பஸ் போக்குவரத்து மீண்டும் நிறுத்தம் : முறிந்தது இயல்பு நிலை

தேனி: கேரளாவிற்கான பஸ் போக்குவரத்து துவக்கப்பட்ட ஒரே நாளில், மீண்டும்
பதட்ட நிலை ஏற்பட்டதால், போக்குவரத்து நிறுத்தப்பட்டது. பதட்டத்தை போக்க,
கிராமங்களில் அமைதிக் குழு அமைக்க மாவட்ட நிர்வாகம் முன்வந்துள்ளது.
முல்லைப் பெரியாறு பிரச்னையில், தமிழக - கேரளா எல்லையில் நிலவிய
பதட்டத்தால், 20 நாட்களாக பஸ் மற்றும் வாகன போக்குவரத்து
நிறுத்தப்பட்டிருந்தது. போராட்டங்கள் அறவழியில் சென்றதால், போடிமெட்டு
மற்றும் குமுளி தமிழக எல்லை வரையும், கம்பம் மெட்டு வழியாகவும் கேரளாவிற்கு
நேற்று முன்தினம் பஸ் போக்குவரத்தை துவக்கினர். இந்நிலையில், கட்டப்பனை
அருகில் கல்தொட்டி என்ற இடத்தில், கம்பம் புதுப்பட்டியை சேர்ந்த
முத்துச்செல்வன்,கேரள கும்பலால் தாக்கப்பட்டு, பலத்த காயமடைந்தார். ஆபத்தான
நிலையில், மதுரை அரசு மருத்துவமனையில் அனுமதிக்கப்பட்டுள்ளார்.

"பொதுமக்கள்
மீது வழக்குகள் போடக் கூடாது; போட்ட வழக்குகளை வாபஸ் பெற வேண்டும்;
கேரளாவிற்கு போக்குவரத்தை நிறுத்த வேண்டும்' என்ற கோரிக்கைகளை வலியுறுத்தி,
உத்தமபாளையம் வழக்கறிஞர்கள் நேற்று, குமுளிக்கு ஊர்வலம் செல்ல
அறிவித்திருந்தனர். இதனால், மீண்டும் பதட்ட நிலை ஏற்பட்டது.
இதையடுத்து
வழக்கறிஞர்களுடன், தேனியில் நடந்த சமாதான கூட்டத்தில், கலெக்டர் பழனிசாமி,
பிரவீன் குமார் அபினவ் எஸ்.பி., கமாண்டோ எஸ்.பி., ஈஸ்வரன் பங்கேற்றனர்.

கலெக்டர், "கம்பம் மெட்டு வழியாக கேரளாவுக்கு இயக்கிய பஸ் போக்குவரத்தை நிறுத்தப்படும்' என்றார்.
"போராட்டங்களில்
கைதானவர்களுக்கு ஆட்சேபனை இருந்தால், முறையீடு செய்து பயன் பெறலாம்' என,
எஸ்.பி., தெரிவித்தார். அமைதிக்குழு அமைக்கவும் ஒப்புக் கொள்ளப்பட்டது.
கோரிக்கைகளை ஏற்றதால், ஊர்வலத்தை கைவிடுவதாக, வழக்கறிஞர்கள் தெரிவித்தனர்.
கேரளாவிற்கான பஸ் போக்குவரத்து துவங்கியதால், இயல்பு நிலை திரும்பியதாக
கருதிய நிலையில், ஒரே நாளில் எதிர்பார்ப்பு முறிந்தது.


பூதாகரத்தில்
புத்தாண்டு? : புதிய அணை கட்டும் கேரளாவின் நிலைப்பாடு, ஜன.,1ல் தெரியும்
என்பதால், இம்முறை புத்தாண்டு பூதாகரமாய் மாறிவிட்டது. தேனியில் பல
இடங்களில் புத்தாண்டு கொண்டாட்டங்கள் ரத்து செய்யப்பட்டுள்ளன. "புதிய
அணைக்கான அடிக்கல் நாட்டு விழாவை கைவிடும் பட்சத்தில், ஜன.,2ல்
கேரளாவிற்கான பஸ் போக்குவரத்து தொடங்கும்,' என, அதிகாரிகள் தரப்பில்
கூறப்படுகிறது.

கம்பமெட்டு ரோட்டில் மறியல் : நேற்று காலை
கேரளாவிற்கு சென்ற வாகனங்களை, கம்பமெட்டு ரோட்டில் உள்ள கிளப் அருகில்
பொதுமக்கள் மறித்தனர். அங்கு வந்த போலீசார் வாகனங்களை திருப்பி அனுப்பினர்.
தற்போது கம்பமெட்டு ரோட்டில் உள்ள போலீஸ் சோதனை சாவடியில் ஆட்களை ஏற்றிச்
செல்லும் ஜீப்புகள், ஆட்டோக்களும் தடை செய்யப்படுகின்றன.
ஏலத்தோட்டங்களுக்கு செல்லும் விவசாயிகள் தடுக்கப்படவில்லை.