தமிழகம் முழுவதும் 17 லட்சம் தெரு விளக்குகள் மாற்றம்: சூரிய சக்தியில் இயங்க வைக்க அரசு முடிவு

by **ஜனனி** Sat Jan 14, 2012 2:44 pm

மரபுசாரா எரிசக்தியைப் பயன்படுத்தி, மின்சாரப் பயன்பாட்டைக் குறைக்க தமிழக
அரசு நடவடிக்கை எடுத்துள்ளது. அ.தி.மு.க., அரசு பொறுப்பேற்றதும், நடந்த
முதல் பட்ஜெட் கூட்டத்தில் கவர்னர் உரையில் இதற்கான திட்டமும்
அறிவிக்கப்பட்டது. இதன் முதல் கட்டமாக, 12 ஆயிரத்து 618 கிராமங்களில் உள்ள,
17 லட்சத்து 42 ஆயிரத்து 804 தெரு விளக்குகளுக்கு பதில், சூரியசக்தி
விளக்குகளைப் பொருத்துவதற்கு அரசாணை வெளியிடப்பட்டுள்ளது. இத்திட்டத்துக்கு
மத்திய அரசின் உதவியுடன், 54.50 கோடி ரூபாய் செலவிடப்படுகிறது. அடுத்த
ஐந்தாண்டுகளில், தற்போதுள்ள 17 லட்சத்து 42 ஆயிரம் தெரு விளக்குகள்,
சூரியசக்தி விளக்குகளாகப் மாற்றப்படுகின்றன. தமிழக மின் மேம்பாட்டு முகமை,
திட்டத்தை செயல்படுத்துகிறது.
எந்தப் பகுதிகளில் சூரிய விளக்குகள்: சூரிய மின்விளக்குகளைப்
பொருத்த எந்த கிராமங்களைத் தேர்வு செய்வது என்பதை, மாவட்ட கலெக்டரும்,
மாவட்ட ஊரக வளர்ச்சி முகமை திட்ட அலுவலரும் முடிவு செய்கின்றனர்.
தற்போதுள்ள மின் விளக்குகளுக்குப் பதில் சூரிய விளக்குகளைப்
பொருத்தும்போது, கிராமங்களில் நடமாட்டம்
குறைவாக உள்ள பகுதிகள், வன எல்லைகள், மின் வினியோகம் மிகக் குறைவாக உள்ள பகுதிகள், மயானங்கள், மயானங்களுக்கு செல்லும் பாதைகள், "தாய்' திட்ட அமல்செய்யப்படும்
குக்கிராமங்கள் போன்ற பகுதிகளில், சூரிய விளக்குகளைப் பொருத்த முன்னுரிமை
அளிக்க, அரசு உத்தரவிட்டுள்ளது. தமிழக மின் மேம்பாட்டு முகமை, சூரிய
விளக்குகளைப் பொருத்துவதற்கான பணிகளை ஒப்படைக்க, நிறுவனங்களைத் தேர்வு
செய்கிறது. இந்நிறுவனங்கள், சூரிய விளக்குகளைப் பொருத்துவதோடு, குறிப்பிட்ட
காலத்துக்கு அவற்றை பராமரிக்கும் வேலையையும் செய்யும்.

உத்தரவாதம்: சூரிய சக்தி விளக்குகள் இரண்டு முதல் ஐந்தாண்டு
உத்தரவாதம் உள்ளதாகப் பயன்படுத்த அறிவுறுத்தப்பட்டுள்ளது. இதுதவிர, சூரிய
விளக்கு உபகரணங்களைப் பயன்படுத்துதல், பராமரித்தல் மற்றும் செய்யக்
கூடியவை, செய்யக் கூடாதவை ஆகிய பற்றிய பிரசுரங்களை கிராம நிர்வாகத்துக்கு
அளிக்க, தமிழ்நாடு மின் மேம்பாட்டு முகமையை, அரசு கேட்டுக் கொண்டுள்ளது.
சூரிய விளக்குகளைப் பொருத்தத் தேர்வு செய்யப்படும் நிறுவனங்களுடன்
செய்துகொள்ளும் ஆண்டு பராமரிப்புப் பணி ஒப்பந்தத்தையும் கிராம
நிர்வாகத்துக்கு
அளிக்குமாறு, மின் மேம்பாட்டு முகமையிடம் கூறப்பட்டுள்ளது. சூரிய
விளக்குகள் திட்டத்தை, மாவட்ட அளவில் கலெக்டர்கள் கண்காணிக்கின்றனர்.
இதற்கு, உதவி இயக்குனர் அந்தஸ்திலான அதிகாரியை நியமிக்கவும் கலெக்டர்
அறிவுறுத்தப்பட்டுள்ளார். சூரிய விளக்குகள் பொருத்தும் திட்டத்துக்கு
மாவட்ட அளவில் கலெக்டரும், மாநில அளவில் தமிழக மின் மேம்பாட்டு முகமையும்
பொறுப்பாளர்களாக உள்ளனர்.