லோக்பாலுக்காக ஹசாரே இன்று மீண்டும் உண்ணாவிரதம்

மும்பை: மும்பையில் ஹசாரே இன்று உண்ணாவிரதப் போராட்டத்தை துவங்குவதை
அடுத்து, போராட்டம் நடக்கும் பகுதி முழுவதும் பலத்த பாதுகாப்பு ஏற்பாடுகள்
செய்யப்பட்டுள் ளன. இதற்கிடையில், ஹசாரேயின் சிறை நிரப்பும் போராட்டத்தில்
பங்கேற்பதாக, ஒரு லட்சத்துக்கும் மேற்பட்டோர், ஆன்-லைன் மூலம் தகவல்
தெரிவித்துள்ளனர்.
பலமான லோக்பால் மசோதாவை பார்லிமென்டில் நிறைவேற்ற
வலியுறுத்தி, காந்தியவாதி அன்னா ஹசாரே, இன்று துவங்கி, மூன்று நாட்களுக்கு
உண்ணாவிரதப் போராட்டம் மேற்கொள்ளவுள்ளார்.
இதற்காக, அவரது சொந்த ஊரான
ராலேகான் சித்தியில் இருந்து புறப்பட்டு நேற்று மாலை, மும்பை வந்தடைந்தார்.
இன்று காலை 11 மணிக்கு, அவரது உண்ணா விரதம் துவங்குகிறது.

2,000 போலீசார் : உண்ணாவிரதப் போராட்டம், மும்பை பெருநகர வளர்ச்சிக் குழும மைதானத்தில் நடக்கிறது.
போராட்டத்துக்கு
ஏற்கனவே மிரட்டல் கடிதம் வந்திருப்பதால், அசம்பாவிதம் ஏற்படாமல் தடுக்கும்
வகையில் பலத்த பாதுகாப்பு ஏற்பாடுகள் செய்யப்பட்டுள்ளன. உண்ணாவிரதம்
நடக்கும் பகுதியில் மட்டும் 2,000 போலீசார் பாதுகாப்பு பணியில்
ஈடுபடுத்தப்பட்டுள்ளனர்; 200 எஸ்.ஐ.,க்களும் அங்கு முகாமிட்டுள்ளனர்.
மகாராஷ்டிர மாநில போலீசார் தவிர, மத்திய ரிசர்வ் போலீஸ் படையினர்,
அதிவிரைவு படையினர், வெடிகுண்டுகளை செயலிழக்கச் செய்யும் நிபுணர்கள்
ஆகியோரும் பாதுகாப்பு பணியில் ஈடுபட்டுள்ளனர்.

அவசர வழி :
மைதானத்தைச் சுற்றி, ஆறு அவசர வழிகள் அமைக்கப்பட்டுள்ளன. ஆறு மெட்டல்
டிடெக்டர் யூனிட்களும் அமைக்கப்பட்டுள்ளன. தீ விபத்து தடுப்பு
முன்னெச்சரிக்கை நடவடிக்கையும் மேற்கொள்ளப்பட்டுள்ளது.
பொறுத்திருக்க
வேண்டும் ஹசாரே போராட்டம் குறித்து பார்லிமென்ட் விவகாரத் துறை இணை
அமைச்சர் ராஜிவ் சுக்லா கூறுகையில், "பலமான விதிமுறைகளுடன் கூடிய லோக்பால்
மசோதா தான், லோக்சபாவில் தாக்கல் செய்யப்பட்டுள்ளது. இனிமேல் இதுகுறித்த
முடிவை, பார்லிமென்ட் தான் எடுக்கும். அதே நேரத்தில், உண்ணாவிரதப்
போராட்டம் நடத்துவோருக்கு ஒரு விஷயத்தை தெரிவிக்க விரும்புகிறேன். இந்த
மசோதா தொடர்பாக, பார்லிமென்டில் என்ன முடிவு எடுக்கப்படுகிறது என்பதை,
அவர்கள் பொறுத்திருந்து பார்க்க வேண்டும்; அதுவரை அவர்கள் காத்திருக்க
வேண்டும்' என்றார்.

ஒரு லட்சம் பேர் ரெடி : உண்ணாவிரதத்தை
தொடர்ந்து, சிறை நிரப்பும் போராட்டத்துக்கு ஹசாரே அழைப்பு விடுத்துள்ளார்.
இந்த போராட்டத்தில் பங்கேற்பதாக, இதுவரை ஒரு லட்சத்துக்கும் மேற்பட்டோர்,
ஹசாரேவுக்கு ஆதரவாக ஆன்-லைன் மூலம் தகவல் தெரிவித்துள்ளனர்.

கவலை
வேண்டாம்: டாக்டர் "ஓகே' : அன்னா ஹசாரேயின் உதவியாளர் சுரேஷ் பதாரே
கூறியதாவது: ஹசாரே, கடந்த இரண்டு நாட்களாகவே சளி மற்றும் இருமலால்
பாதிக்கப்பட்டு இருந்தார்; மிதமான காய்ச்சலும் அவருக்கு உள்ளது. அவரை
பரிசோதித்த டாக்டர், கவலைப்படும்படி எதுவும் இல்லை எனக் கூறி விட்டார்.
இதனால், திட்டமிட்டபடி நாளை(இன்று) அவர் உண்ணாவிரதம் இருப்பார். அதில் எந்த
சந்தேகமும் இல்லை. காய்ச்சல் காரணமாக, ஹசாரே சற்று
பலவீனமடைந்திருந்தாலும், உற்சாகமாகவே காணப்படுகிறார். உண்ணாவிரதம்
இருக்கும்போது, மருந்து, மாத்திரைகள் எடுத்துக் கொள்வது குறித்து
ஹசாரேயிடம் ஆலோசிக்கப்படும். தேவைப்பட்டால், சப்பி சாப்பிடும் வகையிலான
மாத்திரைகள் வழங்கப்படும்.
இவ்வாறு பதாரே கூறினார்.

சோனியா வீடு
முன் போராட்டம் : உண்ணாவிரதத்தில் பங்கேற்பதற்காக மும்பை புறப்படும் முன்,
ராலேகான் சித்தியில் செய்தியாளர்களுக்கு ஹசாரே பேட்டி அளித்தார். அவர்
கூறியதாவது: வரும் 30ம் தேதி, சோனியா வீடு முன், முற்றுகை போராட்டம்
நடத்துவோம். எங்களின் போராட்டம், எந்த ஒரு அரசியல் கட்சிக்கும் எதிரானது
அல்ல. லோக்பால் மசோதா குறித்த, எங்களின் பரிந்துரைகளை ஏற்பதாகக் கூறி
விட்டு, பின் அதை அரசு தரப்பு நிராகரித்து விட்டது. ஊழல் மற்றும் பண
பலத்தால், சாதாரண மக்கள் கடுமையாக பாதிக்கப்பட்டுள்ளனர். எனக்கு பெரிய
அளவில் உடல் நல பாதிப்பு இல்லை. உண்ணாவிரதம் இருக்கும் அளவுக்கு, உடல் நலன்
நன்றாக உள்ளது.
இவ்வாறு ஹசாரே கூறினார்.

பிரணாப் முகர்ஜி நிதி
அமைச்சர் : லோக்பால் மசோதா தொடர்பாக, ஹசாரே குழுவினருடன் பல சுற்று பேச்சு
நடத்தியாகிவிட்டது. மசோதாவுக்கு இறுதி வடிவம் கொடுப்பது குறித்து,
பார்லிமென்ட் தான் இனி முடிவு செய்யும். பார்லிமென்டில் நடக்கவுள்ள விவாதம்
குறித்து, தற்போது எந்த கருத்தும் கூற விரும்பவில்லை.