ஹெல்மெட் அணியாதவர்களுக்கு மலர்மாலை : ராஞ்சியில் புது "டெக்னிக்'

ராஞ்சி: ராஞ்சியில், சாலை போக்குவரத்து விழிப்புணர்வு வாரத்தையொட்டி,
ஹெல்மெட் அணியாமல் இரு சக்கர வாகனங்களை ஓட்டு பவர்களுக்கு, "மாலை'
அணிவித்து மரியாதை செலுத்தும் புதுமையான முறையில், அந்நகர போலீசார் தண்டனை
அளிக்கின்றனர்.

நாளுக்கு நாள் வாகனங்கள் பெருகி வரும் தற்போதைய
நிலையில், விபத்துகளும் அதிகரித்து வருகின்றன. ஹெல்மெட் அணிந்து இருசக்கர
வாகனங்களை ஓட்டுவதால், விபத்து ஏற்படும் போது தலையில் அடிபடுவதைத்
தவிர்க்கலாம். இதற்காக உள்ள சட்டத்தையும், வாகன ஓட்டிகள் மதிப்பதில்லை.
ஹெல்மெட் அணிவதன் அவசியம் குறித்து, போக்குவரத்து போலீசார் அவ்வப்போது
அறிவுறுத்தி வருகின்றனர். இருந்தபோதிலும், வாகன ஓட்டிகளில்
பெரும்பான்மையானவர்கள் அந்த அறிவுரையை அலட்சியப்படுத்தி விடுகின்றனர்.
இந்நிலையில்,
ஜார்க்கண்ட் மாநிலம், ராஞ்சி நகரில் ஹெல்மெட் அணியாமல் வாகனம்
ஓட்டுபவர்கள் அதிகரித்து வருகின்றனர். அபராதம் விதித்தாலும், அதைப்பற்றி
கவலைப்படாமல், அபராதம் செலுத்தத் தயங்குவதில்லை. ஆனால், ஹெல்மெட் அணிய
விரும்புவதில்லை. இதனால், அவர்களை ஹெல்மெட் அணியும்படி செய்ய அந்நகர
போலீசார், புதுமையான முறையை மேற்கொண்டு வருகின்றனர். சாலை போக்குவரத்து
விழிப்புணர்வு வாரத்தையொட்டி, ஹெல்மெட் அணியாமல் வரும் வாகன ஓட்டிகளை ஓரம்
கட்டி, அவர்களுக்கு மலர் மாலை அணிவித்து, அதை வீடியோ படம் எடுத்து,
"டிவி'யில் ஒளிபரப்புகின்றனர். பத்திரிகையிலும் பிரசுரம் செய்கின்றனர்.
இதற்கு நல்ல பலன் கிடைத்துள்ளது. பலர் இதை தவிர்ப்பதற்காக, ஹெல்மெட் அணிவது
அதிகரித்துள்ளது.

இதுகுறித்து போலீஸ் கண்காணிப்பாளர் பிரசாத் கூறியதாவது: ஹெல்மெட்
அணியாமல் வண்டி ஓட்டுபவர்களுக்கு அபராதம் விதித்தாலும், அதைச் செலுத்தி
விடுகின்றனர். ஆனால், அவர்கள் மீண்டும் ஹெல்மெட் அணியாமலேயே வண்டி
ஓட்டினர். இதனால், வண்டி ஓட்டுபவர்களை ஹெல்மெட் அணியும்படி செய்வதற்காக,
அவர்களுக்கு மாலை அணிவித்து, அவர்களிடம் போலீசார் கைகுவித்து, ஹெல்மெட்
அணியும்படி கேட்டுக் கொள்கின்றனர்.
இதை வீடியோ படம் எடுத்து,
"டிவி'யில் ஒளிபரப்பும் போதும், பத்திரிகைகளில் செய்தி வரும் போதும்
அவர்கள் அவமானம் அடைந்து, மனம் மாறுகின்றனர். வாகன ஓட்டிகளுக்கு
அளிக்கப்படும் இந்த மலர் மாலை சிகிச்சையால், எதிர்காலத்தில் ஹெல்மெட் அணிய
மறக்க மாட்டார்கள். இவ்வாறு போலீஸ் கண்காணிப்பாளர் கூறினார்.