70 லட்சம் நவீன ரக முந்திரி கன்றுகளை கடலூர் விவசாயிகளுக்கு இலவசமாக வழங்க உத்தரவு

by **அருள்** Fri Jan 13, 2012 7:12 am

கடலூர் மாவட்டத்தில், புயலால் பாதிக்கப்பட்ட முந்திரி விவசாயிகளுக்கு,
70 லட்சம் முந்திரி கன்றுகளை இலவசமாக வழங்க, முதல்வர் உத்தரவிட்டுள்ளார்.

முதல்வர் உத்தரவு :"தானே' புயலால், கடலூர் மாவட்ட முந்திரி விவசாயிகள்,
கடுமையாக பாதிக்கப்பட்டு உள்ளனர். 35 ஆயிரத்து 200 ஹெக்டேரில் பயிரிடப்பட்ட
முந்திரி மரங்கள், புயல் காற்றால் வேரோடு சாய்ந்தன. அதுமட்டுமின்றி, 2,281
ஹெக்டேரில் பயிரிடப்பட்டிருந்த, பலா மற்றும் மாமரங்களும் சேதமடைந்தன.
முந்திரி
விவசாயிகளுக்கு, ஆயிரக்கணக்கில் இழப்பீடு வழங்கினாலும், முந்திரி கன்றுகளை
உற்பத்தி செய்து, மானாவாரியான செம்மண் நிலத்தில் நடவு செய்ய முடியாத நிலை
இருந்தது. இதைக் கருத்தில் கொண்டு, ஏழு ஆண்டுகள் வரை காத்திருக்காமல்,
குறைந்த காலத்தில் பலன் தரும் முந்திரி கன்றுகளை உற்பத்தி செய்து,
விவசாயிகளுக்கு இலவசமாக வழங்குவதுடன், அதை பராமரிக்கவும், விவசாய
அதிகாரிகளுக்கு, முதல்வர் உத்தரவிட்டார்.

"விருத்தாச்சலம் 3'
இதையடுத்து, விவசாயத் துறை அமைச்சர்
தாமோதரன், துறையின் முதன்மைச் செயலர் சந்தீப் சக்சேனா உள்ளிட்டோர், தலைமைச்
செயலகத்தில் ஆலோசனை நடத்தி, மூன்று ஆண்டுகளில் பலன் தரும் நவீன
முந்திரியான, "விருத்தாச்சலம் 3' என்ற ரகத்தை தேர்வு செய்து, அரசிடம்
ஒப்புதல் பெற்றனர்.
தமிழகத்தில், தோட்டக்கலைத் துறைக்கு சொந்தமாக, 46
அரசு பண்ணைகள் உள்ளன. இதுதவிர, தனியார் பண்ணைகளும் உள்ளன. இவற்றில், 70
லட்சம் முந்திரி கன்றுகளை உற்பத்தி செய்து, பாதிக்கப்பட்ட பகுதியில் நடவு
செய்ய, இலக்கு நிர்ணயிக்கப்பட்டுள்ளது.

இதுகுறித்து, விவசாயத் துறை அதிகாரி ஒருவர் கூறியதாவது:வரும் மழை
காலத்தில், நன்கு வளர்ந்த முந்திரி செடிகளை, பாதிக்கப்பட்ட விவசாயிகளின்
நிலத்தில் நடவு செய்வதுடன், அதைத் தொடர்ந்து கண்காணிப்பது வரை, இலவசமாக
செய்ய, விரிவான திட்டம் தீட்டப்பட்டுள்ளது. இதுதவிர, மழை அல்லாத காலத்தில்,
மா, பலா கன்றுகள் உற்பத்தி செய்யப்பட்டு, விவசாயிகளுக்கு இலவசமாக
கொடுக்கப்படும்.இவ்வாறு அவர் கூறினார்.