மீட்புப் பணி கடும் மந்தம்: புயல் பாதித்த பகுதிகளில் மக்கள் கொதிப்பு

கடலூர்: "தானே' புயலால் பாதிக்கப்பட்ட கடலூர் மாவட்டத்தில், ஐந்து
நாட்களாகியும், கிராமங்களில் மீட்புப் பணிகள் துவக்கப்படாததால், அரசு மீது
மக்கள், கடும் கோபத்தில் உள்ளனர். கடலூர் மாவட்டத்தில், கடந்த 30ம் தேதி
வீசிய, "தானே' புயலால், மூன்றரை லட்சத்திற்கும் மேற்பட்ட வீடுகள்
முற்றிலுமாக நொறுங்கின. மூன்று லட்சம் ஏக்கரில் பயிரிட்டிருந்த நெல், வாழை,
கரும்பு, வேர்க்கடலை உள்ளிட்ட விவசாயப் பயிர்களும், 40 ஆயிரம் ஏக்கரில்
பயிரிடப்பட்டிருந்த, பல ஆண்டுகள் பயன்தரும் மா, பலா, முந்திரி, தென்னை,
புளிய மரங்கள் உட்பட, 10 லட்சத்திற்கும் மேற்பட்ட மரங்களும் வேரோடு
சாய்ந்தன.

கோரப் புயல் தாக்குதலில், 46 ஆயிரம் மின் கம்பங்கள்,
5,000 டிரான்ஸ்பார்மர்கள், 120 துணை மின் நிலைய உபகரணங்கள், 30 பெரிய
டவர்கள், 10 ஆயிரத்து 470 கி.மீ., மின் கண்டக்டர்கள் (மின் கம்பி)
பாதிக்கப்பட்டன. இதனால், மாவட்டமே சின்னாபின்னமாகியது.
கடந்த 30ம் தேதி
முதல், மக்கள் சொல்லொணாத் துயரத்திற்கு ஆளாகியுள்ளனர். தமிழக அரசு மீட்புப்
பணிக்காக, பேரிடர் மேலாண்மை திட்ட இயக்குனர் அபூர்வா தலைமையில், ஐந்து
ஐ.ஏ.எஸ்., அதிகாரிகள் மீட்புப் பணிகளில் ஈடுபட்டுள்ளனர். புயலுக்குப்
பின், கடலூர் நகரில் எங்கு பார்த்தாலும் சுழலும் விளக்குகள் பொருத்தப்பட்ட
கார்கள், "ஜி' பொறிக்கப்பட்ட வாகனங்கள் சுழன்று வந்து கொண்டிருக்கின்றன.
நாளுக்கு நாள் அதிகாரிகள் வாகனங்கள் அதிகரித்து வருகிறதே தவிர, மீட்புப்
பணி முடிந்தபாடில்லை.

கிராம சாலைகளில் மரங்கள் விழுந்து கிடப்பதால்,
குடிநீர் லாரிகள் செல்ல முடியவில்லை. கிராமப் பகுதிகளில் தொடர்ந்து
குடிநீர் பற்றாக்குறை நிலவி வருகிறது. கால்நடைகளுக்கு தண்ணீர்
கிடைக்கவில்லை. நகரப் பகுதிக்கு குடிநீர் ஏற்றும் மோட்டாரை இயக்க,
ஜெனரேட்டர் கிடைக்கவில்லை என்கிறது மாவட்ட நிர்வாகம். கடலூர் அருகே உள்ள
சின்னகாரைக்காடு கிராமத்தில், குடிநீர் கேட்டு பஸ் கண்ணாடியை உடைக்கும்
நிலைக்கு மக்கள் சென்று விட்டனர். தண்ணீரை அடிப்படையாகக் கொண்டு
நடத்தப்படும் ஓட்டல்கள், டீ கடைகள் ஒன்று இரண்டைத் தவிர, மற்றவை
மூடப்பட்டுள்ளன.

வீதிகளில் ஆங்காங்கே, தாவர இலை சருகுகள் மலை போல்
குவிந்துள்ளன. இதை அகற்றுவதற்கான நடவடிக்கை மேற்கொள்ளவில்லை. இலைகள் அழுகி
வருவதால், துர்நாற்றம் வீசி, சுகாதார சீர்கேடு ஏற்பட்டு வருகிறது. கடந்த 6
நாட்களாக, மாவட்ட மக்கள் மின்சாரமின்றி தவித்து வருகின்றனர். வீடுகள்,
விவசாயம் எல்லாவற்றையும் துறந்து, மக்கள் நிர்கதியாய் நிற்கின்றனர்.
கணக்கெடுப்பு பணிக்காக, ÷Œதமடைந்த ஓலைக்குடிசையைக் கூட
சீரமைக்க முடியவில்லை.

மீட்புப்
பணியே முடியாததால், மாவட்ட நிர்வாகத்தால் நிவாரணப் பணிக்குச் செல்ல
முடியவில்லை. மின் துறையில் தினமும் 1,000 பேர் இரவு பகலாக பணியாற்றி,
வெறும் 35 டிரான்ஸ்பார்மர்கள் மட்டுமே சரிசெய்து, இதுவரை 2 கி.மீ., தூரம்
தான் மின்சாரம் கொண்டு வரப்பட்டுள்ளது. கிராம சாலைகளில் விழுந்துள்ள மின்
கம்பங்கள், மரங்களை அப்புறப்படுத்தாததால், தொடர்ந்து போக்குவரத்து
பாதிக்கப்பட்டுள்ளது.
புயல் கரையைக் கடந்து ஐந்து நாட்களாகியும்,
கிராமப் பகுதிகளில் மீட்புப் பணி துவக்கப்படாததால், மக்கள் அரசின் மீது
கடும் கோபம் கொண்டுள்ளனர்.


இடைத்தேர்தல் பாணியை மீட்புப்
பணியில் காட்டலாமே! : இடைத்தேர்தல் என்றால், கிராமத்திற்கு ஒரு அமைச்சர்,
தெருவுக்கு ஒரு எம்.எல்.ஏ., என தொகுதியை முற்றுகையிட்டு, ஒவ்வொருவரும்
தங்களுக்கு ஒதுக்கப்பட்ட பகுதிகளில் சில கோடி ரூபாயை செலவிட்டு, அப்பகுதி
மக்களின் தேவைகளை பூர்த்தி செய்து ஓட்டுகளைப் பெறுகின்றனர். அதேபோன்று,
"தானே' புயலில் கடுமையாக பாதிக்கப்பட்டுள்ள கடலூர் மாவட்டத்தில் அனைத்து
அமைச்சர்கள், ஆளுங்கட்சி எம்.எல்.ஏ.,க்கள் முகாமிட்டு, ஒவ்வொருவரும் சில
கிராமங்களைப் பிரித்துக் கொண்டு, நிவாரணப் பணியை மேற்கொண்டிருந்தால்,
அதிகாரிகளும் துரிதமாக செயல்படுவர். அதைக் கண்டு, அந்தந்த பகுதி மக்களும்
விழுந்த மரங்கள் மற்றும் மின் கம்பங்களை அகற்றவும், புதிய மின் கம்பங்களை
நடுவதற்கும் தாமாகவே முன் வருவர். இதனால், ஓரிரு நாட்களிலேயே மீட்புப்
பணியை முழுமையாக நிறைவேற்ற முடியும். மக்களும் இயல்பு நிலைக்கு
திரும்புவர். அதன் பிறகு, புயலால் வாழ்வாதாரத்தை இழந்த மக்களுக்கு
மேற்கொள்ள வேண்டிய புனரமைப்புப் பணியைத் துவக்க, அரசுக்கும் வசதியாக
இருக்கும்.