கேரளம் பணியும்வரை தமிழகம் தணியாது: வைகோ

சென்னை,
டிச. 29: முல்லைப் பெரியாறு விவகாரத்தில் கேரளம் பணியும் வரை தமிழகத்தில்
கொதிப்பு தணியாது என்று மதிமுக பொதுச்செயலாளர் வைகோ கூறினார்.பாசனப்
பொறியியல் வல்லுநரான மறைந்த பழ.கோமதிநாயம் எழுதிய "தாமிரவருணி சமூக -
பொருளியல் மாற்றங்கள்' என்ற நூலின் வெளியீட்டு விழா சென்னை தேவநேயப்
பாவாணர் நூலக அரங்கில் வியாழக்கிழமை நடைபெற்றது.பழ.கோமதிநாயகம்
உலகத் தமிழர் பேரமைப்பின் தலைவர் பழ.நெடுமாறனின் சகோதரர் ஆவார். இந்திய
கம்யூனிஸ்ட் கட்சியின் தேசிய கட்டுப்பாட்டுக் குழுத் தலைவர் ஆர்.நல்லகண்ணு
கூட்டத்துக்கு தலைமை தாங்கினார்.மதிமுக பொதுச்செயலாளர் வைகோ நூலை வெளியிட தமிழக பசுமை இயக்கத் தலைவர் வி.ஜீவானந்தம் பெற்றுக்கொண்டார்.விழாவில்
வைகோ பேசியது: முல்லைப் பெரியாறு விவகாரத்தில் கேரளம் அக்கிரமமாகச்
செயல்படுகிறது. பெரியாறு இரு மாநில மக்களின் வாழ்வாதாரத்துக்கு
அடிப்படையானதாகும். அணை விவகாரத்தில் வெள்ளைக்காரர்களோடு 999
ஆண்டுகளுக்கு தமிழகம் ஒப்பந்தம் செய்துள்ளது செல்லாது என்று கேரளத்தினர்
சொல்கின்றனர். ஆனால் கேரள அரசு 1970 -ம் ஆண்டு ஒப்பந்தத்தில்
கையெழுத்திட்டுள்ளதை கோமதிநாயகம் நூலில் குறிப்பிட்டு வாதிடுகிறார். 999-ம்
ஆண்டுகளுக்குப் பிறகும் மேலும் 999 ஆண்டுகளுக்கு ஒப்பந்தத்தைப்
புதுப்பிக்க வேண்டும் என்பதுதான் உண்மையான ஒப்பந்தமாகும் என்பதையும் அவர்
கூறியுள்ளார்.அணையைப் பாதுகாக்கும் உரிமையை கேரளத்துக்கு தமிழக அரசு விட்டுக் கொடுத்திருக்கக் கூடாது.2006-ம்
ஆண்டு நில அதிர்வால் அணைக்குப் பாதிப்பு ஏற்படும் என்று கேரள அரசு
புரளியைக் கிளப்ப இருக்கிறது என்று மத்திய உளவுத் துறை மத்திய அரசை
எச்சரித்தது. இதற்குப் பிறகும் இதுவரை அணைக்கு மத்தியப் பாதுகாப்பு
கொடுக்கப்படவில்லை. கேரள அமைச்சர் ஜோசப் அணையை உடைத்து, அதில் உள்ள
கற்களைக் கொண்டு சாலை அமைப்போம் என்று பேசுகிறார்.இதையெல்லாம்
மத்திய அரசும் உச்சநீதிமன்றமும் வேடிக்கைதான் பார்க்கின்றன. இந்த
விவகாரத்தில் தமிழகத்தின் அனைத்து தரப்பு மக்களும் கொதிப்பு நிலையில்
இருக்கின்றனர்.முல்லைப் பெரியாறு அணையை உடைக்க மாட்டோம், புதிய அணை
கட்டமாட்டோம் என்று கேரளம் சொல்லும் வரை தமிழகத்தில் கொதிப்பு தணியாது
என்றார் வைகோ.பழ.நெடுமாறன்: 1979-ம் ஆண்டு முல்லைப் பெரியாறு
விவகாரம் தொடர்பாக என் தம்பியிடம் குறிப்புகள் பெற்றே சட்டப்பேரவையில் நான்
பேசினேன். அந்தக் குறிப்புகளால் அப்போது தமிழகமே அதிர்ந்தது. என் தம்பியை
அறியாத கட்சிக்காரர்களே இருக்க மாட்டார்கள். நதி நீர்ப் பிரச்னை, மணல்
பிரச்னை உள்பட அனைத்துப் பிரச்னைகளையும் அவரிடம் அனைவரும் ஆலோசிப்பர். பிரபாகரன்
அழைப்பின் பேரில் ஈழத்துக்குச் சென்று 100 பேருக்கு நீரியல் துறை தொடர்பாக
பயிற்றுவித்து வந்தார். இது தொடர்பாக அவரே புத்தகம் தயாரித்து அங்கு
கொண்டு சென்றார். இந்த ரகசியம் எனக்கும் என் தம்பிக்கு மட்டுமே தெரியும்
என்றார் அவர்.ஆர்.நல்லகண்ணு: முல்லைப் பெரியாறு, காவிரி, பாலாறு
உள்பட அனைத்து நதிகளிலும் பிரச்னை உள்ளது. இந்தப் பிரச்னைகளை விருப்பு
வெறுப்பின்றி கோமதி நாயகம் ஆயந்து தந்திருக்கிறார்.சமூகத்தின்
ஒட்டுமொத்த நலனைப் பற்றியே கருத்தில் கொண்டு வாழ்ந்தவர் கோமதிநாயகம்
என்றார் அவர் விழாவில் கோமதிநாயகம் நினைவுச் சொற்பொழிவுக்கான வைப்புநிதியாக
ரூ.50 ஆயிரம் மதுரை திருவள்ளுவர் கழகத்துக்கு அளிக்கப்பட்டது. பத்திரிகையாளரும்,
முனைவர் பட்டத்துக்காக ஆய்வு செய்யப்பட்ட இந்த ஆங்கில நூலை தமிழாக்கம்
செய்தவருமான எம்.பாண்டியராஜன் வரவேற்புரையாற்றினார். பாவை பப்ளிகேஷன்
பொதுமேலாளர் தி.ரத்தினசபாபதி நன்றி கூறினார்.