கள்."சேலம் அ.தி.மு.க.,வை காப்பாற்றக்கோரி, போயஸ் கார்டனை
முற்றுகையிட உள்ளோம்' என, கட்சியின் மூத்த நிர்வாகிகளும், மாநகர் மாவட்ட
செயலரால் பாதிக்கப்பட்டவர்களும் தற்போது வெளிப்படையாக கூறி வருகின்றனர்.
இது உளவுத்துறை மூலம், அ.தி.மு.க., தலைமையின் காதுக்கும் எட்டியுள்ளது.

"தவறு இருந்தால் கார்டனில் உயிர் விடுகிறோம்' : கட்சியில் இருந்து நீக்கப்பட்ட, கே.சி.செல்வராஜ் கூறியதாவது:
என்ன காரணத்துக்காக நான் நீக்கப்பட்டேன் என்பது எனக்கு இதுவரை
தெரியவில்லை. என் மீது தவறு இருந்தால், போயஸ் தோட்டத்திலேயே உயிரை விடவும்
நான் தயாராக இருக்கிறேன். 20 ஆண்டுகளாக கட்சிக்கு உழைத்துள்ளேன். எங்களைப்
போன்றவர்களை மீண்டும் கட்சிக்குள் இணைத்துக் கொள்ள முதல்வர், கண் திறக்க
வேண்டும் என்றார்.

கட்சியில் இருந்து நீக்கப்பட்ட முன்னாள் எம்.எல்.ஏ., வெங்கடாசலம் கூறியதாவது: ஒவ்வொரு
நாளும் மனவேதனையுடன் உள்ளேன். என்ன காரணத்துக்காக நீக்கினர் என
தெரியவில்லை. மாநகர் மாவட்ட செயலர் செல்வராஜிடம் கேட்டபோது, "முதல்வர்
எடுத்த முடிவு. நான் என்ன செய்வது? 30ம் தேதி வரை பொறுத்துக் கொள். அதன்
பின் பார்க்கலாம்' என்றார். அமைச்சரையும் சென்று சந்திக்க முடியாது.
முதல்வர் எங்களை அழைத்து விளக்கம் கேட்க வேண்டும் என்பதற்காக, வாரம் ஒரு
முறை சென்னை சென்று, கடிதம் வழங்கி வருகிறேன். எங்கள் மீது குற்றம்
இருந்தால், நான் உயிரை இழக்கவும் தயாராக உள்ளேன்.சேலம் மாநகராட்சி மேயர்
தேர்தலின் போது, ஒவ்வொரு வார்டிலும் சென்று எப்படி பிரசாரம் மேற்கொள்ள
வேண்டும் என்பதை, மேயருடன் இருந்து செய்தேன். எம்.ஜி.ஆர்., பிறந்த நாளில்,
"சூது வென்று விட்டது, என்றும் "அம்மா' வழியில்' என, பேனர் வைத்திருந்தேன்.
அதை கிழித்தெறிந்து விட்டனர். மாநகர் மாவட்ட செயலர் பதவி கிடைக்கும்
என்றெல்லாம் நான் நினைக்கவில்லை. எப்போதும் முதல்வரின் விசுவாசமிக்க
தொண்டனாகவே இருக்க விரும்புகிறேன்.இவ்வாறு வெங்கடாசலம் கூறினார்.

"என்னை இழுக்காதீர்கள்' : சேலம் மேற்கு தொகுதி எம்.எல்.ஏ., வெங்கடாசலம் கூறியதாவது:
முதல்வர் எடுக்கும் முடிவு. அதில் நான் என்ன சொல்ல இருக்கிறது? உளவுத்துறை
மூலம் தகவல் கிடைத்து, அதன் பேரில் தான், அவர் நடவடிக்கை எடுப்பார்.
யாரைப் பற்றியும் நாம் அவரிடம் புகார் கூற முடியாது. இந்த பிரச்னையில்
என்னை இழுக்காதீர்கள் என்றார்.

இது தொடர்பாக, சேலம் மாநகர் மாவட்ட
அ.தி.மு.க., செயலரும், தெற்கு தொகுதி எம்.எல்.ஏ.,வுமான, எம்.கே.செல்வராஜை,
மொபைலில் தொடர்பு கொண்டு கேட்டபோது, "அண்ணன் கூட்டத்தில் இருக்கிறார்.
இப்போது, அவரிடம் பேச முடியாது. நீங்கள் பேசிய தகவலை, அவரிடம்
தெரிவிக்கிறேன்' எனக் கூறி, அவரது உதவியாளர் பிரகாஷ், இணைப்பை
துண்டித்தார்.